37
1 Si goonga ɓernde am taƴii saabe majjum,inde diwna hono nde fettoto.
2 Kettinee wooɗa! Imo duka e semmbe,
daande makko ina riggoo.
3 Imo yoofa maƴƴe makko e ley njaayri kammu fuu,
iɗe maƴƴa nokku fuu ley adunaaru.
4 Caggal ɗuum wo duko daande makko,
inde riggoroo baawɗe.
Nde daande makko riggotoo du,
o haɗataa maƴƴe ɗeen fey.
5 Diggaali daande Laamɗo wo ko haaynii,
imo waɗa kujje kaayniiɗe ɗe kunngotoɗen faamude.
6 Imo wi'a kodde marmalluuje cudda leydi,
imo yamira ƴuwoonde toɓira semmbe.
7 Noon o haɗirta junngo neɗɗo fuu gollude,
faa mono fuu anndita gollal makko.
8 Kulle ladde du naatowan to cuuɗotoo,
na keddoo ley luurooji muɓɓen.
9 Kenhenam ina ummoo e nokku muuɗum,
jaangol du e ley henndu sattundu.
10 E foofaango Laamɗo marmalluuje ngaɗirtee,
diyeele du na laatoo hono hayre.
11 Imo hebbina duule ndiyam,
imo waɗa ɗe cankita maƴƴe makko.
12 Imo waɗa duule ɗeen piiloo na piiltoo,
iɗe ngaɗa fuu ko o yamiri ɗe,
faa huuɓa leyɗe adunaaru fuu.
13 Nde gomma imo gollira ɗe faa o eelta leydi makko,
nde gomma du faa o holla hinney makko koolniiɗo.
14 Ayuuba, fiɗɗu noppi maa de nanaa!
Dara, miiloɗaa golleeji kaayniiɗi ɗi Laamɗo waɗi.
15 Yalla aɗa anndi no o yamiri ɗi faa ɗi njokka mo naa?
Naa du noy o maƴƴinirta maƴƴe ley duule?
16 Aɗa anndi no o ɓiliri duule e kammu toon naa?
Kaayeefiiji ɗiin wo gollal jogiiɗo paamal kiɓɓungal.
17 Aan kaa, si henndu soyƴake horɗoore,
faa nguleefi teddanii adunaaru fu,
aɗa wula ley kaddule maa.
18 Yalla aɗa waawi weƴƴitinde njaayri kammu hono no makko noon,
faa ndi teeŋa hono daandorgal njamndi naa?
19 Kollaa min ndelle ko min mbi'ata mo,
minen min njoppaama e nimre, min anndaa ko min kaalata.
20 Yalla kanko oon o hollee miɗo yiɗi mi haalda e makko naa?
Kayto! Neɗɗo hulataa moɗeede naa?
21 Wooɗi, en mbaawataa ndaarude naange du,
no nge jalbirta e njaayri dow
si henndu sankitii duule.
22 Ndaar jayngol ina ƴuura soɓɓirre na ɗelka hono kaŋŋe,
Laamɗo warii ley teddeengal muuɗum kulɓiniingal.
23 Jom Baawɗe le hewtataake,
baawɗe muuɗum ɗuuɗii,
sariya muuɗum hiɓɓii,
jom dartaare oon torrataa neɗɗo.
24 Saabe majjum yimɓe ina kula mo.
O taykataako miiliiɓe na ngoodi hakkillo fuu.