Hakkillo nafoowo nguurndam
7
1 Anndireede ko wooɗiina ɓuri anndireede uurdi.
Nyannde maayde
ina ɓuri nyannde rimeede.
2 Yaade galle maayraaɗo
ina ɓuri yaade galle jom fijo,
sabo maayde wo cakitte neɗɗo fuu,
sey buurɗo fuu miiloo ɗum e ley ɓernde mum.
3 Cunu na ɓuri jaleeɗe
ngam cunu na niɓɓina yeeso de na laamna ɓernde.
4 Ɓernde hakkilante wonaanaa suudu maayraaɗo,
de ɓernde puuyɗo wo suudu fijirde.
5 Hettindaade pelooje hakkilante
na ɓuri hettindaade jimi puuyɗo.
6 Jaleeɗe puuyɗo ina nandi e sawtu gi'e kuɓɓooje
ley fayande.
Ɗum du fuu wo ɗum ɓolum.
7 Hollude ɓural na bonna jom hakkillo faa laatoo puuyɗo,
njeenaari ndi dagaaki du na tuunina ɓernde.
8 Timmoode huunde na ɓuri fuɗɗoode mum,
munyal du na ɓuri manngu becce.
9 Taa njaawaa ɓernude
sabo ɓernugol tawataakenaa e ɓernde puuyɗo.
10 Ndeentoɗaa e ƴamude, «Ko waɗi de arande na ɓuri hannden?»
Filaade paamal majjum wanaa hakkillo.
11 Hakkilantaaku ina wooɗi hono ndongu laaɓungu,
ina nafaa warooɓe ley adunaaru sorndu naange ndu.
12 Hakkilantaaku na reena hono no buuɗi reenirta joomum nii,
ammaa nafaa hakkillo ina ɓuri noon:
Ingo wuurna joomiingo.
13 Ndaaraa golle Laamɗo.
Moy waawi turtude ko o turi?
14 Nyannde weltaare finii fu, mbeltoɗaa.
Nyannde mettorgal finii du, miiloɗaa,
sabo Laamɗo waɗii ɗe ɗiɗi fuu.
Ndelle tagaaɗo waawaa faamude ko warata.
15 Ley nguurndam am ɓolam ɗam, walaa fuu ko mi yi'aay:
maayde dartiiɗo e ley dartaare muuɗum,
e bonɗo juunnaaɗo balɗe
de na heddi e bonanda muuɗum.
16 Taa ɗuuɗin fonnditaare maa,
wooɗi du taa kollitoɗaa a jom hakkillo sanne
de pooɗanaa hoore maa halkere.
17 Taa ɗuuɗin bone maa,
wooɗi du taa laatoɗaa puuyɗo,
de maaya illa wakkati maa hewtaay.
18 Na wooɗi njogitoɗaa ɗum ɗo
de taa njoppaa ɗum too du.
Kulɗo Laamɗo jogoto ɗiɗum fuu.
19 Hakkilantaaku ina semmbinɗina joomum
faa ɓura worɓe sappo ardiiɓe ngalluure.
20 Ley adunaaru ɗo, walaa neɗɗo fay gooto dartiiɗo
gaɗoowo ko wooɗi mo walaa hakke.
21 Taa ngattaa hakkillo maa e ko nanataa fuu
de nanaa maccuɗo maaɗa na yenne,
22 sabo aɗa anndi aan e hoore maa
a yenniino woɓɓe.
23 Ɗum fuu mi hiinyirii ɗum hakkillo, mbiimi: «Mi laatoto hakkilante», de tawumi ina woɗɗi kam. 24 Faamude no kujje ngorri na luggi, na tiiɗi faamude. Moy waawi yi'ude ɗum?
25 Mi tinnake e filnde e faamude e hiinyude hakkilantaaku, wooɗi mi faama no puuyndam boniri e no cuubu laatorii kaanɗi.
26 Mi yi'ii ko ɓuri maayde kaaɗeefi: debbo laatiiɗo tuugol, mo ɓernde teppol e juuɗe callali. Kuloowo Laamɗo fu hisan mo, ammaa o nannginan gaɗoowo hakke.
27 Tindinoowo wi'i «Wooɗi, inan ko taykiimi: Mi hiinyii huunde fuu gootel gootel faa mi yiita, 28 de faa hannden mi yiitaay ko pilotonoomi ɗuum. Si goonga ley worɓe ujunere mi yi'ii gooto dartiiɗo ammaa ley rewɓe kaa mi yi'aay fay gooto. 29 De inan ko njiimi ley tayka am: Laamɗo tagii neɗɗo wo ponnditiiɗo, ammaa o tewtanii hoore makko dabareeji ɗuuɗɗi.»