Ko Elihu wi'i dow laaɓal Laamɗo
34
1 Ndeen Elihu yaari yeeso e haala wi'i:2 — Onon wooduɓe hakkillo, nanee ko mbi'ammi!
Onon annduɓe, piɗɗee noppi mooɗon kettindanoɗon kam.
3 Goonga nii, nowru na fonnda nanɗe
hono no ɗemngal meeɗirta nyaamdu.
4 Sanaa cuɓanoɗen ko'e meeɗen ko dartii,
annditen ko wooɗi hakkunde meeɗen.
5 Sabo Ayuuba wi'i walaa ko feldee,
wi'i Laamɗo salanake ɗum wullitaango mum,
6 wi'i wo dartiiɗo de ndaardaama wo penoowo,
wi'i waɗaay lutti de Laamɗo barmini ɗum barme barooje.
7 Kay, yalla na woodi neɗɗo hono Ayuuba naa?
Wo neɗɗo tuutoowo jalnorooje hono ndiyam,
8 nannuɗo hoorem ley waɗooɓe ko boni,
jaadoowo e bonɓe.
9 Sabo o wi'ii waɗude ko Laamɗo yiɗi le,
walaa fuu ko nafata.
10 Wooɗi ndelle, onon jom'en paamal, kettindanee kam.
Fay huunde waɗataa de Laamɗo waɗa ko boni,
Jom Baawɗe waɗataa ko oonyii abada.
11 Imo yoɓa neɗɗo e dow ko waɗi,
imo jokkina ɗum ko laabi muuɗum ndimanta ɗuum.
12 Tannyoral, Laamɗo waɗataa ko boni,
Jom Baawɗe oonyataa sariya.
13 Moy hokki Laamɗo dawrande adunaaru?
Wo moy halfini mo ardaade ndu fuu?
14 Wooɗi, si tawii o fornyinii hakkillo to makko,
o wartiri ruuhu e foofaango to makko fu,
15 ndeen kaa tageefo fuu halkan,
ɓii-Aadama fuu soƴƴoto e sollaare.
16 Si aɗa woodi paamal fu, nanu ka,
fiɗɗu noppi maaɗa kettindoɗaa ko mbi'ammi.
17 Yalla Laamɗo na waawuno laamaade si yiɗaa goonga naa?
A suusan felude Jom dartaare mawɗo oon naa?
18 De wo kam wi'ata laamiiɗo wo jaayɗo,
kam wi'ata mawɓe wo bonɓe.
19 O ɓurdintaa ardiiɓe,
naa du jom jawdi dow talkaajo,
sabo ɓe fuu wo kanko tagi ɓe.
20 Iɓe maayra hono maƴƴaango yitere,
iɓe ndimmbee hakkunde jemma de ɓe paltoo,
jom semmbe ina ittee tawee wanaa junngo meemii ɗum.
21 Sabo gite makko na taykoo laabi neɗɗo,
imo ndaara to yahata fuu.
22 Walaa nimre fay ɓurnde tekkude
waawunde suuɗude waɗooɓe ko boni.
23 Laamɗo haajaaka taƴande neɗɗo wakkati
faa joomum wara yeeso muuɗum de saree.*
24 Imo halka mawɓe, walaa ko o ƴama fay gooto,
de o loomtina woɓɓe.
25 Si goonga imo anndi golleeji maɓɓe,
o hippan ɓe hakkunde jemma de ɓe kalka lay.
26 O tappan ɓe saabe bonanda maɓɓe,
yimɓe fuu na ndaara.
27 Sabo ɓe tottitake e jokkude mo,
ɓe killaaka e laabi makko fuu.
28 Ɓe mboynii talkaaɓe,
de bojji ɗiin kewti mo,
o nanii bullaali lo'uɓe ɗiin.
29 Si o deƴƴinake, moy foti felude mo?
Si o tottitake, moy foti yeccinde mo?
Wo kanko laamii lenyi e yimɓe fuu,
30 faa taa neɗɗo laamoo si hulataa Laamɗo,
taa joomum laatanoo lenyol mum tuugol.
31 Na hasii neɗɗo wi'an Laamɗo:
«Mi yarii eeltol, mi waɗataa ko boni katin.
32 Hollam ko mi yi'aay,
si mi waɗii ko oonyii fu, mi ɓeydataa waɗude noon.»
33 Ammaa aɗa miilii Laamɗo yomnitorto fodde no aan njiɗirɗaa naa?
Fay si caliɗaa mo naa?
Wo aan jeyi suɓaade, wanaa miin.
Jonle kaalaa ko annduɗaa.
34 Yimɓe ɓe paamal
e nananooɓe kam wooduɓe hakkillo fuu mbi'an kam:
35 «Ayuuba ina haalda hono walaa anndal,
ko o wi'ata ɗuum wanaa caral fey.»
36 Tawee o ndaartindete faa naawa,
sabo o jaaborake hono no bonɓe njaabortoo noon!
37 Sabo o ɓeydii lutti dow hakke makko,
o umminii jeddi yawaara hakkunde meeɗen,
de imo rufa haala ɓola faa o habda e Laamɗo.