No Ayuuba tuubiri
42
1 Ayuuba jaabii Joomiraaɗo, wi'i:2 — Miɗo anndi aɗa waawi waɗude huunde fuu,
fay huunde haɗataa anniya maa yottaade.
3 A ƴamii moy nanuɗaa na jiiɓa dabare,
tawee anndal fuu walaa.
Sikke walaa mi haalirii rafi paamal
dow kujje kaayniiɗe ɗe mi anndaa.
4 A wi'ii mi hettindoo ko mbi'ataa,
a ƴaman kam, de mi faamine.
5 Arande miɗo nanannoo kabaaru maaɗa e noppi am tan,
ammaa joonin kaa gite am nji'ii ma.
6 Saabe majjum mi mimsitii,
mi tuubii,
wo mi jooɗiiɗo dow sollaare e ndoondi.
No Joomiraaɗo holliri wo Ayuuba jeyi goonga
7 Wooɗi, caggal Joomiraaɗo haaldii e Ayuuba haalaaji ɗiin fu, wi'i Elifas Teemankeejo:
— Tikkere am woni dow maaɗa, aan e yigiraaɓe maa ɗiɗo ɓe, sabo on kaalaay goonga dow am, hono no maccuɗo am Ayuuba noon. 8 Joonin, sanaa kooƴon ga'i jeɗɗi e jawɗi jeɗɗi, de njahon to maccuɗo am Ayuuba, cakkon ɗi, ɗi laatanoo on sadaka buleteeɗo. Ayuuba maccuɗo am waɗana on du'aare, miin du mi jaabanto mo du'aare makko taa mi jukkoroo on fodde puuyndam mon, sabo on kaalaay goonga dow am, hono no maccuɗo am Ayuuba noon.
9 Ndeen Elifas Teemankeejo oon e Bildat Suhankeejo e Sofar Naamankeejo njehi ngaɗowi hono no Joomiraaɗo wi'iri ɗum'en. Joomiraaɗo du jaabii du'aare nde Ayuuba waɗani ɗum'en ndeen.
No Joomiraaɗo barkiniri Ayuuba katin
10 Caggal Ayuuba waɗanii yigiraaɓe muuɗum du'aare, Joomiraaɗo wartirani Ayuuba ko mursunoo ɗuum fuu. O hokkiti ɗum ko woodunoo arande ɗuum, o sowi ɗum kile ɗiɗi. 11 Ndeen sakiraaɓe makko rewɓe e worɓe e anndaaɓe muɓɓen fuu ngari wuro makko, nyaamdi e makko. Ɓe njurmii mo, ɓe mbaaltini ɓernde makko dow torraaji ɗi Joomiraaɗo waylunoo dow makko fuu. De ɓe kokki mo dokke, mono fuu hokki mutakal cardi e hootonnde kaŋŋe.
12 Joomiraaɗo du barkini Ayuuba e balɗe muuɗum cakitiiɗe faa ɓuri ko barkinnoo ɗum arande. O heɓi baali e be'i 14 000 e geelooɗi 6 000 e na'i 2 000 e araaji debbi 1 000. 13 O heɓii ɓiɓɓe worɓe njeɗɗo e ɓiɓɓe rewɓe tato. 14 Ɓiɓɓe rewɓe ɓeen, arandeejo oon o hokki ɗum innde Yemima (ɗum na fiirta Nyaabal), ɗiɗaɓo oon o hokki ɗum innde Kesiya (ɗum na fiirta Uurngol), tataɓo oon du o hokki ɗum innde Keren-Hapuk (ɗum na fiirta Fina-Gite). 15 Ley leydi ndiin fuu walaa surbaaɓe ŋarɗuɓe hono ɓiɓɓe Ayuuba ɓeen. Baabiiɓe oon hokki ɓe ndongu hono no sakiraaɓe maɓɓe worɓe noon.