30
1 De joonin kaa, yimɓe na njalnoroo kam, fay ɓe keccumi,ɓe baabiraaɓe muɓɓen kewtaay jokkude dawaaɗi deenannooɗi baali am.
2 Ɗume semmbe maɓɓe nafirta kam?
Wo ɓe waatuɓe!
3 Ɓe pooƴirii baasal e weelo ɓaleewo,
faa iɓe ƴakka leydi njoorndi,
iɓe memmemta jemma ley nokkuuje kalkuɗe buuwaaɗe.
4 Iɓe itta haako haaɗuko iɓe nyaama,
iɓe njonnga fay ɗaɗi lekki faa ɓe ƴakka.
5 Wo ɓe riiwaaɓe e lenyol,
woɓɓe na pelɓa ɓe hono wuyɓe riiweteeɓe.
6 Sey ɓe njooɗoo buttuli gooruuji tellitiiɗi,
e nder gayɗe leydi e ley lohi kaaƴe.
7 Iɓe ciika ley cukkuri hono araaji,
iɓe kaamondira hakkunde leɗɗe gi'eeje.
8 Wo ɓe ɓiɓɓe fuuyɓe ɓolɓe,
ɓe riiwiraaɓe cabbi e leydi maɓɓe.
9 De joonin kaa, kamɓe njalnortoo kam e jimi,
mi laatanake ɓe banndirteeɗo.
10 Iɓe nefa kam, iɓe mboɗɗoo kam,
ɓe cemtataa tuɓtude dow yeeso am.
11 Ko Laamɗo taƴi semmbe am waɗi kam lo'uɗo,
ɗuum waɗi de iɓe ngaɗa kam no ɓe njiɗiri.
12 Jaayɓe na kawritana kam,
na liɓa kam.
Iɓe ndaba no ɓe kalkirta kam.
13 Iɓe paddoo laawol am,
iɓe piloo halkude kam,
ɓe kaajaaka fay gooto walla ɓe.
14 Iɓe njana kam hono no yanooɓe kelirta kokuwol noon.
Ko ngol helaa ɗuum du iɓe keddii iɓe tallitoo dow am.
15 Kujje kulɓiniiɗe kippake kam,
korsa am ruuyii hono henndu,
kisindam am du dillii hono ruulde.
16 Wooɗi, joonin yonki am soortaama,
balɗe torra nanngii kam.
17 Jemma fuu ƴi'e am na naawa hono ɗe njulan,
naawalla ɗaɗi am du feewataa.
18 Laamɗo nanngirii saaya am nyanngere,
naawalla ɗeɗɗirii kam hono daande saaya.
19 O liɓii kam ley loofal,
mi laatake hono sollaare e ndoondi.
20 Yaa Laamɗo, miɗo woya to maa, de a nootataako kam,
mi warii yeeso maaɗa, de aɗa ƴeewa kam tan.
21 A laatake nyannganɗo kam,
aɗa torrira kam e junngo maa ngo semmbe.
22 A ƴeptii kam dow henndu,
a accii ndu hooƴa kam,
aɗa dimmba kam nder kenhenam.
23 Sikke walaa miɗo anndi a yaaran kam maayde,
wuro ngo yonkiiji fuu kawrata.
24 De si goonga walaa ko ɓadiiɗo halkeede fiyee.
Si o wullii ley bone fu, wanaa o wallete naa?
25 Wanaa mi woyaniino gonɗo ley bone naa?
Wanaa ɓernde am yurmakeno talkaaɓe naa?
26 Ndelle miin du wo nii keɗorinoomi ko wooɗi,
de inan bone yottake,
miɗo heɗii annoora,
de inan nimre warii.
27 Ɓernde am fukkaaki, daraaki,
balɗe torra du kippake kam.
28 Miɗo yaha miɗo suddii nimre,
naange yaynantaa kam,
miɗo darii yeeso kawrital yimɓe,
miɗo wullitoo ballal.
29 Miɗo laatii jaadoowo e cuuli,
ndawuuje du wo banndiraaɓe am.
30 Nguru ɓanndu am ɓawlii ina hulsoo,
terɗe am ina taaya ley yiite.
31 Hoddu am laatake ndu bojji,
duko sereendu am du laatake ko woyooɓe.