8
1 Moy fonndetee e hakkilante?Moy waawi yiitude maanaa goɗɗum?
Hakkillo na laaɓina yeeso tagaaɗo,
ngo lallina ɓalingo muuɗum.
Haala ɗowtagol laamiiɗo
2 Miin le, inan ko tinndinammi: kaybaa haala kaananke, sabo ɗum woni hunayeere nde ngaɗɗaa yeeso Laamɗo. 3 Taa karanoɗaa woɗɗaade mo. Taa ciinaa daranaade ko boni du, sabo ko o muuyi ɗuum o waɗata. 4 Wo haala kaananke kaan laamii, walaa bi'oowo mo: «Ɗume ngaɗataa nii?»
5 Jokkuɗo yamiroore makko fuu wuurdan jam. Ɓernde hakkilante du annditan huunde fuu e waawtu muuɗum e no jeyi waɗireede. 6 Sabo huunde fuu e wakkatim e ngaɗuki muuɗum, ammaa torra ɓii Aadama na mawnani ɗum. 7 Si goonga o anndaa ko waroyta. Moy hollata mo ko waɗoyta yeeso?
8 Walaa fuu jogiiɗo baawɗe dow yonki muuɗum,
walaa du baawɗo neeɓtinande maayde,
walaa mo nde yoppata si wawtum hewtii.
Walaa fuu joppeteeɗo wakkati wolde,
noon du woni bonanda yoppirtaa bonɗo.
Haala dow bonɓe e lobbuɓe
9 Mi yi'ii ɗum fuu nde miilinoomi sanne dow ko waɗetee ley sorndu naange fuu. Mi yi'ii tagaaɗo na jaaloo banndum, waɗa ɗum ko boni. 10 Katin mi yi'ii bonɓe na uwee. Iɓe naatannoo suudu seniindu iɓe mburtowoo, de iɓe manee ley ngalluure to ɓe ngaɗannoo ko boni toon.* Ɗum du fuu wo ɗum ɓolum.
11 Ko bonɓe carataake law ɗuum waɗi de ɓerɗe ɓiɓɓe Aadama na kebbinaa waɗude ko boni. 12 Si goonga, gaɗoowo hakke ina waawi waɗude ko boni kile hemre wooɗi balɗem njuutaa, ammaa miɗo anndi wo kuloowo Laamɗo kam heɓoyta ko wooɗi saabe kulol muuɗum Laamɗo. 13 Ammaa bonɗo heɓataa jam sabo hulataa Laamɗo. Balɗe muuɗum njuutataa no ɗowki lekki juutirta laasara peewɗo.
14 Ina woodi huunde ɓolde katin waɗeteende ley adunaaru: dartiiɓe ina njeɗee ngeɗu bonɓe de bonɓe njeɗee ngeɗu dartiiɓe. Ɗum du fuu wo ɗum ɓolum.
15 Ɗum waɗi de teddinmi weltaare. Walaa fuu ko nafata neɗɗo ley sorndu naange ndu si wanaa nyaama, yara, weltoo. Ɗum ɗowtata golleeji muuɗum tampiriiji e nyalaaɗe ɗe Laamɗo hokki mo ley sorndu naange ndu.
16 Mi waɗiino anniya faamude ko woni hakkilantaaku, e taykaade golleeji ɗi tagaaɗo gollata ley adunaaru faa gite mum meeɗataa ɗoyngol jemma e nyalooma fuu. 17 Ndeen nji'umi ko Laamɗo waɗi fuu. Fay gooto waawaa faamude ko waɗata ley sorndu naange ndu. No joomum filorii ɗum fuu yiitataa. Fay si hakkilante wi'ii na anndi du, waawataa yiitude.