Fii no Alla Ƴettirani Banii-Isra'iila'en Ahadi
(19-24)
Fii no Jamaa Isra'iila on Hewtiri Sinaayi
19
1 Ka lewru tammuru gila Banii-Isra'iila'en yalti leydi Misira, ko nden ɲande ɓe hewti ka wulaa Sinaayi*. 2 Ɓay ɓe iwii Raafidiima, ɓe hewti ka wulaa Sinaayi. Kamɓe Isra'iila'en ɓe daakii ka wulaa ɗon ka binde fello. 3 Onsay kanko Muusaa o sutori ka Alla. Tun Joomiraaɗo on noddi mo ka hoore fello, wi'i mo: «E hino ko haalantaa suudu Yaaquuba ndun, ɗun ko Banii-Isra'iila'en, wi'aa ɓe wonde: 4 ‹Onon tigi on yi'ii ko mi waɗi Misirayankooɓe ɓen kon e no mi addiri on ka an ɗoo wa wonɓe e hoore gabitti simbinre. 5 Jooni si on heɗike daaluyeeji an ɗin moƴƴa, on teddinii ahadi an ndin, haray on wonii ɓe an tigi e hakkunde ɗiya leƴƴi fow. Fii kala ko min jeyi aduna on fow, 6 kono onon on wonanay lan laamateeri *yottinooɓe sadaka ka Alla, laatoɗon kadi leɲol laaɓungol.› Ko ɗii daaluyeeji ɗoo yewtoytaa Banii-Isra'iila'en.»7 Onsay Muusaa arti nodditi mawɓe jamaa on, o hewtini ɓe daaluyeeji ɗi Joomiraaɗo on yamirnoo mo ɗin fow. 8 Onsay jamaa on fow fondidi, wi'i: «Ko Joomiraaɗo on daali kon fow men waɗay.» Muusaa kadi hewtini Joomiraaɗo on konguɗi jamaa on. 9 Joomiraaɗo on wi'i kadi Muusaa: «Mi aroyay e maa e nder duulere ɓurunde tekkude, fii yo jamaa on nanu nde miɗo yewte, fii kadi yo ɓe hoolo ma haa poomaa.» Muusaa hewtini Joomiraaɗo on konguɗi jamaa on.
10 Onsay Joomiraaɗo on wi'i Muusaa: «Yiltito ka jamaa on woni ton, waɗanaa mi ɓe feere hande e jango, awa kadi yo ɓe wuppu conci maɓɓe ɗin. 11 Ɓe hebilanoo ɲalaande tammere nden, ko fii ka ɲalaande tammere Joomiraaɗo on jippoto ka fello Sinaayi e tawnde jamaa on fow. 12 Waɗanaa jamaa on keerol e sera fello ngon haa huttita, wi'aa ɓe yo ɓe reeno e ƴawugol ka fello, maa hay meemugol binde maggo. Kala meemuɗo fello ngon ontigi donkinirte mayde, 13 o fawetaake jungo, kono o fiɗete kaaƴe maa o tufiree ndagaaje. Ɗun non woni mummunte maa neɗɗanke, ontigi maa ɗuntigi daɗataa mayde. Kono nde alaadu ngaari baalii ngin wuttaa woo, ɓe ƴawoyay ka fello.»
14 Onsay Muusaa jippii ka fello, ari tawti jamaa on. O waɗi ɓe feere, kamɓe kadi ɓe wuppi conci maɓɓe ɗin. 15 O wi'i jamaa on: «Hebilee fii ɲalaande tammere nden, hara on ɓadaaki debbo woo.»
16 Ka ɲalaande tammere bimbi, parɲitte e maƴanɗe waɗi, duulere tekkunde woni ka hoore fello. Hito tiiɗungo alaadu ngaari baalii ngin kadi nanii haa jamaa wonɗo ka daaka on fow woni e diwnugol. 17 Onsay Muusaa yaltini jamaa on ka daaka fii fottoygol e Alla. Ɓe wonoyi ka ley fello. 18 Tawi fello Sinaayi ngon fow ko curki, sabu ko Joomiraaɗo on jippori yiite e hoore maggo kon. Tawi kin curki no suurira wa curki beembal yiite, tawi kadi fello ngon fow no dimboo ko tiiɗi. 19 Tawi kadi hawa alaadu ngaari baalii ngin no ɓurtude tun tiiɗude. Onsay Muusaa wowli, Allaahu on jaabori mo farɲiterea. 20 Joomiraaɗo on jippii ka hoore fello Sinaayi, o noddi Muusaa ka hoore fello, kanko Muusaa o ƴawoyi. 21 Joomiraaɗo on daalani Muusaa, wi'i mo: «Jippo, hajoɗaa jamaa on kulol wota ɓe yawtu keerol ngol fii ndaarugol Joomiraaɗo on haa buy e maɓɓe heddoo e mun. 22 Yo yottinooɓe sadaka ɓadotooɓe Joomiraaɗo on ɓen tigi waɗanan hoore maɓɓe feere, kulol wota Joomiraaɗo on wubban ɓe. 23 Muusaa jaabii Joomiraaɗo on, o wi'i: «Jamaa on waawataa ƴawude ka fello Sinaayi gaa, ko fii hari a hajike men fii ɗun, wi'uɗaa yo mi waɗu keerol ka fello, mi hormina ngo kadi.»