Haala Mo'ab
2
1 Inan ko Joomiraaɗo wi'i:Saabe Mo'ab waɗii hakke dow hakke,
de mi fiirtataa ko anniyiimi dow muuɗum ɗuum,
sabo wulii ƴi'e kaananke Edom,
hukkinii ɗe faa ɗe laatoo kaaruuri.
2 Mi neldan yiite dow leydi Mo'ab,
nge nyaama laamorɗi Kiriyot.
Mo'abinkooɓe maayan hakkunde duko mawko,
e olkooji konu e puufaali luwe.
3 Mi ittan hooreejo maɓɓe,
mi waran ɗum kam e howruuɓem fuu.
Noon Joomiraaɗo wi'i.
Haala Yahuuda
4 Inan ko Joomiraaɗo wi'i:
Saabe Yahuuda waɗii hakke dow hakke,
de mi fiirtataa ko anniyiimi dow muuɗum ɗuum,
sabo faɗɗii ekintinooje Joomiraaɗo,
ɗowtanaaki sariyaaji muuɗum.
accii pene muuɗum majjinii ɗum,
tooruhoy koy maamiraaɓe muuɗum ndewunoo kooy.
5 Mi neldan yiite dow suudu Yahuuda,
Nge nyaama laamorɗi Urusaliima
Haala Israa'iila
6 Inan ko Joomiraaɗo wi'i:
Saabe Israa'iila waɗii hakke dow hakke,
de mi fiirtataa ko anniyiimi dow muuɗum ɗuum,
sabo sonnii dartiiɗo faa heɓa ceede,
sonnii talkaajo saabe ɓornannde paɗe,
7 yaaɓii hoore lokkaajo ley sollaare,
ɗalii talkaajo goonga ley sariyaaji.
Baaba e ɓiɗɗo fuu na pukkodoo e debbo gooto,
ɗum na laatii yennoore innde am seniinde ndeen.
8 Iɓe mbeɗɗitii ley nokkuuje cakkirɗe fuu,
iɓe pukkii dow kaddule talkaaɓe ɗe ɓe teetiri tolma.
Iɓe tukkii njaram ɗam ɓe teetiri jammba
ley suudu tooru maɓɓe oon.
9 Miin woni kalkunooɗo Amorinkooɓe yeeso maɓɓe.
Ɗum woni toowuɓe hono leɗɗe seddere,
semmbiɗinɓe hono leɗɗe mawɗe ɓeen.
Mi halkii ɓiɓɓe muɓɓen gilla dow,
mi yoornii ɗaɗi muɓɓen du faa ley.
10 Miin, mi wurtinii on leydi Misira,
ardoriimi on duuɓi 40 ley ladde yoornde,
faa ngaɗumi njeytuɗon leydi Amorinkooɓe ndiin.
11 Mi suɓake annabaaɓe hakkunde ɓiɓɓe mooɗon,
Mi waɗii jokolɓe mon woɓɓe ceninanii kam ko'e muɓɓen.
Yalla wanaa noon naa, Israa'iilankooɓe?
Noon Joomiraaɗo wi'i.
12 Ammaa on njarnii seninɓe ko'e muɓɓen ɓeen inaboojam,
Cappanɗon annabaaɓe ɓeen mbiiɗon ɗum'en:
«Taa ngaɗee annabaaku.»
13 Wooɗi, miin du inan mi niisan on joonin,
hono no torkooru heewndu bokkooje yaamnirta noon.
14 Fay ɓurɓe harwude ɓeen keɓataa cuuɗorɗe.
Jom semmbe heɓataa hollude semmbe muuɗum.
Konunke cemmbiɗinɗo waawataa dannude yonki muuɗum.
15 Piɗoowo kure waawataa daraade.
Ɓurɗo waaƴude heɓataa daɗa.
Baɗɗiiɗo puccu waawataa hisinde yonki muuɗum.
16 Nyannde ndeen, konunke ɓurɗo fuu cuusal doggan ɓanndu ɓoldu.
Noon Joomiraaɗo wi'i.