41
1 Si goonga dabare nanngude ngal fuu walaa,fay yi'ude ngal tan na liɓa neɗɗo.
2 Fay ɓurɗo farritinde suusataa
umminde hakkillo kuungal ngaal,
sakko neɗɗo tarsinoo yeeso am.
3 Moy nyalmiimi abada sakko mi yoɓa ɗum?
Miin jeyi adunaaru fuu.
4 Mi deƴƴintaako, mi haalan no koyɗe maggal nga'i,
mi hollan kabaaru semmbe maggal,
e ŋari ɓanndu maggal.
5 Moy foti ɓoltude nguru maggal keedungu dow?
Moy waawata yulude ngu,
saayooji njamndi dekondiraaɗi ɗiin?
6 Moy waawata omtude hunnduko maggal?
Ndaaruɗo nyiiƴe maggal fuu hulan.
7 Ɓaawo maggal ina jogii diidi bawaaɗe,
iɗe ceŋondiri faa teeŋi,
8 iɗe peɗondiri,
faa henndu waawataa naatude hakkunde majje.
9 Iɗe ɗakkondiri faa teeŋi,
iɗe ceŋondiriri semmbe faa ɗe mbaawaa senndeede.
10 Si ngal ɗiilii, wo hono maƴƴe mburtotoo,
gite maggal du ina njalba hono puɗal naange.
11 Yiite ina wurtoo e hunnduko maggal,
pette yiite ina cankitoo.
12 Cuurki na wurtoo e kine maggal,
hono fayannde wawnyoore dow yiite huɗo yoorko.
13 Foofaango maggal ina huɓɓa ƴulɓe,
yiite ina yalta e hunnduko maggal.
14 Semmbe mawɗo na tawaa e daande maggal,
kawruɗo e maggal fuu wemmbere nanngan ɗum.
15 Kommbi guri maggal ina kamƴondiri,
ɗi dimmbataako, iɗi njogondiri hono njamndi.
16 Ɓernde maggal wo sattunde hono tefaare,
wo yoornde koloŋ hono hayre niisirde.
17 Si ngal ummake fu,
kulol nanngan jom'en baawɗe,
dimmbaali maggal na taƴa ɓerɗe muɓɓen.
18 Fay si kaafaahi meemii ngal waɗataa faa'e,
labbo e laɓi fuu mbaawanaa ngal,
sakko kural.
19 Ingal ndaarda njamndi ɓaleeri hono kuɗol ɓolol,
mboɗeeri du hono leggal nyolngal.
20 Kure ndoggintaa ngal,
kaaƴe piwli na laatanii ngal hono nyaande ɓolde.
21 Ɓoldooru du, ingal ndaarda ɗum hono kuɗel,
ingal jala cenƴaali labbe.
22 Koɓalaaje nguru reedu maggal ina ceeɓi hono keeɗe loonde,
ingal daasa reedu maggal dow loofe,
ingal yoppa diidi jaajuɗi.
23 Ingal wawnyina ndiyam lugguɗam hono fayande dow yiite,
ingal iirta maayo hono uurdi mbulaandi.
24 Si ngal faltake fu diyeele ɗeen na ɗelka,
ingal ummina nguufo e luggeefi maayo.
25 Hono maggal fuu walaa e ley adunaaru,
wo ngal tagaangal ngal taganaaka kulol.
26 Ko manaa manngu fuu ingal yawii ɗum,
kanngal woni laamiingal dow ko semmbiɗi fuu.