31
1 Mi haɓɓidii amaana e gite am,mi dekataa ndaarɗe am dow surbaajo.
2 Laamɗo gonɗo dow kammu, ɗume feccanta gaɗoowo noon?
Ɗume woni ngeɗu am to Jom Baawɗe gonɗo faa dow oon?
3 Wanaa halkere na heɗii oonyiiɗo naa?
Wanaa bonanda na heɗii gaɗoowo ko boni naa?
4 Si goonga Laamɗo ina yi'a laabi am fuu,
to njaaɓammi fuu, imo taykoo.
5 Si mi jokkii laawol fewre,
mi haranake hiila fu,
6 accu Laamɗo fonndira kam ponndirgal muuɗum goongawal,
faa anndita mi walaa feloore.
7 Si woodi nde mbosiimi laawol,
naa nde ɓernde am jokkii suuno gite am,
naa du juuɗe am tawraama ko tuuni,
8 si wo noon fu, accu ko aawumi laatoo nyaamdu goɗɗo,
ko fuɗi ley ngesa am du ɗoofee.
9 Si ɓernde am maatii suuno debbo goɗɗo,
naa du mi mogginanake dee gondo am,
10 accu deekam laatoo unanoowo goɗɗo,
woɓɓe ngaɗa mo ko njiɗi.
11 Sabo ɗuum laatotono ko semtinii sanne,
wo hakke kaanɗo jukkeede.
12 Hono ɗuum laatoto yiite gawgawtoowe,
nyaamoowe joomum faa laakara,
nge nyaaman ko ngoodumi fuu faa yottoo ɗaɗi.
13 Si maccuɗo am naa korɗo am wullitake kam,
de caliimi hettindaade fu,
14 noy ngaɗammi si Laamɗo ummanake kam?
Wakkati mo o noddi kam o ƴami kam, ɗume noototoomi?
15 Wanaa taguɗo kam ley reedu inna am tagi ɓe kamɓe du naa?
Wanaa taguɗo min ley reedu oon wo gooto naa?
16 Yalla na woodi nde caliimi ŋaarnde talkaajo naa?
Yalla na woodi nde mboynumi mo gorum maayii naa?
17 Naa du mi nyaamii nyaamdu am miin tan,
tawa mi yeɗaay ndu atiime'en naa?
18 Aa'a! Gilla mi suka mi laatake hono baaba atiime'en,
gilla ndimaami miɗo hakkilannoo ɓe goriraaɓe muɓɓen maayi.
19 Yalla na woodi mo nji'umi na halka saabe walaa kaddule naa?
Yalla woodi nde nji'umi talka mo walaa suddamaare de accirmi ɗum noon naa?
20 Yalla ɓe keɓaay kaddule cannyiraaɗe leeɓi baali am naa?
Wanaa ɓe maatii ko foowi de ɓe mbi'i Laamɗo barkina kam?
21 Yalla nyannde sariya mi hollii atiime ɓural,
sabo miɗo anndi mawɓe wuro keedanan kam naa?
22 Si laatorakeno hono noon fuu, accu ƴi'al junngo am ɗoofiree dow balawal am,
junngo am du sokkitee e soɓɓundu.
23 Si goonga miɗo hula bone mo Laamɗo neldata,
yeeso manngu muuɗum mi waawataa iri golleeji ɗiin fey.
24 Yalla mi wattii jikke am dow kaŋŋe,
naa mi miilake kaŋŋe dimo na waawi reenude kam naa?
25 Yalla mi meeɗii seyoraade jawdi am keewnoondi,
naa weltoraade keɓal am manngal ngaal naa?
26 Ko nji'umi no naange yaynirta,
naa du no lewru yaarata e darja,
27 yalla ɗum muuynake ɓernde am faa teddinmi ɗum e ley cuncukka,
de teddinirmi kujje ɗeen hono wo ɗe Laamɗo naa?
28 Ay, ɗum fuu ɗum laatantono kam hakke mo jukkorteemi,
sabo hollanno mi yeddii Laamɗo gonɗo dow kammuuli oon.
29 Yalla mi meeɗii seyoraade yiide ganyo am ley bonanda?
Naa ɓernde am welii saabe ko boni hewtii mo naa?
30 Miin le, mi meeɗaay accude hunnduko am waɗira hakke
e huɗude yonki makko.
31 Wooɗi du, wanaa yimɓe wuro am e ko'e muɓɓen ceedake mbi'i,
«Yalla na woodi mo haaraay teewu ley galle Ayuuba naa?»
32 Ay, gonɗo dow jahaangal meeɗaay waalude yaasin,
dammbugal am ina omtanii wonɓe e jahaale fuu.
33 Yalla na woodi nde cuddumi lutti am hono heddiiɓe,*
de cuuɗumi hakkeeji am ley ɓernde am naa?
34 Yalla mi waɗiri noon sabo miɗo hula jamaa,
naa mi hulii taa cuuɗi baaba keewɗi njawa kam,
faa ndeƴƴiniimi de ndammbiimi ley ɓaade am naa?
35 Tawee na woodunoo kettindaniiɗo wullaango am!
Inan maande am holloore wo goonga.
Accu Jom Baawɗe jaaboo kam!
Tawee mi heɓiino njiimi ɗerewol ngol ganyo am wullorii kam.
36 Sikke walaa si mi heɓii ngol fu, mi wakkorto ngol laaɓal ɓernde,
mi fiila ngol dow hoore am hono pilkol.
37 Mi ɓattoto mo hono ardiiɗo, tawee mi walaa kulol,
Mi limtana mo ko ngaɗumi fuu.
38 Si ngesa am woytirii kam,
faa gaafi magga fuu na mbulla,
39 si mi nyaamiino nafaa magga de mi yoɓaay,
naa mi torrii jeynooɗo nga,*
40 si wo noon fu, accu gi'e puɗa ley magga loomta alkama,
huɗo bonko du loomta gawri sa'iiri.
Ɗuum woni timmoode haala Ayuuba.