Ko Elihu wi'i dow sariya Laamɗo
36
1 Ndeen Elihu ɓeydi haala, wi'i:2 — Munyanaa kam seeɗa,
ina woodi ko njiɗumi hollude ma,
ina woodi ka kaalammi faa holla Laamɗo jeyi goonga.
3 Mi iirtan anndal am gilla to woɗɗi,
mi holla wo Taguɗo kam oon woni dartiiɗo.
4 Tannyoraa ko mbi'ammi ɗuum wanaa hiila,
wo jogiiɗo anndal kiɓɓungal haalante.
5 Paamaa, Laamɗo wo mawɗo,
walaa fuu mo o wanyi,
wo o mawɗo jogiiɗo anniya teeŋuɗo.
6 O yoppataa bonɗo heddodoo e yonki,
de torraaɓe ɓeen imo waɗana ɗum'en ko haani.
7 O tampataa reenude fonnditiiɓe,
imo joƴƴina ɗum'en ɗakkol laamiiɓe,
imo waɗa faa ɓe kokkee manngu faa abada.
8 Si koyɗe maɓɓe kaɓɓaama,
naa du ɓoggi torra nanngii ɓe fu,
9 ndeen o hollan ɓe ko ɓe ngaɗi,
o faaminan ɓe lutti ɗi ɓe ngaɗiri mawnitaare.
10 O omtan noppi maɓɓe faa ɓe nana feloore,
imo wi'a ɓe ɓe tottitoo e bonandaaji maɓɓe.
11 Si ni ɓe nanii ko o wi'i ɓe,
ɓe ɗowtanake mo fu,
ndeen ɓe keewan jam,
ɓe mbuuran duuɓi maɓɓe ley weltaare.
12 Ammaa si ɓe kettindaaki ko o wi'i ɓe,
ndeen kaa o hisintaa ɓe e feƴƴitinde nimre maayde,*
ɓe maaydan e rafi paamal.
13 Ɓe kulataa Laamɗo ɓeen ina ɓeyda sattinde ɓerɗe muɓɓen,
fay ko o watti ɓe geƴƴelle ɗuum du, ɓe mbullitaako mo ballal.
14 Ɓe maayan nder njokollaaku,
balɗe maɓɓe nde'an hakkunde woykuruuɓe.
15 De torraaɓe le, o golliran torraaji muɓɓen ɗiin faa o hisina ɗum'en,
imo gollira tiiɗallaaji du faa o omta noppi muɓɓen.
16 Aan Ayuuba du, imo waɗa faa o wurtine e ɓillaare,
faa o hokke jam e njaayri to haamnalla fuu walaa,
imo moƴƴinane nyaamdu welndu heewndu pet.
17 Joonin kaa wo sariya ka bonɓe ngaɗantee kaan hewtii ma,
a hisataa sariya kaanuɗo oon.
18 Hakkil, taa tikkere maaɗa waddane yawude Laamɗo,
ko hisinte halkere na tiiɗi, saabe majjum taa accu mbosineɗaa.*
19 Aɗa miilii bojji maaɗa ittante torra o naa?
Semmbe mo ngooduɗaa oon wallete naa?
20 Taa heɗa jemma wara,
wakkati mo yimɓe ɗoofete e nokku muɓɓen.
21 Kakkilaa, taa coƴƴoɗaa ley ko boni,
sabo mi yi'ii wo ɗuum ɓurani ma e dow torreede.
22 Paamaa, Laamɗo wo jom manngu golliroowo baawɗe.
Moy woni ekintinoowo hono muuɗum?
23 Moy meeɗi hokkude mo jamirooje dow ko o waɗata?
Sakko wi'a mo, «A waɗii ko boni!»
24 Taa yeggitin manude golleeji makko,
ɗi yimooɓe mani ɗiin.
25 Ɓii Aadama fuu wattii hakkillo dow majji,
neɗɗo fuu na haccoo ɗi to woɗɗi.
26 Paamaa, Laamɗo wo mawɗo,
faa ɓuri ko mbaawɗen anndude.
Walaa baawɗo limude duuɓi muuɗum.
27 Kanko hawrondirta mbaadoy ndiyam dow,
o tama koy, koy laatoo duule caawuɗe ndiyam.
28 De duule ɗeen du njoofa ɗam,
faa ɗam toɓana ɓii Aadama e nokku fuu.
29 Moy waawi faamude no duule mbeƴƴitorii dow,
e no maƴƴaango maƴƴirta dow njaayri kammu?
30 Inan, imo sankita maƴƴe makko dow toon,
ɗe njaynina fay to luggi e maayo manngo.
31 Wo noon du o sarorto* yimɓe,
imo hokka nyaamdu faa heewa.
32 Junngo makko ina heewi maƴƴe,
imo hooƴa ɗe, de o sappoo ɗe to ɗe caamata.
33 Diggaali ina kolla wargol makko,
kenhenam du na gooyna tikkere makko.*