10
1 Buubi baatuɗi na mbonna uurngol nebbam,noon puuyndam seeɗa du bonnirta hakkillo e teddeengal.
2 Ɓernde hakkilante yaaran ɗum to wooɗi,
ɓernde bonɗo du yaara ɗum to boni.
3 Fay no puuyɗo yaarata dow laawol noon wo rafi hakkillo,
ina holla yimɓe fuu puuyndam mum.
4 Si hooreejo tikkanii maa fu,
taa dillu nokku maa,
sabo heesindaare na sawra boofi mawɗi.
5 Inan masiiba mo njiimi ley sorndu naange ndu,
boofol ƴuurungol to hooreejo:
6 fuuyɓe toownete nokkuuje ɗuuɗɗe,
de tedduɓe leeƴinee.
7 Mi yi'ii maccuɓe na mbaɗɗii pucci hono ɓiɓɓe laamu,
de ɓiɓɓe laamu na njaha e koyɗe hono no maccuɓe noon.
8 Basoowo ngayka saaman ley makka,
liɓoowo kokuwol du, mboddi ŋatan ɗum.
9 Lakkitoowo kaaƴe nawnoto,
noon cehoowo leggal du nawnirta hoorem.
10 Si hunnduko jammbere mettii fu,
sanaa semmbe tawee,
de wo hakkillo waddata jaalagol.
11 Si mboddi jom sirri ŋatii fu,
walaa fuu ko ndi nafata jom sirri oon.
12 Haalaaji hakkilante wo moƴƴere,
ammaa ɗi puuyɗo ɗiin na kalka ɗum.
13 Fuɗɗoode haala mum wo puuyndam,
cakitte makka wo kaanɗi bonɗi.
14 Haalaaji puuyɗo na keewi du.
Walaa annduɗo ko finata jaango.
Moy waawi hollude mo ko waroyta caggal makko?
15 Gollal puuyɗo tampinta ɗum,
o anndaa fay no o naatirta wuro.
16 Wayyoo, bone woodanii leydi ndi suka laamii,
de ɓiɓɓe laamu mayri na mbeltoo gilla weeti.
17 Barke woodanii leydi ngoodundi kaananke dimo
de ɓiɓɓe laamu mayri na nyaama wakkati kaanɗo
faa keɓa semmbe wanaa faa keɓa njaram.
18 Si neɗɗo na hoyfi fu, kummbudi suudum wo saaman.
Si juuɗem na njaasi du, suudum wo si'an.
19 Nyaamndu na wadda mbelirka, njaram du na seyna,
de buuɗi kaa na kumta huunde fuu.
20 Taa njennaa kaananke fay ley miilo maa,
Taa kuɗaa jom jawdi ley suudu maa to pukkotoɗaa,
sabo foondu na waawi yaarande ɗum haala maa,
fiirooru na waawi yaarande ɗum kabaaru majjum.