Dewtere
Tindinoowo
Kabaaru dewtere Tindinoowo
Dewtere Tindinoowo ina jogii miilooji neɗɗo jom hakkillo ji'uɗo kujje keewɗe e ley nguurndam muuɗum. Imo ndaara adunaaru, de ɓernde makko metti e dow ko waɗetee.
Yimɓe na torrondira de waawtuuji sariya goonga walaa, toonyaaɓe keɓataa goonga e wullitaango muɓɓen. Yimɓe, gollal muɓɓen wo naawngal dooleyal, wooɗi du ɓii Aadama sakitortaako nafaa maggal. Tagaaɗo fuu maayan yalla wo jom hakkillo naa wo puuyɗo, yalla wo lobbo naa wo bonɗo.
Ndelle binndoowo jom hakkillo oon na ƴama ƴamɗe keewɗe. O faamii ɓii Aadama heɓataa anndal kiɓɓungal e adunaaru ndu. Imo ndaara hakkillo e paamal hono gollitirɗe faa neɗɗo heɓa ballal e nguurndam muuɗum tiiɗuɗam ɗam.
Faa hannden tindinoowo oon na winndana sukaaɓe janngooɓe, na holla ɗum'en no njeyi wuurdude e ley miccitagol Laamɗo. Imo wi'a fay si en anndaa ko waɗi de adunaaru ndu tiiɗi, sanaa ceyoroɗen dokke Laamɗo, mbeltoroɗen golleeji meeɗen ɗi hokki en ɗiin.