Yamirooje ɗen Sappo
20
1 Onsay Allaahu on daali ɗii daaluyeeji ɗoo, o wi'i:2 «Ko min woni Alla Joomiraaɗo maa on, on yaltinɗo ma leydi Misira e nder ndii leydi njaggu.
3 «Wota a heɓu alla goo si wonaa min.
4 «Wota a moƴƴinan hoore maa sanamu maa ko nanditi e goɗɗun ko woni ka kammuuli dow maa ko woni ka hoore leydi maa ko woni ka nder ndiyan wonɗan ka nder leydi. 5 Wota a sujjan ɗi maa rewaa ɗi, ko fii min Alla Joomiraaɗo maa on ko mi Allaajo nawluɗo, yagginoowo ɓiɓɓe aɲuɓe lan sabu junuubaaji baabiraaɓe mun haa e jamaanu tataɓu e jamaanu nayaɓu, 6 kono holloowo ɓen yiɗuɓe lan, jaɓi yamirooje an ɗen, giggol sella-findewol haa e jamaanuuji guluuje.
7 «Wota a jogor innde Alla Joomiraaɗo maa on meere, ko fii Joomiraaɗo on ronkataa donkinde on jogorɗo innde makko nden meere.
8 «Maanditoɗaa kadi ɲalaande fowteteende nden, horminaa nde. 9 A gollay golleeji maa ɗin fow e nder balɗe jeegoo, 10 kono ɲalaande jeeɗiɗaɓere nden ko ɲalaande fowteteende Alla Joomiraaɗo maa on. Wota a gollu golle woo nden ɲande, woni an, woni ɓiɗɗo maa, woni jiwo maa, woni maccuɗo maa, woni korɗo maa, woni daabeeji maa ɗin, woni koɗo wonɗo ka maa. 11 Ko fii ko e nder balɗe jeegoo Joomiraaɗo on tagi kammu ngun e leydi ndin e baharu on e kala ko woni e mun. O fowtii ka ɲalaande jeeɗiɗaɓere. Ko ɗun waɗi si Joomiraaɗo on waɗi barki e ɲalaande fowteteende nden, o waɗi nde hormorteende.
12 «Teddinaa yumma maa e ben maa fii yo balɗe maa ɗen juutu ka hoore leydi ndi Alla Joomiraaɗo maa on okku-maa.
13 «Wota a ittu hoore.
14 «Wota a jeenu.
15 «Wota a wujju.
16 «Wota a seedito fenaande e hoore ɲokondo maa.
17 «Wota a himman suudu ɲokondo maa, maa himmanaa debbo ɲokondo maa, maa himmanaa maccuɗo makko maa korɗo makko, maa himmanaa nagge makko, maa mbabba makko, maa hay huunde e ko ɲokondo maa jeyi.»
18 Tawi jamaa on fow no nanude hito parɲitte ɗen e hito alaadu ngaari baali ngin, hiɓe yi'ude maƴanɗe ɗen e fello wongo suurude ngon. Ɓay jamaa on yi'ii ɗun ɓe woni e diwnugol, ɓe daroyii ka woɗɗitii, 19 ɓe ewnii Muusaa, ɓe wi'i mo: «An tigi yewtu men, men jaɓante, kono wota Allaahu on tigi daalan men, kulol wota men maayu.» 20 Muusaa kadi jaabii ɓe, wi'i: «Wota on hulu! Ko addi mo kanko Alla ko fii ndarndagol on, e fii yo on hulu mo, hara on waɗaali junuubu.» 21 Tawi jamaa on no darii ka woɗɗitii, kono Muusaa kaɲun ɓadii duulere niɓɓitunde ka Alla wonnoo ɗon.
Fii no Layyorde nden Moƴƴinirtee
22 Onsay Joomiraaɗo on daalani Muusaa, wi'i mo: «A wowliranay nii Banii-Isra'iila'en, wi'aa ɓe: ‹On yi'ii wonde mi yewtii on iwrude ka kammu. 23 Wota on moƴƴin allaaji goo ko ɓeyditon e an, wota on moƴƴinan hoore mon allaaji kaalisi maa kaŋŋe. 24 On moƴƴinanay lan layyorde* leydi ka itton na'i e dammi *sadakaaji sunneteeɗi e *sadakaaji mbeldigal. Nokku kala ka mi andintini fii innde an nden, mi aray e mon mi waɗa barki e mon. 25 Si tawii on moƴƴinay layyorde kaaƴe, haray wota on moƴƴinir nde kaaƴe lesaaɗe. Ko fii si on lesirii kaaƴe ɗen aalaaji, haray on tuuninii nde. 26 Wota on ƴawir ka layyorde an ɓorɗi, fii wota on wirto e hoore mayre.»