Ko Elihu wi'i dow manngu Laamɗo
35
1 Ndeen Elihu yaari yeeso e haala wi'i:2 — Ko mbi'ataa aan ɓuri Laamɗo woodude goonga ɗuum,
aɗa miilii wo ɗuum woni ko fonnditii naa?
3 Aɗa ƴama ɗume woni ko nafete,
ɗume accude hakke nafata.
4 Miin mi jaabete e dow majjum,
aan e yigiraaɓe wonduɓe e maa ɓeen.
5 Wooɗi, tiggita ndaaraa njaayri kammu,
ndaar no duule toowiri dow maaɗa noon.
6 Yalla si a waɗii hakke,
na woodi ko ɗum waɗata Laamɗo naa?
Naa si lutti ɗi ngaɗuɗaa ɗiin na ɗuuɗi,
won ko wemmbirta mo naa?
7 Si a dartiiɗo le, won ko ɗum hokkata mo naa?
Na woodi ko o jaɓata e junngo maa naa?
8 Bone mo ngaɗuɗaa oon
wo neɗɗo hono maaɗa tan hewti,
dartaare maa du wo ɓii Aadama tan nafi.
9 Si torraaji ɗuuɗii, torraaɓe mbullan,
na mbullana ballal,
sabo junngo jom semmbe ɓillii ɗum'en.
10 Ammaa walaa fuu ƴamuɗo wi'i,
«Hey, toy Laamɗo taguɗo kam oon woni?
Kam woni kokkoowo jimi ley jemma.
11 Kam waɗi faa kulle ladde na njanngina en anndal,
pooli du hakkillo.»*
12 Ndelle ɓe mboyan, ammaa o jaabataako ɓe
saabe manngu becce bonɓe ɓeen.
13 Si goonga Laamɗo hettintaako bojji ɓoli iri ɗiin,
Jom Baawɗe hakkilantaa ɗi.
14 Wooɗi, si a wi'ii a yi'aay mo,
wullaango maaɗa ina woni yeeso makko,
sey keɗoɗaa mo tan.
15 Mbiiɗaa du si o tikkii fu o jukkataako,
o hillaaka e bonandaaji.
16 Ayuuba, aɗa omta hunnduko maa aɗa rufa haala ɓola,
aɗa ɓeyda borbortude e rafi anndal tan.