40
1 Joomiraaɗo wi'i Ayuuba:2 — Jiɗɗo jeddi felan Jom Baawɗe naa?
Kaɓdoowo e Laamɗo sanaa heɓa ko jaaboo.
No Ayuuba jaaborii
3 Ndeen Ayuuba jaabii Joomiraaɗo wi'i:
4 — Kay! Miin wo mi ɗume? Ɗume mbi'ammaami?
Mi ommbiran hunnduko am e junngo am.
5 Mi haalii nde go'o, mi haalii nde ɗiɗi,
ammaa mi ɓeydataa haalude katin.
Joomiraaɗo na ƴama Ayuuba katin
6 Ndeen Joomiraaɗo jaabii Ayuuba e ley kenhenam, wi'i:
7 — Umma cegiloɗaa, kollaa wo a gorko!
Mi ƴamete, de paaminaa kam.
8 Yalla aan a hewtii wi'ude mi walaa goonga naa?
A wi'an wo miin jeyi feloore faa ndartinaa hoore maa naa?
9 Aɗa woodi baawɗe hono am, miin Laamɗo naa?
Aɗa waawi riggaade hono no ndiggortoomi naa?
10 Si wo noon, kokkitoɗaa manngu e saahaare,
ɓornaa hoore maa darja e teddeengal.
11 Accaa tikkere maa rufee sankitee,
ndaaraa jom manngu becce fuu de ndoƴƴaa ɗum.
12 Ayyo ndaaraa ɓe manngu becce'en ɓeen de eeltaa ɗum'en,
ndampaa bonɓe to ngoni fuu.
13 Iraa ɓe ley leydi, ɓe fuu,
cuuɗaa geese maɓɓe ley caabeeje.
14 Ndeen miin e hoore am mi manete,
sabo ɗum hollan baawɗe maa kisinte.
15 Ndaar kuunga mannga kulɓiniinga,
nga tagumi no tagirmaami.
Inga nyaama huɗo hono nagge.
16 Ndaar semmbe buttuli magga,
e no guri reedu magga cemmbiɗiri.
17 Inga teeŋina laccol magga manngol ngool hono lekki seddere,
ɗaɗi buse magga ina moorondiri e semmbe.
18 Ƴi'e magga wo hono tuugorɗe njamndi mboɗeeri,
koyɗe magga du hono cabbi njamndi ɓaleeri.
19 E ley ko tagumi fuu, wo kanga ɓuri teddeengal e darja.
Miin taguɗo nga, mi ɓattinii nga,
fay ko nga jogii kaafaahi kulɓiniiki ɗuum.
20 Baamle ina kokka nga nyaamdu
to kulle ladde fuu pijata toon.
21 Inga fukkii ley kuttukuruuti,
inga suuɗoo ley huɗo daande maayo e beeli.
22 Leɗɗe ɗeen ina kokka nga ɗoyki mbelki,
leɗɗe daande maayo ɗeen na corna nga.
23 Si goonga fay si maayo iirtaa,
nga walaa kulol fey,
si gooruwol Urdun wubbii dow yeeso magga,
nga hillaaka.
24 Moy foti daraade yeeso magga faa nannga nga?
Moy waawi yulude kine magga watta ɓoggol?
Haala kuungal maayo kulɓiniingal
25 Yalla aɗa waawi nanngirde kuungal maayo kulɓiniingal e jammbuure liingu naa?
Naa du kaɓɓiraa ɗemngal maggal e ɓoggol?
26 Aɗa waawi haɓɓirde kine maggal ɓoggol naa?
Naa du njuldaa gaɓɓugal maggal e jammbuure liingu naa?
27 Yalla ngal nyaagete njurmoɗaa ngal naa?
Ngal haaldete mbelka naa?
28 Yalla ngal haɓɓidan e maaɗa amaana,
de ngal jaɓa laataade maccuɗo maaɗa faa abada naa?
29 Aɗa waawi fijirde ngal hono poolel,
naa du kaɓɓaa ngal faa ɓiɓɓe maa rewɓe pijira naa?
30 Yalla soorooɓe mbarsondiran dow maggal naa?
Ɓe kirsan ngal ɓe cennda ngal hakkunde sonnooɓe naa?
31 Aɗa waawi yuliyulinde nguru maggal e labbo naa?
Naa du njuwiraa hoore maggal e labbo nanngirgo liƴƴi?
32 Si a foortii junngo maa, a meemii ngal tan,
a yi'an iri konu mo a yeggitataa abada,
a ɗiimtataako!