Haala cakitte yimɓe
9
1 Ɗum fuu mi miilake de taykiimi dartiiɓe e hakkilanteeɓe e ko ngaɗata ɗuum wonaanaa e junngo Laamɗo. Neɗɗo anndaa yalla hawran e njinngu naa e nganyaandi, faamataa ko waroyta yeeso muuɗum. 2 Yimɓe fuu wo cakitte goote,dartiiɗo e oonyiiɗo,
lobbo e bonɗo,
laaɓuɗo e tuunɗo,
cakkoowo e mo sakkataa.
Lobbo oon ndaardataakenaa bonɗo,
kunaniiɗo Joomiraaɗo du hono mo hunanaaki ɗum.
3 Wo ɗum bonnde waɗeteende ley sorndu naange ndu, cakitte goote ngoodanii yimɓe fuu. Wooɗi du, ɓerɗe tagaaɓe keewaanaa bonanda, kaanɗi ina ngoni ley ɓerɗe muɓɓen wakkati mbuuri ndeen de caggal ɗuum kawra e maayde.
4 Buurɗo fuu na woodi jikke, sabo fay ɓoosaaru wuurndu na ɓuri laddeeru waatundu.
5 Buurɗo fuu na anndi wo maayan,
ammaa walaa ko maayɗo anndi,
walaa du mbarjitaari ndi heɓata katin,
weeti fu wo ɓeydan yeggiteede.
6 Njinngu maɓɓe e nganyaandi maɓɓe e kiram maɓɓe fuu timmii,
ɓe ngalaa ngeɗu e ko waɗetee ley sorndu naange ndu katin.
7 Njahaa, nyaamiraa nyaamri maa seyo, njardaa njaram maaɗa lamminaaɗam e ɓernde welnde, sabo noon Laamɗo muuyi ngaɗaa. 8 Wakkati fuu ɓornoɗaa kolte maa lobbe, de uurnaa hoore maa faa uuraa sanne. 9 Mbeltodoɗaa e deeka mo njiɗɗaa ley nyalaaɗe nguurndam maa ɓolam ɗe Laamɗo hokki ma ley sorndu naange ndu, nyalaaɗe maaɗa ɓole ɗeen. Sabo ɗuum woni ngeɗu ngu kokkaɗaa ley nguurndam maa e golleeji maa tampiriiji ley sorndu naange ɗiin. 10 Ko ngollataa ɗuum, ngolliraa ɗum semmbe maa, sabo saabeere to ponndiɗaa toon, golle ngalaa, dabare walaa, anndal walaa, hakkilantaaku du walaa.
11 Mi ndaarii goɗɗum katin ley sorndu naange ndu:
tawumi wanaa waaƴiɗinɓe ndaɗata ley doggudu,
wanaa semmbinɗinɓe njaalotoo konu,
wanaa hakkilante'en njogii neema,
wanaa jom'en paamal ngoodi jawdi,
wanaa jom'en anndal kinnetee,
ɗum fuu sanaa nde wakkati e saa'a majjum wari.
12 Si goonga neɗɗo anndaa ko doomi ɗum.
No liingu e jammbuure,
maa no foondu e tuugol,
hono noon ɓiɓɓe Aadama du tuufinirtee wakkatiiji bonɗi,
caamooji dow muɓɓen wakkati gooto.
No hakkillo taykortaake
13 Wooɗi du, mi yi'ii ley sorndu naange no hakkilantaaku gollirta. No njiirumi ɗum noon wo huunde mawnde. 14 Ina woodunoo ngalluure famarde nde heewaa yimɓe, de kaananke jom semmbe wari fiilii nde, ƴoli leydi waɗi ƴeeŋirɗe, naati, habdi e mayre. 15 Na woodunoo du gorko talkaajo hakkilante ley wuro ngoon, de kanko hisiniri ngo hakkilantaaku makko. Ammaa fay gooto miccataako talkaajo oon. 16 Ndeen mbiimi: «Jaka hakkillo na ɓuri semmbe», ammaa hakkillo talka taykataake, haala muuɗum hettintaake.
17 Haalaaji hakkilante leeƴuɗi
ina ɓuri peekaali kaananke ley yimɓe fuuyɓe.
18 Hakkillo na ɓuri kaɓitirɗe konu,
ammaa bonɗo gooto na bonna kujje lobbe keewɗe.