6
1 Mi taykake bonanda goɗɗo na sori naange nge, de bonanda oon na teddani ɓii Aadama: 2 Na woodi mo Laamɗo hokki jawdi e danyal e darja faa huunde fuu nyakaay mo, ammaa Laamɗo hokkaay mo weltoraade ɗum, wo goɗɗo nawtortoo ɗum. Ɗum fuu wo ɗum ɓolum, wo bone mettinoowo ɓernde.3 Neɗɗo na waawi heɓude sukaaɓe hemre de juuta balɗe, ammaa no o juutiri balɗe fu, si o weltoraaki keɓal makko, o heɓaay uweede wooɗa fu, miɗo waawi wi'ude cukalel ngel rimdaaka e yonki na samti mo. 4 Ngel warii ɓolum, ngel dilli e nimre, walaa fuu nanuɗo innde maggel. 5 Ngel yi'aay naange, ngel anndaa fay gootum, de inngel ɓuri oon gorko heɓude fowtere, 6 fay si o wuurnoo duuɓi ujunaaje sowre, nafataa si o weltoraaki nguurndam makko. Wanaa timmoode yimɓe fuu laatoto gootum naa?
7 Ko neɗɗo tampanta fuu
wo faa hebbina hunnduko muuɗum,
de ko haarataa abada.
8 Ɗume goodal jom hakkillo ɓurdi ngal puuyɗo?
Talka annduɗo no wondirta e yimɓe du,
nafaa oye heɓata?
9 Halal maa ngal njogiɗaa
na ɓuri ko miilotoɗaa heɓude.
Ɗum du fuu wo ɗum ɓolum, wo riiwude henndu.
10 Huunde fuu na woodi innde muuɗum,
ɓii Aadama du na anndaa no wa'i.
Fay gooto suusataa haɓude e ɓurɗo ɗum semmbe.
11 Si haalaaji keewii fu, ko nafataa du heewan.
Ɗume ɗum nafata ɓii Aadama?
12 Moy waawi anndude ko moƴƴani neɗɗo ley nyalakoy muuɗum ɓoloy kooy? Fuu wo paltotookoy hono ɗooki. Moy waawi hollude mo ko waroyta ley adunaaru sorunde naange caggal dillugol makko?