No Elihu haaldiri e yigiraaɓe Ayuuba
32
1 Wooɗi, yimɓe tato ɓeen celi jaabaade Ayuuba, sabo e jiile makko wo kanko jeyi goonga.2 Neɗɗo bi'eteeɗo Elihu ɓii Barkiilu e ley lenyol Busankooɓe, mo suudu Ram, kam du na tawaa ɗoon. Oon tikkanii Ayuuba faa wanaa heese. O ɓernanii Ayuuba sabo wi'ii kam jeyi goonga e dow Laamɗo. 3 Wooɗi o ɓernani yigiraaɓe muuɗum tato ɓeen du, sabo ɓeen keɓaay ko njaaboo Ayuuba, fay ko ɓe ndeki ɗum pelooje ɗuum.
4 Elihu oon ina heɗinoo heddiiɓe ɓeen faa timmina haala muɓɓen e Ayuuba de wadda ka muuɗum, sabo ɓeen na kecci ɗum. 5 Nde yi'unoo walaa haala ngokka ka tato ɓeen njaaboo Ayuuba fu, ɓernde muuɗum ummii sanne.
6 De o jaabii o wi'i:
— Miin kaa mi suka, onon le on nayeeɓe,
ɗuum waɗi de kulumi,
mi suusaay hollude on ko anndumi.
7 Mbiitiimi, «Accu nayeeɓe kaala,
jogiiɓe duuɓi kokka hakkillo.»
8 Ammaa ko hokkata neɗɗo paamal wo ruuhu,
wo foofaango Jom Baawɗe.
9 Wanaa jom duuɓi tan woodi hakkillo,
wanaa nayeejo tan anndi ko fonnditii.
10 Saabe majjum mbiimi, «Kettindanee kam!»
Miin du miɗo woodi ka kaalammi dow ko anndumi.
11 Wooɗi, mi heɗake kaalon tafon,
mi hettindake haala mon, mi jokkii to ka fonndii,
nde tefotonno fiirtude ka ndeen.
12 Mi wattii hakkillo am fuu dow mooɗon,
de ndaaree, walaa fuu tabintinɗo hakkunde mooɗon Ayuuba jeyaa goonga,
walaa jaabiiɗo haalaaji makko.
13 Kakkilee, taa mbi'on wo onon tan ngoodi hakkillo!
Laamɗo tan jaalotoo mo, wanaa neɗɗo.
14 Ayuuba le, haala muuɗum wanaa miin sappii,
sakko mi nawtoroo iri haalaaji mooɗon mi jaaboo ɗum.
15 Hey Ayuuba, si goonga yigiraaɓe maa ɓee fuu mbemmbaama,
ɓe mbaawataa jaabaade,
ɓe kunngii fuu ko ɓe mbi'ata.
16 Ko ɓe celi haalude ɗuum, tilay mi heɗoo miin du naa?
Mi munya sabo ɗo ɓe kaaɗi, walaa noototooɗo ma katin naa?
17 Miin du mi wattan baka am,
mi weƴƴitan ko anndumi miin du.
18 Ko njiɗumi haalude na heewi,
mi waawataa deƴƴinaade.
19 Si goonga nii, ɓernde am ina heewi faa na fusa,
hono sumalla kaɓɓaaɗo,
keewɗo lamminaaɗam muuyɗo fusude.
20 Tilay mi rufa haala am faa ɓernde am feewa,
mi omta hunnduko am mi fuɗɗa jaabaade.
21 Mi ɓurdintaa fay gooto ley ka mbi'ammi kaan,
mi welnataa haala am faa mi eyta goɗɗo.
22 Sabo mi anndaa welnude haala,
si mi waɗii noon fu, neeɓataa de taguɗo kam oon itta kam.