Ko Elihu wi'i dow bullitaali Ayuuba
33
1 Joonin Ayuuba, hettina ko mbi'ammi fuu,piɗɗaa noppi maa faa nanaa.
2 Inan, miɗo omta hunnduko am,
ɗemngal am segilanake haalude.
3 Ko mbi'ammi fuu wo e ɓernde laaɓunde,
mi hokkete anndal laaɓungal tal!
4 Wo Ruuhu Laamɗo tagi kam,
foofaango Jom Baawɗe hokki kam yonki.
5 Si aɗa waawi fu, nootoɗaa kam,
cegilaa haala maa de ngaddaa ka yeeso am.
6 Miin e maaɗa, en fuu en gootum yeeso Laamɗo,
miin du e loofal tagiraami.
7 Saabe majjum, taa hulam,
junngo am doolɗataa ma.
8 Sikke walaa, ko mbiiɗaa fuu mi nanii.
Mi hettindake haala maa kaan.
9 Mbiiɗaa dey wo a laaɓuɗo tal,
a waɗaay lutti,
a walaa feloore, a walaa hakke.
10 De mbiiɗaa Laamɗo ina tewtane hamre,
a laatanake mo hono ganyo,
11 o teppii koyɗe maa,
imo hora to njaaɓataa fuu.
12 De hettina: a walaa goonga e majjum.
Mi haalante ko saabii:
Laamɗo ina ɓuri tagaaɗo.
13 Saabe ɗume mbullitotoɗaa mo,
faa mbi'aa o jaabantaako neɗɗo dow ko waanni ɗum?*
14 Si goonga Laamɗo na haaldira neɗɗo laabi keewɗi,
fuɗɗiran gootol de yaara yeeso e gonngol,
ammaa walaa annditoowo ɗi.
15 Ley koyɗi e ley holleede jemma,
wakkati yimɓe pukkii dow leese muɓɓen,
ina ɗaanii ɗoyngol teddungol,
16 ndeen o omtata noppi muɓɓen faa nana,
o hulɓinira ɗum'en gonginooje,
17 faa o wartira ɗum'en e ko ngaɗata,
o sennda neɗɗo e manngu becce muuɗum,
18 o danna ɗum e saabeere,
o hisina ɗum e feƴƴitinde nimre maayde.*
19 Naa du naawalla ina eelta neɗɗo dow leeso mum,
ƴi'e muuɗum ina mbuli hono yiite,
20 faa o yiɗaa yiide nyaamdu,
fay ɓurndu welude.
21 Terɗe makko pooƴii faa lalli e gite,
wo ƴi'e tan ɓanganta jiiɗo mo.
22 Yonki makko ina ɓattoo saabeere,
iki heɗii ittooɓe ki.
23 Ammaa si na woodani mo maleyka, curoowo,
gooto e ley maleyka'en ujunaaje ɓeen,
baawɗo wi'ude neɗɗo, «Inan ko haani,»
24 wooɗi yurmii ɗum,
wi'i «Hisin mo e saabeere,
miɗo woodi ko rimɗinta mo»,
25 ndeen kaa ɓanndu makko wartan hono ndu jokolle,
o laatoto jom semmbe hono ley cukaaku makko.
26 O nyaagoto Laamɗo, de kam du jaaboo mo,
de o wona yeeso muuɗum imo ilinira seyo.
Laamɗo du wartiran mo e dartaare makko.
27 O yiman yeeso woɓɓe o wi'a,
«Mi waɗii hakke, mi oonyiino ko dartii,
ammaa Laamɗo jukkoraaki kam ɗum.
28 O hisinii yonki am e saabeere,
mi wuuran ley annoora katin!»
29 Hey, Laamɗo ina waɗana neɗɗo noon
wanaa nde wootere wanaa nde ɗiɗi wanaa nde tati.
30 Imo hisina yonki neɗɗo e saabeere,
faa o yaynirana mo jayngol nguurndam.
31 Kakkilaa Ayuuba, nanaa ka mbi'ammi,
deƴƴina faa mi haala.
32 Si aɗa woodi ko mbi'ataa du, kaalanaa kam,
miɗo yiɗi faa keɓaa laamnaa hoore maa.
33 Si a walaa du, kettindanoɗaa kam,
deƴƴina faa mi ekintine hakkillo.