39
1 Aɗa anndi wakkati mo mbeewa ladde rimata naa?Aɗa taykoo koobi wakkati mo ɗi ndimata?
2 Aɗa anndi lebbi foti ɗi ndunyirta naa?
Aɗa anndi wakkati mo ɗi ɓeynata naa?
3 Aɗa anndi wakkati mo ɗi pukkii faa ɗi ndima,
de ɗi keɓta ko'e majji naa?
4 Ɓiɓɓe majji ina ɓeydoroo semmbe,
ina mawna ley ladde,
ina ndilla na njoppa inniraaɓe muɓɓen.
5 Moy yoofi araawa ladde?
Wo moy tonngiti tonngoode magga?
6 Mi hokkii nga ladde yoornde laatoo wuro magga,
mi ronnii nga leydi ndi moonnde.
7 Inga jala duko huɓeere,
nga maatataa felɓugol coggoowo.
8 Inga yiiltoo dow baamle inga dura,
inga filoo huunde fuu ko hecciɗi.
9 Yalla eda jaɓan ɗowtanaade ma naa?
Yalla nga jaɓan waalude ley hoggo maa?
10 Aɗa waawi haɓɓude nga ndemnaa nga naa?
Nga fooɗante jalo sari, nga jokke naa?
11 Aɗa waawi hoolaade nga saabe semmbe magga naa?
A yoppidan nga golle ngesa maa naa?
12 Aɗa hoolii nga wartowan,
faa nga wartirane gawri maa to ƴaretee naa?
13 Ndawuwal weeɗirii bippeele muuɗum welwelo,
ammaa waawaa fonndeede e leeɓi bippeele waaliyal,
deenooji ɓiɓɓe muuɗum ɗiin.
14 Ndawuwal le na yoppa ɓoccooɗe mum dow leydi,
faa ɗe maata pooweefi mayri.
15 Ngal yeggitanii kabaaru koyngal jaaɓoowal,
e huunde ladde dampoore.
16 Ingal nyanngana ɓikkoy maggal,
hono wanaa kanngal jeyi koy,
ngal hillaaka fay si tonnyugol maggal laatii ɓolum.
17 Sabo miin Laamɗo mi ɗalii ngal hakkillo,
mi yeɗaay ngal paamal.
18 Ammaa wakkati ngal ummanii doggudu,
ngal jalan fay puccu e dogginoowo ɗum.
19 Yalla wo aan hokki puccu le semmbe naa?
Wo aan holtini daande maggu leeɓi naa?
20 Aan waɗi de ingu fitta hono mbaɓɓattu naa?
Semmbe kijaali maggu na kulɓina yimɓe.
21 Ingu dampa leydi ley naɗɗol,
ingu mantoroo semmbe maggu,
ingu haawtanoo konu.
22 Ingu jala ko hulɓinii,
wemmbere walaa e maggu,
ngu doggataa kaafaahi.
23 Kure ina cenƴa dow maggu,
labbe e kaafaaje ina ɗelka.
24 Ɓanndu maggu na seɗa, na huya,
ngu waawaa daraade heese,
ingu doggana wolde si luwal fuufaama.
25 E puufaali ɗiin ngu hijirta kuyam,
ingu uurnoo konu gilla to woɗɗi,
ingu maata diggaali ardiiɓe konuuji
ingu nana pelɓaali wolde ɗiin.
26 Wo paamal maaɗa hokki gabuure baawɗe fiirude,
nde weerta bippeele mayre faro horɗoore naa?
27 Wo aan yamirta ciilal ummoo yaha faa dow naa?
Aan waɗata faa ngal nyiɓa suudu maggal to toowii toon naa?
28 Dow tefaaje toowɗe to ngal waalata toon,
ingal hoɗii faa to seeɓi,
to nokku maggal cuuɗorɗo toon.
29 Gilla dow toon ingal hora ko ngal nanngata,
gilla to woɗɗi gite maggal na kaynoo na njokki ɗum.
30 Ɓiɓɓe maggal ina njara ƴiiƴam.
To ko waati woni fu, wo toon ngal tawetee.