Haala Ayuuba cakitiika
29
1 Ayuuba hooƴiti haala muuɗum, wi'i:2 — Taweno miɗo worruno hono arande,
wakkati mo Laamɗo reenannoo kam,
3 nde fitilla makko yaynannoo dow hoore am,
nde jayngol makko du yaarannoo kam ley nimre.
4 Ndeen le miɗo seyoronoo semmbe njokollaaku am,
yidde Laamɗo du na woni dow wuro am.
5 Jom Baawɗe na wondunoo e am,
sukaaɓe am du ina piilinoo kam.
6 Ndeen le kettungol suddannoo koyɗe am,
kaaƴe mbaylanannoo kam nebbam hono gooruwol.
7 Miɗo yahannoo dammbugal ngalluure to mawɓe kawritata,
miɗo jooɗonoo joonnde am to taliyaare ndeen.
8 Nde jokolɓe njiinoo kam fu ndiitorto yaage,
nayeeɓe du ummoto ndaroo faa teddina kam.
9 Ardiiɓe na ndeƴƴinoo,
na ommbira kunnduɗe muɓɓen juuɗe.
10 Saahiiɓe du na ngaɗa siw,
ɗemle muɓɓen na takka e ɗakkudi.
11 Nananɗo kam fuu wi'an mi barkinaaɗo,
jiiɗo kam du seedanto kam kabaaru lobbo.
12 Sabo mi hisiniino lo'uɗo bullitiiɗo kam,
e atiime mo walaa balloowo.
13 Ɓadiiɗo maayde yettii kam, du'ii barkinɗini kam,
mo gorum maayi du, mi waɗii yimirii seyo.
14 Dartaare laatanii kam ko ɓornotoomi,
saraade goonga du laatanii kam saaya e pilkol.
15 Mi laatanake bumɗo hono gite,
bonnguujo du hono koyɗe.
16 Mi laatanake talkaajo baaba,
fay wullitagol goɗɗo mo mi anndaa,
miɗo taykonoo haala muuɗum.
17 Mi helii nyiiƴe oonyiiɗo,
mi teetii mo o wuufunoo oon.
18 De miiliimi mi maayan e jam hakkunde horsinɓe kam,
caggal juutal balɗe ɗe mbaawaa limeede.
19 Ɗaɗi am na lanyirannoo to ndiyam yaade,
saawandere jemma du leppinannoo licce am.
20 Wakkati fuu teddeengal am na heyɗitannoo,
wakkati fuu semmbe am wo hono ɓaaru heyru.
21 Yimɓe na keɗonoo faa kettindanoo kam,
iɓe ndeƴƴinonoo faa ɓe nana tindinooje am.
22 Caggal mi haali du walaa kaaloowo katin,
konngol am toɓii dow maɓɓe hono ndiyam.
23 Iɓe keɗoronoo kam hono muuyɓe ndiyam kammu,
iɓe keppannoo haala am hono haajaaɓe ƴuwoonde yottinirde ndunngu.
24 No darja am foti noon, ɓe cuusaay goonɗinde wo miin nde moosannoomi ɓe ndeen,
ɓe ndaarii mbooɗirka dow yeeso am de ɓe keɓi semmbe.
25 Mi suɓanake ɓe laawol, laatiimi hooreejo maɓɓe,
miɗo jooɗii hono laamiiɗo hakkunde konunkooɓe muuɗum,
laataniimi ɓe du hono baaltinoowo woyooɓe.