Fii no Rewirdu ndun Moƴƴinirtee
26
1 «Moƴƴiniraa rewirdu ndun lefi sappo gaara dane mottaaɗi ɗewluɗi e gaara baka e gaara mbulu e gaara boɗe, hara serubiinaaji* no ɲeɲiraa ɲeeɲal e majje. 2 Hara junndi lefol kala ko sogone noogay e jeetati, yanji maggol on sogone nay, hara ɗi fow hiɗi fota. 3 Lefi jowi ɲo'indiree, ɗiya jowi kadi ɲo'indiree. 4 Waɗanaa suddaare aranere nden noppoy moƴƴiniraakoy gaara baka ka gaaɓal sengo arano ngon. Waɗiraa wano non kadi ka gaaɓal sengo arano suddaare ɗimmere nden. 5 Waɗaa noppoy cappanɗe jowoy e suddaare aranere nden, waɗaa kadi noppoy cappanɗe jowoy e gaaɓal suddaare ɗimmere nden, hara noppoy koy no fewtondiri. 6 Moƴƴinaa pengirɗe cappanɗe jowi kaŋŋe, pengindiraa cuddaaje ɗen, ko nii rewirdu ndun wonirta huunde wootere. 7 «Moƴƴinaa kadi lefi sappoo e go'o leeɓi be'i fii ko wona caaliiru ka hoore rewirdu. 8 Junndi lefol bee hawra sogone cappanɗe tati, yanji ndin hawra sogone nay, hara ɗi sappoo e go'o non hiɗi fota. 9 Ɲo'indiraa jowi feere, ɲo'indiraa ɗiya jeegoo kadi feere, sowitaa lefol jeegaɓol ngol telen ka naatirgal. 10 Waɗaa noppoy cappanɗe jowoy ka gaaɓal lefol aranol ngol ka sera kasaare aranere nden, waɗaa kadi noppoy cappanɗe jowoy ka gaaɓal lefol aranol ngol ka sera kasaare ɗimmere nden. 11 Moƴƴinaa kadi pengirɗe cappanɗe jowi sila, pengindiraa noppoy koy. Ko nii jogindirtaa rewirdu ndun, ndu wona huunde wootere. 12 Hara kasaaje rewirdu ndun no ɓurtiri ndu embere feccere majje fii ko hibbitoo ka ɓaawo mayru. 13 Tawa sengo kala ko beru sogonal kasaaje ɗen ɓurdi feƴƴitugol cenɗe ɗiɗi cuddaaje ɗen ka rewirdu e junndi fii ko buuma ndu. 14 Moƴƴinanaa rewirdu ndun ŋaro guri ga'i baali wojjinaaɗi, moƴƴinaa kadi ŋaro guri takasa, dewtaa hoore ɗon.
15 «Moƴƴinanaa rewirdu ndun tugaale, hara ko leɗɗe kasiya ɗe moƴƴiniraa, ɗe darnaa. 16 Hara junndi tugalal kala ko sogone sappo, yanji maggal on sogonal e feccere, 17 hara tugalal kala no mari koyɗe ɗiɗi fotayɗe fii jogondirgol e ɗeya tugaale, hara tugaale rewirdu ndun fow ko non waɗirɗaa. 18 Moƴƴinanaa rewirdu ndun tugaale, tugaale noogay wonira ka sengo ɲaamo. 19 Moƴƴinaa kadi joɗɗinirɗe cappanɗe nay kaalisi fii ko wona e ley ɗen tugaale noogay, tugalal kala joɗɗinirɗe ɗiɗi, hara koyngal kala no tumbii e nder joɗɗinirgal gootal. 20 Sengo nano rewirdu ndun kadi tugaale noogay, 21 wondude e joɗɗinirɗe mun cappanɗe nay kaalisi ɗen, tugalal kala joɗɗinirɗe ɗiɗi. 22 Waɗaa tugaale jeegoo ka ɓaawo rewirdu, ɗun ko telen ka hirnaange. 23 Waɗaa kadi tugaale ɗiɗi ka coɓɓuli ɓaawooji rewirdu ndun, 24 hara hiɗe lombindiraa gila ley haa dow, hoore majje on no haɓɓiraa karewol. Hara ko non ɗen tugaale ɗiɗi wonayɗe ka coɓɓuli ɗiɗi moƴƴiniraa. 25 Ɗun haray tugaale ɗen hawray ɗe jeetati, joɗɗinirɗe majje kaalisi ɗen kadi hawray ɗe sappoo e jeegoo, tugalal kala joɗɗinirɗe ɗiɗi.
26 «Moƴƴinaa kadi gaale jowi leɗɗe kasiya fii tugaale sengo rewirdu ndun goo, 27 e gaale jowi fii tugaale ngoya sengo, e gaale jowi kadi fii tugaale wonayɗe ɗen ka sengo ɓaawo rewirdu ndun, ɗun ko ka hirnaange. 28 Hara gaalal hakkundewal ngal, ɗun ko wonayngal ngal ka tumbo tugaale, ko iwayngal ka ɗe fuɗɗi ɗon yottoyoo ka ɗe haaɗi ɗon. 29 Hoobiraa tugaale ɗen fow kaŋŋe, waɗaa karehoy majje on kadi kaŋŋe, ɗun ko ka gaale ɗen sorata ɗon, hoobiraa gaale ɗen kadi kaŋŋe. 30 Darniraa rewirdu ndun wa mbaadi mun ndi hollaɗaa ka fello ndin.
31 «Moƴƴiniraa kadi wirngallo* gaara baka e gaara mbulu e gaara boɗe wondude e gaara dane mottaaɗi ɗewluɗi, hara serubiinaaji no ɲeɲiraa ɲeeɲal e mun. 32 Wengaa ngon wirngallo e pempe nay leɗɗe kasiya hoobiraaɗe kaŋŋe jooɗiiɗe e hoore joɗɗinirɗe nay kaalisi ɗen wondude e pengirɗe mun kaŋŋe ɗen. 33 Wengaa wirngallo ngon ka ley pengirɗe, ko e nden nokkuure wonde ka ɓaawo wirngallo naadoytaa *kankiranwal seeditoore nden, onsay wirngallo ngon wonanay on heedaango hakkunde nokkuure hormorde nden e nokkuure hormorde mawnde nden. 34 Dewtoyaa kadi omborde nden ka hoore kankiranwal seeditoore nden ka nokkuure hormorde mawnde. 35 Joɗɗinaa taabal ngal ka yeeso wirngallo, waɗaa joɗɗinirde pitilli nden ka sengo nano rewirdu ndun, nde fewtondira e taabal ngal, taabal ngal hikkora ka sengo ɲaamo.