Hunayeere Ayuuba
27
1 Ayuuba ɓeydi haala muuɗum, wi'i:2 — Mi hunorake innde Laamɗo kaɗuɗo kam goonga,
mi hunorake Jom Baawɗe, gattuɗo kaaɗeefi ley ɓernde am,
3 si ni miɗo heddodii e yonki,
si ni Laamɗo hokkii kam foofaango fu,
4 hunnduko am fewataa,
ɗemngal am du toɓataa hiila.
5 Mi wi'ataa oɗon ngoodi goonga abada!
Faa mi maaya mi seedataa e laaɓal am.
6 Miɗo tiigii goonga am faa teeŋi,
mi yoppataa o.
Ɓernde am na laaɓi,
felataa kam haddi balɗe am fuu.
7 Accu ganyo am laatoo hono bonɗo,
accu ummaniiɗo kam fuu heɓa ngeɗu oonyiiɗo.
8 Sabo mo hulataa Laamɗo oon,
si Laamɗo ittii ɗum, hooƴii yonki mum fu,
jikke oye heddanii ɗum katin?
9 Yalla si torra ukkake e makko,
Laamɗo nanan bojji makko naa?
10 Yalla o weltorto Jom baawɗe naa?
O noddan Laamɗo wakkati fuu naa?
11 Mi ekintinan on kabaaru baawɗe Laamɗo.
Ko woni to Jom Baawɗe ɗuum mi suuɗataa ɗum.
12 Sikke walaa, on fuu on njiirii ɗum gite mooɗon.
Ndelle ɗume waɗi de laatiɗon ɓolɓe ɓe nafataa?
13 Ndaar ko laatii ngeɗu bonɗo to Laamɗo,
inan ko waɗooɓe ko boni keɓata to Jom Baawɗe:
14 Si ɓiɓɓe makko ɓeydake sanne, wo faa laatoo ngeɗu kaafaahi,
taaniraaɓe makko ceedataa e rafo.
15 Hisuɓe ngo ɓeen, nyawuuji uwan ɗum'en,
rewɓe muɓɓen du mboyataa maayde muɓɓen.
16 Fay si bonɗo oon tilii cardi hono njaareendi,
hawrondirii kolte hono tile leydi,
17 ko hawrondiri ɗuum fuu, wo fonnditiiɓe ɓornotoo,
de ɓe ngaɗaay ko boni ɓeen du pecca cardi makko ndiin.
18 Suudu ndu o nyiɓi na nanndi e suudu cancanƴowal,
wo hono danki ki doomoowo darni.
19 O fukkowake o jom jawdi, ammaa o ummodataako e mayri katin,
si o feertii gite makko fu, o tawan ndi dillii.
20 Ko hulɓinii ina wubba mo hono ndiyam ndoggoojam,
kenhenam wuuwan mo hakkunde jemma.
21 Henndu lettugaaru hooƴan mo,
o yi'ataake katin,
ndu fiisan mo e nokku makko.
22 Indu ruuyna mo, ndu yurmataako,
imo dogga haddi semmbe makko faa o daɗa.
23 Indu hellana mo juuɗe, indu jalnoroo mo,
indu wooka mo e ley nokku makko.