Fii Rewirdu ndun
(25 - 31)
Fii Dokke Mottindiraaɗe fii Rewirdu ndun
25
1 Joomiraaɗo on daalani Muusaa, o wi'i: 2 «Wi'u Banii-Isra'iila'en yo ɓe addanan dokke. Hendanoɗaa mi dokke ɗe ɓernde mo bee e maɓɓe jiɲinnoo ittugol ɗen. 3 E hino dokke ɗe hendotoɗaa e juuɗe maɓɓe ɗen: ko kaŋŋe e kaalisi e sila 4 e gaara baka e gaara mbulu e gaara boɗe e gaara dane e leeɓi be'i 5 e guri ga'i baali wojjinaaɗi e guri takasa e leɗɗe kasiya 6 e nebban ndayginirɗan, e angiri fii nebban maandinirɗan ɗan e fii cuuray uuruɗo on 7 e kaaƴe hittuɗe no wi'ee aljaz'i e kaaƴe lombeteeɗe ɗen ka forooku e lombeteeɗe ɗen ka ŋaro wonayngo ngon ka ɓernde.8 «Ɓe waɗanammi kadi nokkuure hormorteende fii no mi hoɗira hakkunde maɓɓe. 9 Ko wa mbaadi ndi mi hollay-maa ndin tigi moƴƴinirtaa rewirdu ndun e aalaaji huutorteeɗi e mayru ɗin fow.
Fii no Kankiranwal Seeditoore nden Moƴƴinirtee
10 «Ɓe moƴƴinira kankiranwal* ngal leɗɗe kasiya, hara junndi maggal on ko sogone ɗiɗi e feccere, yanji ndin sogonal e feccere, tooweendi maggal on kadi sogonal e feccere. 11 Hoobiraa ngal kaŋŋe laaɓuɗo, nder e ɓaawo, waɗaa gaaɓaaɗe maggal on kaŋŋe haa huttita. 12 Tafanaa ngal noppi nay kaŋŋe, waɗaa ɗi e koyɗe maggal ɗen nay, sengo goo noppi ɗiɗi, ngoya sengo noppi ɗiɗi. 13 Moƴƴinaa gaale leɗɗe kasiya, hoobiraa ɗe kaŋŋe. 14 Sornaa ɗen gaale e ɗin noppi wonɗi ka cenɗe kankiranwal fii ko ngal ƴettiree. 15 Ɗen gaale ko ka noppi kankiranwal ngal luttata, wonaa itteteeɗe. 16 Onsay a tumboyay seeditoore nde mi jonnay-maa nden ka nder kankiranwal.
17 «Moƴƴinaa omborde tafiraande kaŋŋe laaɓuɗo, hara junndi mayre on ko sogone ɗiɗi e feccere, yanji mayre on ko sogonal e feccere. 18 Moƴƴinaa serubiinaaji* ɗiɗi kaŋŋe, hara ko kaŋŋe ɗi tafiraa e seraaji ɗiɗi omborde nden. 19 Waɗaa serubiinaaru goo e sengo goo, nduya wona e ngoya sengo, hara ɗin serubiinaaji no siŋondiri e seraaji omborde nden ɗiɗi woni huunde wootere. 20 Hara serubiinaaji ɗin no fonti gabitanji mun ɗin dow, wiiwi e hoore omborde nden, hara ɗin serubiinaaji no fewtondiri, geece majji on kadi no fewti omborde nden. 21 Ƴettaa seeditoore nde mi jonnete nden, tumbaa ka nder kankiranwal, onsay dewtaa omborde nden ka hoore kankiranwal. 22 Ko ka hoore omborde hakkunde ɗin serubiinaaji ɗiɗi wonɗi ka hoore kankiranwal mi fottata e maa, mi jonne yamirooje ɗe hewtintaa Banii-Isra'iila'en ɗen fow.
Fii no Taabal Bireediije ɗen Moƴƴinirtee
23 «Moƴƴiniraa kadi taabal leɗɗe kasiya, junndi maggal on wona sogone ɗiɗi, yanji maggal on wona sogonal gootal, tooweendi maggal on wona sogonal e feccere. 24 Hoobiraa ngal kaŋŋe laaɓuɗo, waɗanaa ngal gaaɓaaɗe kaŋŋe haa huttita. 25 Moƴƴinanaa ngal tonndu haa huttita, hara tooweendi mayru on ko yeru yanji newre, waɗanaa ndu kadi gaaɓaaɗe kaŋŋe haa huttita. 26 Moƴƴinanaa ngal noppi nay kaŋŋe, siŋaa ɗi e coɓɓuli maggal ɗin nay, hara hiɗi feppondiri e koyɗe ɗen nay. 27 Noppi ɗin wona ka takko tonndu fii ka gaale ko taabal ngal ƴettirtee kon sornee. 28 Moƴƴiniraa gaale ɗen leɗɗe kasiya, hoobiraa ɗe kaŋŋe, ɗe wona fii ko taabal ngal ƴettiree. 29 Moƴƴinaa kadi miranji ɗin e njardukoy koy e lulluuji ɗin e paaniije huutorteeɗe fii sadaka hibbeteeɗo on, hara ko kaŋŋe laaɓuɗo moƴƴinirɗaa ɗi. 30 Waɗaa ka hoore taabal ɗon bireediije ɗe mi weeɓitantee saa'i woo ɗen.
Fii no Joɗɗinirde Pitilli nden Moƴƴinirtee
31 «Moƴƴiniraa joɗɗinirde pitilli kaŋŋe laaɓuɗo, hara nden joɗɗinirde pitilli ko kaŋŋe tafaa: jooɗorde mayre on e darorgal mayre on e tindohoy mayre koy e paaloy piindi mayre koy e piindiiji mayre udditiiɗi ɗin fow no siŋondiri woni huunde wootere. 32 Hara hinde mari caloy jeegoo, sengo goo caloy tatoy, ngoya sengo kadi caloy tatoy. 33 Tawa calun goo no mari tindohoy tatoy nandukoy e piindiiji lawjahi, tindohun kala no mari paalun piindi e piindi udditiindi. Kuma calun kadi no mari tindohoy tatoy nandukoy e piindiiji lawjahi, tindohun kala no mari paalun piindi e piindi udditiindi. Ko nii caloy jeegoo joɗɗinirde pitilli nden fow wa'ata. 34 Hara bindeere joɗɗinirde pitilli nden no mari tindohoy nayoy nandukoy e piindiiji lawjahi, wondude e paaloy piindi mun e piindiiji mun udditiiɗi. 35 Hara paalun piindi gootun no waɗaa e ley calɗi ɗiɗi arani ɗin, paalun piindi gootun e ley calɗi ɗiɗi hikkiiɗi ɗon ɗin, paalun piindi gootun e ley calɗi ɗiɗi sakkitori ɗin, hara calɗi jeegoo yaltayɗi e joɗɗinirde pitilli nden ko non wa'i. 36 Hara paaloy piindi joɗɗinirde pitilli nden e calɗi mun ɗin ko kaŋŋe laaɓuɗo tafiraa siŋindiraa e mayre woni huunde wootere.
37 «Moƴƴinaa lampuuji mayre ɗin jeeɗiɗi, joɗɗiniraa ɗin lampuuji fii no ɗi ndayginira ko woni yeeso kon. 38 Hara kadi ƴawnirkoy mun sarabu koy e paanihoy mun ndoondi koy ko kaŋŋe laaɓuɗo tafiraa. 39 Ko *talanrua wooturu kaŋŋe laaɓuɗo joɗɗinirde pitilli nden e piihoy mun koy fow moƴƴinirtee.
40 «Geraa feere no moƴƴiniraa ɗun wa mbaadi mun ndi hollaɗaa ka fello ndin.