No Joomiraaɗo jaaborii Ayuuba
38
1 Ndeen Joomiraaɗo jaabii Ayuuba e ley kenhenam, wi'i:2 — Moy nanumi na jiiɓa dabare,
ina haalda rafi anndal?
3 Umma cegiloɗaa, kollaa wo a gorko!
Mi ƴamete, de kumpitaa kam.
4 Toy ngonnoɗaa nde njoƴƴinannoomi adunaaru ndeen?
Haalanam si aɗa woodi paamal.
5 Moy diidi to ndu joƴƴintee?
Aɗa anndi ɗum naa?
Naa moy fonndiri ndu ɓoggol ponndirgol?
6 Dow ɗume ndu yowaa?
Naa moy joƴƴini joƴƴinirɗe mayru,
7 wakkati mo koode fajiri kawritinnoo njimi,
nde maleyka'en Laamɗo fuu ilinirnoo seyo ndeen?
8 Wo moy ommbi dammbuɗe maayo,
wakkati mo ngo wurtorinoo semmbe ley reedu leydi,
9 nde ngaɗunoomi duule cuddi ngo,
nimre du fiilii ngo hono lefol?
10 Mi taƴanii ngo keerol,
de paddiimi dammbuɗe maggo,
11 njamirmi ngo, «Haaɗa ɗo,
a faltataako ɗo.
Bempeƴƴe maaɗa cemmbiɗinɗe ɗeen du,
wo ɗo woni keerol majje!»
12 Ayuuba, yalla a meeɗii yamirde nyalooma waɗa naa?
Yalla a anndinii jayngol to jeyi yaltirde,
13 faa ngol nannga tatteeji adunaaru,
ngol fiɗɗa bonɓe e ley mayru naa?
14 Ingol ɓanngina adunaaru hono maande ŋenyaande dow loonde.
Ingol funtina nyobbi leydi hono saaya ɓornaaɗo.
15 Bonɓe kaɗaama jayngol muɓɓen,
juuɗe ɗe ɓe ƴeptiri nyanngere ɗeen kelaama.
16 A meeɗii naatoyde to maayo manngo ɓulirta naa?
A yaaɓii to ɓuri luggude e maggo toon naa?
17 Dammbuɗe maayde ina udditii yeeso maaɗa naa?
A yi'ii to nimre ɓaleere naarrata naa?
18 A hewtii faamude no adunaaru yaajiri naa?
Si aɗa anndi ɗum fuu, kaalanaa kam.
19 Laawol ngole jokketee faa hewta joonnde annoora?
Nimre le, toy kam le ƴuuri?
20 Yalla a hooran nde to nde ƴuurunoo naa?
A annditan laabi dewooji gure mayre naa?
21 Ayyo aɗa anndi, sabo ndeen tawii a rimaama.
Ay, a wuurii e jamaanuuji!
22 Yalla na woodi nde naatuɗaa beembe marmalluuje naa?
A yi'ii to kodde marmalluuje ndesetee naa?
23 Mi resanii ɗe wakkati torra,
nyalaaɗe hamre e konu.
24 Toy woni laawol jahoowol to jayngol feccete?
Toy woni nokku to henndu lettugaaru saaketee ley adunaaru?
25 Moy waɗani ƴuwoonde gaafol to dellitortoo?
Moy seekani riggaango laawol ngol jokkata?
26 Moy tomnata ndiyam dow leydi to neɗɗo fuu walaa,
ley ladde yoornde to fay gooto jooɗaaki?
27 Moy yarnata leydi njoorndi mbuuwaandi,
faa ndi laatoo to huɗooji puɗata?
28 Yalla ƴuwoonde ina woodi baaba naa?
Saawandere du wo ɓii moy?
29 Marmalluuje e reedu moy ƴuuri?
Moy rimi saawandere laatiinde marmalluuje?
30 Moy waɗata ndiyam teeŋa hono hayre,
dow maayo du yoora hono marmalluuje?
31 Aɗa waawi hawrondirde koode Ɗaccuki naa?
Naa du a waawan cankitaa koode Neɗɗooje?
32 Aɗa waawi wurtinde hoodere fuu e wakkati muuɗum naa?
A adan koode soɓɓirreeje dow laabi majje naa?
33 Aɗa anndi jamirooje ɗe njaayri kammu waɗanaa naa?
Aan joƴƴini ɗe faa ɗe laamoo adunaaru naa?
34 Aɗa waawi haaldude e duule,
faa ɗe mbecca ndiyam dow maaɗa naa?
35 Aɗa waawi nelude maƴƴe naa?
Yalla ɗe ngaran to maaɗa ɗe mbi'a,
«Inani min min ngarii»?
36 Moy anndini duule golle muɓɓen?
Moy faamini beɗi kammu no kuuɓirta dow?*
37 Moy heɓi hakkillo limugol duule?
Moy woodi baawɗe joorude sumalleeji kammu faa ƴuwoonde toɓa,
38 de sollaare laatoo tame loofe,
bolaaje du takkondira?
39 Aɗa waawi doggude hono laddeeru faa loohanoɗaa ndu ko ndu nyaamata naa?
Aɗa waawi haarnude ɓiɓɓe mayru,
40 wakkati mo ɗi coppinii iɗi keɗii ley lohi majji,
naa nde ɗi ɗuppinantoo ko ɗi nyaamata ley cukkuri leɗɗe naa?
41 Moy hokkata daawuwal ko nyaamata,
wakkati ɓikkoy muuɗum mbullotoo Laamɗo,
nde koy njiiltotoo koy ngalaa neema?