Sariyaaji fii Jiyaaɓe
21
1 Joomiraaɗo on daalani kadi Muusaa: «E hino sariyaaji ɗi waɗantaa ɓe ɗin:2 «Si goɗɗo soodii maccuɗo Aabirayankeejo, haray yo on kurkano mo duuɓi jeegoo. Ka hitaande jeeɗiɗaɓere, o hetta hoore makko o hoota, hara o yoɓaa hay huunde. 3 Si tawii ko kanko tun soodanoo, haray ko kanko tun hootata. Si tawii non himo wondunoo e ɓeyngu, haray o hootiday e ɓeyngu makko. 4 Si tawii non ko jom makko jombani mo ɓeyngu, on debbo ara e jibinande mo ɓiɓɓe worɓe maa rewɓe, haray on debbo e ɓiɓɓe mun ɓen wontanii jom makko, haray ko kanko tun hootata.
5 «Si tawii non on maccuɗo wi'ii wonde: ‹Miɗo yiɗi jom an e ɓeyngu an e ɓiɓɓe an ɓen, mi hettataa hoore an mi hoota›, 6 haray yo jom makko weeɓitan mo Alla, o ɓanna mo ka baafal maa ka kippal, o ƴetta jalɓal, o tufa mo nowru ndun, on maccuɗo kurkanoo mo haa poomaa.
7 «Si goɗɗo yeeyii ɓiɗɗo mun jiwo fii ko wona korɗo, haray sifa on korɗo hootirtaa wa maccuɓe ɓen. 8 Si on korɗo non mettitii jom mun, ƴettannooɗo mo hoore mun on, haray yo o sottu mo. Kono haray o newnanaaka yeeyitugol mo jananɓe ɓay o hollaali jikke. 9 Si tawii non o ƴettanii mo ɓiɗɗo makko gorko, haray o jogoray mo kanko jiwo on wano jiwɓe ɓen haani jogoreede non. 10 Si tawii non o ƴettii debbo goo, haray o ɗuytantaa arano on hay huunde e ɲaametee maa conci maa ɲalaaɗe ko woowani mo kon. 11 Si o waɗanaali mo ɗin piiji tatii non, haray kanko debbo on himo waawi hootude hara o yoɓaa hay huunde.
Sariyaaji fii Masiibo e Waru Hoore
12 «On mo piyi goɗɗo haa wari mo, ko o donkinirteeɗo mayde. 13 Si tawii non o tewaaki, hara ko Alla hawrindini mo e mun, haray mi toɗɗanto ma nokkuure ka ontigi waawoyta fattoyaade. 14 Kono si goɗɗo maranii ɲokondo mun ngayngu haa waririi mo ƴoyre, hay si ko ka layyorde* an o fattoyii, haray yaltinee mo ton waron.
15 «On mo piyi kadi ben mun maa yumma mun, ko o donkinirteeɗo mayde.
16 «On mo wujji neɗɗo, woni o yeeyu mo maa si o yiita e juuɗe makko, on kadi ko donkinirteeɗo mayde.
17 «On mo huɗi ben mun maa yumma mun, ko o donkinirteeɗo mayde.
18 «Si yimɓe yeddondirii haa goɗɗo e maɓɓe fiɗii oya hayre maa kurfii mo, hara piyaaɗo on maayaali, kono himo haani waalaade, 19 si tawii himo waawi immaade jinda ka yaasi hara ko yo o tuggo, haray hay huunde fawaaki piyuɗo mo on si wonaa jonnitugol mo beru ko o gollaynoo kon e ɲawndugol mo haa o sella.
20 «Si goɗɗo kadi luuborii maccuɗo mun maa korɗo mun weduru haa on maayii e juuɗe makko, haray ko yo on kadi yottane. 21 Kono si tawii e nder ɲallal maa balɗe ɗiɗi kanko piyaaɗo on o immike, haray o yottantaake, ko fii ko o kaalisi jom makko.
22 «Si piirooɓe kadi hawrii e debbo reeduujo haa ɗun wonii sabu firtagol makko, kono hara bone goo heɓaali mo, ɓen donkinirte yoɓineede alamaani beru ko moodibbo debbo on happi woo, ɗun non yoɓaama woo e dow yamiroore ɲaawooɓe ɓen. 23 Kono si tawii bone waɗii, haray ko wonkii yoɓitirtee wonkii, 24 yiitere e yiitere, ɲiire e ɲiire, jungo e jungo, koyngal e koyngal, 25 sumoode e sumoode, barme e barme, ɗalde e ɗalde.
26 «Si goɗɗo uttike maccuɗo mun maa korɗo mun e yiitere haa o bonnii mo yiitere nden, haray o jonnitay on hoore makko lonto yiitere makko nden. 27 Si tawii kadi o solu ɲiire maccuɗo makko maa korɗo makko, haray o jonnitay on kadi hoore mun lonto ɲiire makko nden.
28 «Si ngaari nagge hawii gorko maa debbo haa ontigi maayii e ɗun, haray ndin ngaari ko fiɗeteendi kaaƴe haa ndi maaya, teewu mayri on kadi ɲaametaake, haray non hay huunde fawaaki jom ngaari ndin. 29 Kono si tawiino ndin ngaari no woowunoo hawude, tawa jom mayri andinanooma, kono o jogaaki ndi, si ndi aru e warude gorko maa debbo, haray yo ndin ngaari fiɗe kaaƴe haa ndi maaya, jom mayri kadi ko wareteeɗo. 30 Si tawii non ɓe happanii jom ngaari ndin ko yoɓetee fii sottugol wonkii makko kin, haray o yoɓay ko o happanaa kon fow. 31 Si ndin ngaari aru e hawude ɓiɗɗo goɗɗo maa jiwo makko, haray ko on sariya gooto huutortee. 32 Si tawii-le ko maccuɗo maa korɗo ndin ngaari hawi, haray jom makko yoɓete tammaaji kaalisi cappanɗe tati, ngaari ndin kadi fiɗiree kaaƴe haa ndi maaya.
33 «Si goɗɗo jasii woyndu, ronka ndu waɗande omborde, maa udditii woyndu, ronka ndu ombude, haa nagge maa mbabba yana nder ton, 34 haray jom woyndu ndun yiltay jom mummunte on kaalisi, mummunte mayɗo on wontana mo.
35 «Si ngaari goɗɗo jurike ngaari ɲokondo makko haa ndin maayii, haray ngaari wuurundi ndin yeeyitete, ɓe senda kaalisi on, ɓe senda kadi teewu ngaari maayundi ndin. 36 Si tawii non no andanoo ndin ngaari no woowi hawude, hara jom mayri jogaaki ndi, haray jom ndin ngaari yoɓitiray ngaari maayundi ndin ngaari goo, ngaari maayundi ndin wontana mo.
Sariya Waɗaaɗo fii ko Goɗɗo Jeyi
37 «Si goɗɗo wujjii nagge maa dammol, woni o hirsu maa o yeeyi, haray o yoɓitiray nagge ngen kolce jowi, dammol ngol kadi dammi nay.