Dewtere Amos
1
1 Inan konngol ngol Amos, gooto e durooɓe ley wuro Tekowa haali dow Israa'iila. O hollaama ɗum wakkati laamu Ujjiya, kaananke Yahuuda e laamu Yerobo'am ɓii Yehowas, kaananke Israa'iila. Wakkati oon dimmbagol leydi manngol na heddii duuɓi ɗiɗi.2 O wi'i:
Riggaango Joomiraaɗo ƴuurii Siyona,
daande makko felnyii gilla Urusaliima.
Durduɗe durooɓe laatake yurmeende,
seɓtoodu waamnde Karmel yoorii.
No Joomiraaɗo feliri Israa'iila e lenyi piiliiɗi ɗum
Haala Siiriya
3 Inan ko Joomiraaɗo wi'i:
Saabe Damas waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe cokkirii yimɓe Galaad e jamɗe ceeɓuɗe.
4 Mi neldan yiite dow suudu Hajayel,
nge nyaama laamordu Ben-Hadad.
5 Mi helan leɗɗe pale dammbuɗe Damas,
mi fiɗɗa yimɓe Bikat-Awen,
mi lallina tiigiiɗo sawru laamu Bayti-Eden oon.
Yimɓe Aram nanngete njaaree leydi Kir.
Noon Joomiraaɗo wi'i.
Haala Filistiya
6 Inan ko Joomiraaɗo wi'i:
Saabe Gaaja waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe nanngii lenyol muɓɓol ɓe ngattii e junngo Edom.
7 Mi neldan yiite dow kokuwol Gaaja,
nge nyaama laamorɗi muuɗum.
8 Mi fiɗɗan jooɗiiɗo dow jooɗorgal laamu Asdod
mi yoppataa Askelon tiigiiɗo sawru laamu oon du.
Mi ummanto yimɓe Ekoron,
de Filistiyankooɓe heddiiɓe fuu kalka.
Noon Laamɗo Joomiraaɗo wi'i.
Haala Tiir
9 Inan ko Joomiraaɗo wi'i:
Saabe Tiir waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe nanngii lenyol muɓɓol ɓe ngattii e junngo Edom,
ɓe njeggitii amaana sakiraagu hakkunde maɓɓe.
10 Mi neldan yiite dow kokuuji Tiir,
nge nyaama laamorɗi muuɗum.
Haala Edom
11 Inan ko Joomiraaɗo wi'i:
Saabe Edom waɗii hakke dow hakke,
de mi fiirtataa ko anniyiimi dow muuɗum ɗuum,
sabo riiwiri sakiike muuɗum e kaafaahi,
hunngake yurmaade ɗum,
tikkere makko na heddii na seeka,
imo heddodii e tikkere faa abada.
12 Mi neldan yiite dow wuro Teman,
nge nyaama laamorɗi Bosora.
Haala Amon
13 Inan ko Joomiraaɗo wi'i:
Saabe Amoninkooɓe ngaɗii hakke dow hakke
de mi fiirtataa ko anniyiimi dow muɓɓen ɗuum,
sabo ceekii deedi debereeduuɓe leydi Galaad
faa njaajina leydi muɓɓen.
14 Mi neldan yiite dow kokuuji Rabba,
nge nyaama laamorɗi muuɗum,
hakkunde olkooji konu nyannde wolde,
ley kenhenam ƴuwoonde mawnde.
15 Kaananke maɓɓe nanngete,
kam e howruuɓe muuɗum njaaree leydi ngonndi.
Noon Joomiraaɗo wi'i.