23
1 «Wota a rondo haalaaji mehi. Wota a humondir e bonɗo fii wonugol seeditotooɗo hunƴuɗo.2 «Wota ɗuuɗeendi yimɓe ɓen foole haa waɗaa bone. Wota ɗuuɗeendi yimɓe ɓen foole haa selaa peewal ngal e nder ko seeditotoɗaa ka ɲaawoore kon. 3 Wota a sulfinan hay miskiino e nder ɲaawoore.
4 «Si a fottii e nagge maa mbabba gaɲo maa no majji, artiran mo ɗun. 5 Si a yi'ii mbabba gaɲo maa no yanidi e dongal mun, wota a takko feƴƴaa, kono wallito mo rowtirgol mba.
6 «Wota a fannu miskiino goonga e nder ɲaawoore. 7 Wota a ɓado fenaande. Wota a waru mo bonnaa maa feewuɗo ko fii mi jogortaa bonɗo wa feewuɗo.
8 «Wota a jaɓu ngeenaari, ko fii ngeenaari wuminɗinay yi'ooɓe ɓen, ɓoyla konguɗi feewuɓe ɓen.
9 «Wota a ɓittin tuŋarankeejo ko fii onon tigi hiɗon andi no tuŋarankeejo wuuriri, ɓay onon kadi on woniino tuŋarankeeɓe e nder leydi Misira ndin.
Sariyaaji fii Duuɓi Fowteteeɗi ɗin e Ɲalaaɗe Fowteteeɗe ɗen
10 «E nder duuɓi jeegoo, a remay leydi ndin, soɲitaa neema mayri on. 11 Kono ka hitaande jeeɗiɗaɓere a fowtinay ndi, acciraa ndi hoore mayri. Miskinɓe wonɓe e hakkunde jamaa maa on ɲaama ko ndi funnoyta kon, kulle buruure ɗen kadi ɲaama ko ɓen luttinoyta kon. Warraa non kadi ka tutateeriiji maa wiiɲu* e ka zaytuuniije* maa.
12 «A gollay e nder balɗe jeegoo. Kono ɲalaande jeeɗiɗaɓere nden, a fowtoto e mayre, fii no ga'i maa ɗin e mbabbi maa ɗin fowtora, e fii no ɓiɓɓe horɓe maa ɓen e tuŋarankeeɓe ɓen surtinira.
13 «On ɗoftoto ko mi daalani on kon fow. Hara on jantaaki inɗe allaaji goo, wota ɗun nane hay e kundule mon.
Fii Juldeeje Isra'iila ɗen Tati
14 «E nder hitaande nden, a waɗay juldeeje tati e innde an. 15 Teddinaa *Juldeere Bireedi ɗe Aldaa e Lewen nden. E nder balɗe jeeɗiɗi ka saa'i happaaɗo e nder lewru Abiibu ndun ko bireedi ɗe aldaa e lewen ɲaamoton, wano mi yamiri on non, ko fii ko e ndun lewru yaltuɗon Misira. E hoore ɗun, darortaake yeeso an juuɗe mehe. 16 Teddinaa *Juldeere Hoore Dabbunde nden, ɗun ko ko adotoɗaa wa'ude e nder ko remuɗaa ka gese kon. Ka lannoode hitaande nden kadi, waɗaa *Juldeere Coɲital nden, ɗun ko tuma mooɓituɗaa ko golluɗaa ka gese maa kon. 17 E nder hitaande nden kala duhiiɗo aray weeɓitanoo mi laabi tati, min Alla Joomiraaɗo on.
18 «Nde hiɗa hibbanan mi ƴiiƴan sadaka, wota a hibbidu ɗan e ko jillaa lewen. Awa kadi ɓellere ko sakkiɗon fii juldeere an nden kon waltintaake haa bimbi.
19 «Addaa neemaaji ɓuruɗi moƴƴude ɗi adotoɗaa soɲitude ka leydi maa ɗin ka suudu Alla Joomiraaɗo maa on.
«Wota warbir be'un ɓiraaɗan neene mun ɗan.»
Fodaari Joomiraaɗo on fii naatugol leydi Kanaana
20 «Mi imminay malaa'ikaajo yeeso mon fii ko ayna on ka laawol e ko hewtinoya on e ndee nokkuure nde mi eɓɓani on. 21 A hakkilanay e makko, nananaa mo, hara a mettinanaali mo, ko fii o yaafoytaako bonnere mon nden, ɓay innde an nden no e makko. 22 Kono si a nananii mo moƴƴa, a waɗii ko mi wi'u maa kon fow, haray mi wonay gaɲo ayɓe maa ɓen e liddotooɗo liddotooɓe ma ɓen. 23 Malaa'ikaajo an on wonay yeeso maa, o ardo maa ka Amoriyankeeɓe ɓen e ka Hissiyankeeɓe ɓen e ka Feriiziyankeeɓe ɓen e ka Kanaaniyankeeɓe ɓen e ka Hiwiyankeeɓe ɓen e ka Yebuusiyankeeɓe ɓen, mi monta fii maɓɓe kadi. 24 Wota a sujjanoy allaaji maɓɓe ɗin, wota a rewu ɗi kadi, hara kadi a jokkaali kuuɗe maɓɓe ɗen, liɓoyaa allaaji maɓɓe ɗin, muncaa kadi hormorɗe maɓɓe kaaƴe ɗen.
25 «Ko min Alla Joomiraaɗo mon on rewoyton, ɗun mi waɗoyay barki e ɲaametee mon on e ndiyan mon ɗan, mi pottina ɲawu hakkunde mon. 26 E nder leydi mon ndin, heɓoytaako yanu reedu maa debbo mo jiidotaako, awa kadi mi juutinoyay balɗe mon ɗen. 27 Mi hikkina kulol an ngol yeeso mon, mi waɗa jiiɓoldu e hakkunde kala jamaa mo yahoton ka mun, mi waɗa haa ayɓe mon ɓen fow doga on. 28 Mi immina ɲaaki yeeso mon ɗi raɗoo Hiwiyankeeɓe ɓen e Kanaaniyankeeɓe ɓen e Hissiyankeeɓe ɓen, ɓe doga on. 29 Kono wonaa e nder hitaande wootere mi raɗotoo ɓe, ɓe doga on, kulol wota leydi ndin caabu, e wota kulle buruure ɗen ɗuuɗu ɗe dartoo on. 30 Ko seeɗa seeɗa mi raɗorta ɓe yeeso mon haa ɗuuɗanon halorgol leydi ndin. 31 Mi waɗay keerol leydi mon ndin gila ka *Baharu Boɗeejo haa hewtoya ka Baharu Filistiyankeeɓe ɓen, e gila ka Wulaa haa hewtoya ka Maayo Furaatiwol, ko fii mi wattay yimɓe ndin leydi e juuɗe mon, raɗoɗon ɓe e mayri. 32 Wota on ƴettodoy e maɓɓe ahadi maa e allaaji maɓɓe ɗin. 33 Ɓe hoɗataa ka leydi mon, kulol wota ɓe waɗin on junuubu e an, rewon allaaji maɓɓe ɗin, ɗun wonana on pircol.