No Ayuuba jaaborii wi'i Laamɗo wo jom baawɗe mawɗe
26
1 Ndeen Ayuuba jaabii wi'i:2 — Kay! A baawɗo wallude mo walaa semmbe koy!
Ndaar no kisinirɗaa tampuɗo.
3 Ndaar no ekintinirɗaa mo walaa hakkillo,
a tindinii mo tindinooji caral!
4 Moy walli ma e haala ka?
Ko mbiiɗaa ɗuum fuu, wo miilooji moy?
5 Beeli maayɓe na ndiwna,
to ɗi keddii faa ley maayo luggungo toon,
e ko wondi e majji fuu.
6 Nokkuure ndeen suuɗanaaki Laamɗo,
nokku halkere du walaa ko suuɗi ɗum.
7 Laamɗo weƴƴitii soɓɓirre dow ɓolum,
o ɓilii adunaaru dow mbeeyu ɓolu.
8 O saawi ndiyam ley duule makko tekkuɗe,
de duule ɗeen du pusaay ley teddeefi muɓɓen.
9 O huurii yeeso jooɗorgal laamu makko,
o weƴƴitii duule, o ommbii ngal.
10 O diidii keerol dow diyeele hono taarde,
faa laatoo keerol hakkunde annoora e nimre.
11 Si o felɓii fu,
bimmbeeje kammu ndiwnan,
ina mbemmboroo kulol.
12 E baawɗe makko o deƴƴinirii maayo,
e hakkillo makko o tappiri Rahab, kuunga ndiyam ngaan.
13 Foofaango makko fiisi kammu,
junngo makko tappi mbolla kulɓiniinga ndoggoowa ngaan.
14 Ɗum fuu wo puɗɗe golleeji makko tan,
hono sownaango tan naneten to makko!
Ammaa moy foti faamude baawɗe makko diggotooɗe ɗeen?