Fii no Alla Ƴettirani Isra'iila Ahadi
24
1 Allaahu on daalani Muusaa, wi'i mo: «An tigi a ƴaway ka min Joomiraaɗo on mi woni ɗon, an e Haaruuna e Nadaabu e Abiihu e mawɓe Isra'iilayankeeɓe cappanɗe njeeɗiɗo. Wonon ka woɗɗitii, sujjon. 2 Ko an Muusaa tun ɓadotoo lan min Joomiraaɗo on, heddiiɓe ɓen kan ɓadotaako lan. Hara kadi jamaa on ƴawdaali e maa.»3 Onsay Muusaa arti, fillitanii jamaa on daaluyeeji Joomiraaɗo on fow e yamirooje makko ɗen fow. Onsay jamaa on jaabodi mo wi'i: «Daaluyeeji ɗi Joomiraaɗo on daali ɗin fow men waɗay.»
4 Ɓawto ɗun Muusaa windi daaluyeeji Joomiraaɗo on fow. O immii kadi bimbi law, o darnoyi layyorde* ka binde fello, o darni ɗon kadi kaaƴe hormorɗe sappoo e ɗiɗi fii bolondaaji Isra'iila ɗin sappoo e ɗiɗi. 5 Onsay o immini sukaaɓe Isra'iilayankeeɓe fii ko waɗa *sadakaaji sunneteeɗi ɗin, e ko hirsana Joomiraaɗo on ga'i fii *sadakaaji mbeldigal. 6 Ɓawto ɗun kanko Muusaa o ƴetti feccere e ƴiiƴan ɗan, o loowi e tindohoy, feccere ƴiiƴan heddiiɗan ɗan o wicci layyorde nden. 7 Onsay o ƴetti deftere ahadi ndin, o jangani nde jamaa on. Kamɓe jamaa on ɓe wi'i: «Ko Joomiraaɗo on daali kon fow men waɗay, men ɗoftoo.»
8 Onsay kanko Muusaa o ƴetti ƴiiƴan ɗan, o wicci jamaa on, e hoore himo wi'a: «E hino ƴiiƴan ahadi ndi Joomiraaɗo on ƴettodi e mon ndin tippude e ɗii daaluyeeji ɗoo fow.»
9 Onsay kanko Muusaa o ƴawdi e Haaruuna e Nadaabu e Abiihu e mawɓe Isra'iilayankeeɓe cappanɗe njeeɗiɗo. 10 Ɓe yi'i Alla Isra'iila* on. Tawi ley koyɗe makko ɗen no wa'i wa ndelo kaaƴe saafira, e wano kammu ngun hentori non. 11 Laatii o fawaali mawɓe Isra'iila ɓen jungo, ɓe punnii Alla, onsay ɓe ɲaami ɓe yari.
12 Kanko Joomiraaɗo on o daalani Muusaa: «Ƴawu ka fello ka mi woni gaa, wonaa gaa. Mi jonne alluuje kaaƴe ɗe mi windi sariya on e yamiroore nden e mun ɗen fii ko jannaa ɓe.» 13 Onsay Muusaa immodi e Yaasuwa wondiɗɗo makko on, kanko Muusaa o ƴawi fello Alla ngon. 14 Kono kanko Muusaa o wi'i mawɓe ɓen: «Habbee men ɗoo haa tuma men ari, men tawti on woo. On wonday ɗoo e Haaruuna e Huuru. Si no woodi ko goɗɗo e mon wullitoo, haray yo o ɓado ɓe.»
15 Onsay kanko Muusaa o ƴawoyi ka fello, duulere nden kadi buumi fello ngon. 16 Mangural Joomiraaɗo on tippii e hoore fello Sinaayi* ngon, duulere nden kadi buumi fello ngon e nder balɗe jeegoo. Ka ɲalaande jeeɗiɗaɓere Joomiraaɗo on noddi Muusaa ka nder duulere. 17 Tawi mangural Joomiraaɗo on no feeɲirani Banii-Isra'iila'en wa yiite ɲaamoowe ka hoore fello ton. 18 Onsay Muusaa naati ka nder duulere, o ƴawi ka fello. Kanko Muusaa o woni ka fello ton balɗe cappanɗe nay jemma e ɲalorma.