22
1 «Si ngujjo nanga no fusa suudu, o piyee haa o maaya, haray mayde on nden fawaaki hay gooto. 2 Si tawii non hari naange ngen fuɗii si o waraa, haray waruɗo mo on fawike wonkii makko kin. «Ngujjo no haani yoɓitude beru ko o wujji kon. Si tawii non o maraa hay huunde, haray ko yo o yeeyite ko o wujji kon yoɓitee.
3 «Si tawii kon ko o wujji yiitaama e juuɗe makko hara no wuuri, woni ko ngaari nagge maa mbabba haa e dammol, haray o yoɓitiray ɗun sowannde.
4 «Si goɗɗo ornirii daabeeji mun e ngesa maa e tutateeri, o ronka ɗi aynude haa ɗi bonna ngesa goɗɗo, haray o yiltay mo ko ɓuri kelɗude kon ka ngesa makko e ka tutateeri makko.
5 «Si yiite fuutike e geenal haa nge sunnii tuganɗe goɗɗo maa ko o fewndini wa'ugol maa ngesa mban fow, haray wonɗo sabu yiite ngen on yoɓay ko nge bonni kon.
6 «Si goɗɗo halfinii ɲokondo mun kaalisi maa keyee goo, ɗun wujjee ka suudu makko, ngujjo on nangaa, haray ngujjo on yoɓitiray ɗun sowannde. 7 Si ngujjo on non nangaaka, haray jom suudu ndun waɗay Alla seedee wonde wonaa kanko ƴetti ko ɲokondo makko on halfini mo kon.
8 «E nder kala huunde yeddondiraande fii mun, woni ko nagge maa mbabba maa dammol maa conci maa keyee majjuɗo, hara mo kala e maɓɓe no wi'a ko kaɲun jeyi, haray yo ngal yeddondiral maɓɓe ɗon hewtine ka Alla. Mo feloore Alla nden fawii e mun woo, haray fawike mo yoɓitugol ɲokondo makko on sowannde ko ɓe yeddondiri fii mun kon.
9 «Si goɗɗo halfinii ɲokondo mun mbabba maa nagge maa dammol maa mummunte goo, ɗun ara e maayude maa teral mun hela, maa wujjee hara hay gooto yi'aali, 10 haray yo woondirgol innde Joomiraaɗo on wonu hakkunde maɓɓe, halfinanooɗo mummunte on woonda wonde wonaa kanko fawi jungo e ko ɲokondo makko on halfini mo kon, jom mummunte on kadi jaɓa nden woondoore, e hoore ɗun halfinanooɗo on yiltataa oya. 11 Kono si tawii on mummunte wujja e juuɗe makko, haray o yiltay jom mummunte on. 12 Si tawii non mummunte on ko seekitaaɗo, yo o hollu seedee wonde mummunte on ko seekitaaɗo, haray o yoɓataa.
13 «Si goɗɗo luɓike ɲokondo mun mummunte, teral on mummunte hela maa mummunte on maaya e ɓaawo on mo o luɓii, haray o yoɓay. 14 Si tawii non ko e tawnde jom mun, haray o yoɓataa. Si tawii-le ko coggu o luɓornoo, haray coggu luɓoraangu ngun yonii.
Fii Teddingol Alla, Teddina Neɗɗanke
15 «Si goɗɗo hiilii curbaajo mo ƴamaaka, o waalidii e makko, haray o ittay teŋe makko on, e hoore ɗun o ƴettay mo kadi. 16 Si tawii non ben jiwo on salike o ƴetta mo, haray ko kaalisi beru ko curbaajo teŋirtee o yoɓata.
17 «Wota on accu debbo ɲanneejo wuura.
18 «Kala waaliduɗo e mummunte ko donkinirteeɗo mayde.
19 «On mo ittani allaaji sadakaaji, hara wonaa Joomiraaɗo on, haray o laatike halkaaɗo.
20 «Wota a huutor tuŋarankeejo maa ɓittinaa mo, ko fii onon kadi on laatinoke tuŋarankeeɓe e nder leydi Misira.
21 «Wota on ŋannan keynguujo maa aliyatiimaajo few. 22 Si on ŋannanii ɓe haa ɓe fesii e an, mi nanay fesaango maɓɓe ngon, 23 siccere an nden memminoo, mi warira on kaafa. Onsay rewɓe mon ɓen onon kadi wonay keynguuɓe, ɓiɓɓe mon ɓen wona aliyatiimaaɓe.
24 «Si a ɲawlii goɗɗo e jamaa an on kaalisi, hara ko miskiino mo wonduɗaa, wota a wa'an mo wa ɲawluɗo, hara a happanaali mo tono. 25 Si a tolmanii ɲokondo maa dolokke, haray jonnitu mo ado naange ngen mutude, 26 ko fii ko on tun o mari ko o suddoo e ko o ɓornoo. Si hinaa ɗun ko honɗun o waalodata? Si sifa on woyti e an, mi nananay mo, ko fii ko mi Yurmeteeɗo.
27 «Wota a hoynu Alla, maa huɗaa yeesoojo jamaa maa on.
28 «Wota a nennu ittangol lan farillaaji e ko soɲitataa kon e ko suppitataa kon.
«Weeɓitanaa mi ɓiɓɓe maa worɓe dikkuruuɓe ɓen. 29 Warraa non kadi ka na'i maa e ka dammi maa. Dikkuruuji ɗin wonda e neene mun balɗe jeeɗiɗi, ka ɲalaande jeetataɓere weeɓitanaa mi ɗi.
30 «Wonanon mi yimɓe laaɓuɓe, hara on ɲaamaali teewu mo kullun buruure seekiti. Sifa on teewu on buganto bareeji ɗin.