Dewtere
Tindinoowo
Ƴamɗe dow nafaa huunde fuu
Ɓolum e ɓolum! Wo ɓolum tan!
Ayyo, huunde fuu wo ɓolum.
3 Nafaa oye neɗɗo heɓata ley golleeji muuɗum ɗi tampanta ley adunaaru sorndu naange ɗiin fuu?
4 Jamaanuuji na ngara na paltoo
de adunaaru kaa na heddii ɗo wonnoo faa abada.
5 Naange na fuɗa na hiira
de soƴƴoo na doggana to fuɗirnoo toon katin.
6 Henndu wifiran horɗoore, ndu wifira soɓɓiire,
de ndu soƴƴoo to ndu ƴuurunoo,
ndu heddoroo noon indu fiiloo indu fiiltoo.
7 Gooruuji fuu maayo ndoggirta,
de maayo kaa heewataa.
Gooruuji du celataa doggirde to ndoggirannoo.
8 Huunde fuu wo tampiri
faa ɓuri ko mbaawɗen haalude.
Abada gite kaarataa jiiɗe,
noppi du kaarataa nanɗe.
9 Ko wonnoo ɗum wonata,
ko waɗanoo ɗum du waɗoytee.
Ko heyɗi fuu soraay naange nge.
10 Si ni wi'aama: «ndaaree inan ko heyɗi»,
paamon iɗum woodunoo gilla ko ɓooyi,
ley wakkatiiji paltiiɗi e jamaanu meeɗen.
11 Ko hewtunoo arandeeɓe ɗuum miccataake.
Noon ni woni warooɓe jaango ɓeen du,
jokkoyɓe ɗum'en miccoytaako ko hewtata ɗum'en.
Ko tindinoowo yiiti ley filnde mum
12 Miin tindinoowo, mi laamakenoo Israa'iila ley galluure Urusaliima. 13 Mi tinnake e janngude e hiinyirde hakkillo ko waɗata ley sorndu kammu fuu, de tawumi Laamɗo ronndii ɓii Aadama donngal mettungal. 14 Mi ndaarii ko waɗetee ley sorndu naange ndu fuu, mi tawii wo ɓolum. Fuu na nanndi e riiwude henndu.
15 Ko oonyii waawataa oonyiteede,
ko walaa du limataako.
16 Mbiimi hoore am: «Ndaar, mi heɓii anndal luggungal faa ɓuri artunooɓe kam laamaade Urusaliima ɓeen fuu, wooɗi du mi heɓii hakkillo e anndal faa mawni.» 17 Mi waɗiino anniya faamude ko woni hakkilantaaku, wooɗi mi faama puuyndam e kaanɗi du, de tawumi ɗum du fuu wo riiwude henndu.
18 Sabo dey, kebbinaaɗo hakkillo hebbinte ɓernde mettunde.
Ɓeydude anndal wo ɓeydude dukkuru.