To Hakkillo heɓetee
28
1 Sikke walaa, ina woodi to cardi wasetee,e nokku to kaŋŋe siiwetee moƴƴinee.
2 Njamndi ɓaleeri na ittee nder leydi,
mboɗeeri du na ƴuura e kaaƴe ciiwaaɗe.
3 Yimɓe njaalake semmbe nimre,
iɓe mbasa faa to ɓuri luggude,
iɓe tewta kaaƴe ley nimre ɓaleere kurum.
4 Iɓe mbasa ngayka to fay gooto walaa,
ley nokkuuje jeewniiɗe,
iɓe ngoni to woɗɗi e yimɓe ley leydi toon,
iɓe njipporoo ɓoggi iɓe ndimmboo.
5 Leydi le, na funna ko nyaametee dow muuɗum,
ammaa faa ley toon indi iirtee hono yiite.
6 Kaaƴe gonɗe toon wo tiiɗɗe korsuɗe bulabulaaje,
sollaare toon wo heewnde kaŋŋe.
7 Laawol jahoowol toon, walaa fuu foondu anndundu ngol,
yitere ciilal du yi'aay ngol abada.
8 Kulle ladde cemmbiɗinɗe meeɗaay yaaɓude dow maggol,
laddeeru meeɗaay jokkude ngol.
9 Neɗɗo na fusa kaaƴe ɓurɗe yoorde,
ina wasa faa ley ɗaɗi baamle.
10 Imo wasa lohi feere feere ley tefaaje,
imo yi'a iri kaaƴe korsuɗe fuu.
11 Imo sukka to ndiyam ɓulata toon,
o uuwta ko suuɗii o yaara e annoora.
12 Ammaa hakkillo le, toy woni?
Toy paamal du tawetee?
13 Walaa annduɗo to hakkillo jooɗii,
ngo tawataake ley adunaaru ɗo.
14 Diyeele lugguɗe mbi'ii ngo walaa ley muɓɓen,
maayo du wi'ii ngo walaa to muuɗum.
15 Ngo waawaa soodireede kaŋŋe dimo,
cardi du fotaay soodude ngo.
16 Ngo waawaa soodireede fay e kaŋŋe dimo,
ingo ɓuri kaaƴe tiiɗɗe korsuɗe darja.
17 Ngo waddondirtaake e kaŋŋe naa du kaaƴe jiitorteeɗe korsuɗe,
ngo wattondirtaake e kaŋŋe coɗeteeɗo fuu.
18 Ngo fonndataake e kaaƴe boɗeeje korsuɗe naa du e ɗelkooje,
ingo ɓuri luuluuje tiiɗude.
19 Ngo nanndintaake e kaaƴe oole ƴuurooje faa leydi Kuus,
ngo fonndataake fay e kaŋŋe dimo.
20 Hakkillo le, toy ƴuuri?
Toy paamal du tawetee?
21 Hakkillo suuɗaama ko woodi yonki fuu,
ngo wiirnaama fay e gite pooli piirooji.
22 Halkere e maayde mbi'ii:
«Kabaaru tan min nani dow maggo.»
23 Paamanɗo laawol maggo wo Laamɗo,
kam anndi to ngo tawetee.
24 Sabo kanko waawi ndaarude haddu keeri adunaaru fuu,
imo yi'a ko woni ley mayru fuu.
25 Ko o tagi henndu o fonndi teddeefi mayru,
o etani maayo du ndiyam muuɗum,
26 o hokki ƴuwoonde yamiroore,
o seekani riggaango du laawol.
27 Wakkati oon o ndaari hakkillo ngoon,
o humpiti kabaaru maggo.
O tabintini ngo,
tawi o hiinyii ngo.
28 De o wi'i neɗɗo:
— Ndaar! Kulol Joomiraaɗo, kam woni hakkillo,
wosaade ko boni du woni paamal.