5
1 Taa hunnduko maa haranoo haalude,taa ɓernde maa du yaawa aadanaade Laamɗo.
Laamɗo ina woni dow, aan du aɗa woni ley,
ndelle taa kebbinaa haalaaji maa.
2 No koyɗol wardata si miilooji keewii noon,
puuyndam du heɓirtee si haalaaji keewii.
3 Njottinaa aadi mo kunaniɗaa Laamɗo oon law.
Laamɗo yiɗaa puuyndam, ndelle kiɓɓinaa aadi mo aduɗaa oon law.
4 Rafi hunaade ɓuri hunaade de waɗaay ko hunii ɗuum. 5 Taa accu hunnduko maaɗa waddane hakke. Nde njahuɗaa to nulaaɗo Laamɗo ndeen fu, taa mbi'aa: «Mi hensaaki.» Ko saabii de aɗa mettina ɓernde Laamɗo faa halka golleeji maaɗa? 6 Si goonga haalirde noon laatoto hono koyɗi keewɗi naa haalaaji keewɗi ɓoli. Ndelle kulaa Laamɗo.
Haala torra heɓude jawdi
7 Si a yi'ii talkaajo na tampinee ley leydi, sariya e dartaare fuu na oonyee, taa ɗum haayne, sabo mawɗo fuu, goɗɗo woni dow muuɗum, oon du, goɗɗo katin woni dow mum. 8 Nafaa leydi na woodani yimɓe fuu. Fay kaananke wo e ndemri wuuri.
9 Jiɗɗo ceede, ceede keƴataa ɗum,
jiɗɗo danyal, ko heɓi fuu heƴataa ɗum.
Ɗum du fuu wo ɗum ɓolum.
10 Si ni jawdi ɓeydake fu,
nyaamooɓe ndi du ɓeydoto.
Ɗume woodani joomiiri oon
si wanaa ko yiirata ndi yitere muuɗum tan?
11 Ɗoyngol golloowo na weli ɗum,
nde nyaami seeɗa e nde nyaami sanne fuu.
Ammaa keewal jawdi na haɗa joomum ɗaanaade.
12 Mi yi'ii bonnde mawnde e ley sorndu naange ndu: jawdi paggaandi na halka joomum, 13 wooɗi ndi mursirte masiiba, faa joomiiri rima de hunngoo ko sukka ɓiyum.
14 E ɓolum neɗɗo wurtoto reedu inna mum, e ɓolum du soƴƴoto no wardunoo. Walaa fuu ko o tammbata e junngo makko o dillida ley ko o tampanannoo ɗuum. 15 Walaa ko ɓuri ɗum bonde. No o wardunoo noon o soƴƴortoo. Ɗume golleeji makko ɗiin nafi mo? Henndu tan o gollani. 16 Nguurndam makko fuu tawaama ley nimre, ina heewi du kaɓɓu-ko'u e torra e mettorgal.
17 Inan ko njiimi: ko wooɗi e ko leeɓi ɗuum wo neɗɗo nyaama, yara, weltoroo golleeji muuɗum tampiriiji ley naange nge haddi nyalakoy koy Laamɗo hokki ɗum kooy. Sabo noon ngeɗu muuɗum foti. 18 Katin du ɓii Aadama fuu mo Laamɗo hokki jawdi e danyal de hokki ɗum nawtoraade ɗum fuu, joomum jaɓa ngeɗu muuɗum de weltoroo ko tampani, wo ɗum dokkal Laamɗo. 19 O yaawataa miccaade balɗe makko paltiiɗe, sabo Laamɗo soƴƴii hakkillo makko fuu e weltaare nde hokki mo ndeen.