Haala nafaa gollirde ciinal
11
1 Neldaa nyaamdu maa dow maayo,sabo si juutii neeɓii fu a hewtowan barke majjum.
2 Peccaa jawdi maaɗa,
njeɗaa yimɓe njeɗɗo naa njeetato
sabo a anndaa bonanda garoowo dow leydi.
3 Si duule ɓawlinii fu,
ƴuwoonde toɓan dow leydi.
Si lekki saamii to ki huccitii fu,
wo toon ki heddotoo,
nde wo soɓɓiire, nde wo horɗoore.
4 Ndaaroowo henndu aawataa,
ndaaroowo duule du taƴataa.
5 No a anndiraa to henndu fonndii noon,
maa du, no ɓinngel mawnirta ley reedu innum,
noon du walaa no anndirtaa golle Laamɗo taguɗo huunde fuu oon.
6 Si weetii fu aawaa aawre maa,
si hiirii du taa ŋottin juuɗe maa,
sabo a anndaa ndiye woni puɗoori,
ndii ɗo naa ndii to,
naa yalla ndi fuu ndi wooɗan.
Haala wuurdude no haaniri
7 Jayngol na muuyni,
gite du na ceyoroo yi'ude naange.
8 No duuɓi neɗɗo poti ɗuuɗude fu,
weltoo haddi majji fuu,
de taa yeggita nyalaaɗe nimre ɗeen du na keewi,
ko waroyta ɗuum kaa fuu wo ɓolum.
9 Hey jokolle, mbeltoɗaa ley njokollaaku maaɗa fuu,
njokkaa ko weli ɓernde maa
e ko gite maa nji'i na njiɗi fuu,
ammaa taa njeggitaa
Laamɗo kiitotooɗo oon ƴamoyte ko ngaɗuɗaa fuu.
10 Taa mettinaa ɓernde maa,
taa tampinaa terɗe maa,
sabo njokollaaku e semmbe muuɗum fuu wo ɓolum tan.