Haala soƴƴagol neɗɗo to Laamɗo
12
1 Miccitoɗaa Taguɗo maa ley njokollaaku maa,gilla nyalaaɗe tiiɗuɗe ɗeen ngaraay,
wooɗi du gilla kitaale ɗe mbi'ataa
a walaa seyo e muɓɓen ɗeen ɓadaaki,
2 gilla naange e jayngol e leelewal e koode niɓɓanaay ma,
gilla duule ngartaay caggal ƴuwoonde de ɓeydane nimre,
3 nyannde doomooɓe suudu maa ndiwnata,
worɓe maa semmbinɗinɓe du turoo,
garsooɓe maa seeɗa ɓeen cela garsude,
yuurnotooɓe feneetere du kunngoo yi'ude*,
4 wakkati mo gampuuje ɗakkiiɗe e laawol ommbaa
de duko wowru leeƴi,
wakkati mo sawtu pooli findinta ɗaaniiɓe,
de daaɗe yimooɓe du pamɗiti,
5 wakkati mo neɗɗo hulata to toowi,
hula hawrude e masiiba dow laawol,
wakkati mo lekki findata pinndi ndaneeri far,
e nde mbaɓɓattu du teddata,
ko welnata fuu maatataake.
Sabo ndeen ɓii Aadama fonndii suudu tabitooru
de woyooɓe du na njiiltoo dow laawol na mboya.
6 Ayyoo, miccitoɗaa taguɗo maa gilla callalel cardi taƴaay,
kaakol kaŋŋe du helaay, loonde mornyitaaki to ƴoogetee,
ɓoggol cawgal du taƴaay ley ɓunndu,
7 sollaare yeccaaki e leydi to ƴuurunoo,
yonki du soƴƴaaki to Laamɗo kokkuɗo ki oon.
8 Ɓolum e ɓolum! Wo ɓolum tan!
Tindinoowo wi'i: «Ɗum fuu wo ɗum ɓolum!»
Timmoode haala
9 Tindinoowo o wo jom hakkillo, de wanaa ɗuum tan, o jannginii yimɓe anndal makko, imo eta banndi, imo hiinya ɗi, imo fonndita ɗi faa heewi. 10 Imo filoo konngi goongaaji belɗi nanude, koolniiɗi binndaaɗi no fonnditorii.
11 Konngi hakkilante'en na nanndi e cabbi doolɗirɗi,
wooɗi hawrundurɓe anndal du na nanndi e jamɗe tontaaɗe faa wooɗi.
Ɗi fuu ɗi ƴuuri e duroowo gooto.
12 Ɓiyam, kakkilaa taa ɓeydaa fay gootum dow majji.
Winndude dewte ɗuuɗɗe timmataa,
wooɗi du si jannde heewii fu tampinan ɓanndu.
13 Jonkaa ɗum fuu ɗum nanaama,
inan timmoode haala ka:
Kulaa Laamɗo de kaybaa jamirooje muuɗum,
sabo ɗuum woni fuu ko neɗɗo haani waɗude.
14 Sabo Laamɗo saroto gollal fuu
fay cuuɗiingal,
yalla wo lobbal naa bonngal.