Banndi
Ko dewtere nde woni
Dewtere «Banndi» ley Haala Laamɗo wo ndesaari hakkillo. Suleymaanu kaananke Israa'iila kam moƴƴini keewal banndi ɗiin. Laamɗo hokki mo hakkillo e caral manngal ngal hono mum walaa. Suleymaanu kaananke winndi ko ɓuri haalaaji hakkilanteeji ujunaaje tati e ko ɓuri jimi ujunere.
Suleymaanu oon winndi banndi keewɗi ley dewtere Laamɗo. De goɗɗi majji wo haalaaji Aguur, goɗɗi katin wo tindinooje inna Lemuwiila, fahin goɗɗi du wo haalaaji jom'en hakkillo feere. Hesekiya kaananke Yahuudiya yamiri banndi Suleymaanu goɗɗi kawrinaa ngaɗaa dewtere wootere.
Dewtere nde na holla en hulude Joomiraaɗo woni puɗɗam anndal. Inde janngina en no laawol hakkillo e laawol puuyndam ceediri, inde holla en du no timmoode jokkuɗo laawol fonnditaare e jokkuɗo oonyaare ceediri.
Hakkillo goongalaawo to Laamɗo ƴuurata. Ley dewtere nde, si wi'aama «hakkillo» naa «caral» naa «anndal» fu, wanaa baawɗe ƴuuruɗe e miilo tagaaɓe wi'aa. Ɓe ɗum haalata haala muɓɓen ngoni yimɓe laaɓuɓe e saahiiɓe hulooɓe Laamɗo, jokkuɓe laawol muuɗum. Katin si wi'aama «puuyɗo» naa «mo ƴoƴaa» wanaa mo walaa anndal naa kaaŋaaɗo wi'aa. Mo ɗum haalata haala mum dey, wo caliiɗo ko Laamɗo wi'i, jeebiiɗo ko haani waɗeede.
Miɗen ŋaaroo Laamɗo watta annoora ley nguurndam mooɗon nde janngoton dewtere nde. Aamiina!
Banndi