Haala naawalla adunaaru
4
1 Mi ndaarii katin, nji'umi torraaji gaɗeteeɗi ley adunaaru sorndu naange ndu:Mi yi'ii gonɗi tampinteeɓe de fay gooto walaa faa waaltina ɓerɗe muɓɓen. Tampinooɓe ɗum'en ɓeen na njogii semmbe wooɗi fay gooto walaa faa waaltina ɓerɗe muɓɓen. 2 Ndelle mbiimi maayɓe ina ɓuri wuurɓe seyo, 3 de ɓurɗo ɓernde welnde woni mo rimaaka tafon, sabo oon woni mo yi'aay bonnde waɗeteende ley sorndu naange ndu.
4 Mi ndaarii tawumi haddi golleeji tampiriiji e ko heɓirtee e majji fuu wo kiram waddata ɗum. Ɗum du fuu wo ɗum ɓolum, wo riiwude henndu.
5 Jiiɓiiɗo na nyobba juuɗe muuɗum
de bonna hoorem.
6 Tambannde wootere ley jam
na ɓuri tambanɗe ɗiɗi ley tampiri
e riiwude henndu.
7 Katin du mi taykake huunde ɓolde ley sorndu naange ndu: 8 Inan neɗɗo gonɗo kam tan mo walaa ɓiɗɗo, walaa sakiike. De golleeji muuɗum tampiriiji timmataa abada, jawdi du heƴataa ɗum, de na ƴamitoo na wi'a: «Moy ngollanammi golleeji ɗi? Ko saabii miɗo haɗitoo mbelirka?»
Ɗum fuu wo ɗum ɓolum e donngal mettungal.
9 Ɗiɗo na ɓuri gooto sabo keɓan njobdi lobbiri e ley golleeji muɓɓen ɗi tampanta ɗiin.
10 Si gooto saamii, ooto umminan ɗum.
Ammaa ko yurminii ndaarude wo gooto mo walaa ballo,
si saamii fuu, walaa umminoowo ɗum.
11 Katin, si ɓe ɗiɗo fuu ɓe pukkodake ɓe poowondira,
de noy gooto foowinirta hoorem?
12 Kabdo na waawi jaalaade neɗɗo gooto,
de jaalaade ɗiɗo kaa na tiiɗi.
Ɓoggol kawaangol kile tati yaawataa taƴude.
Fooɗande hoorem laamu wo ɓolum
13 Jokolle talkaajo jom hakkillo ina samti kaananke nayeejo puuyɗo mo jaɓataa tindinooje, 14 fay si jokolle oon wurtii kasu de laatii kaananke, naa rimaa wo talka de laamii.
15 Mi taykake yimɓe soruɓe naange ɓeen fuu ndewii mo, kanko loomtuɗo nayeejo oon. 16 Wooɗi, artiiɓe mo e adunaaru na keewi faa limataako. De warooɓe caggal makko kaa ceyortaako mo. Ɗum du fuu wo ɗum ɓolum, wo riiwude henndu.
Haala kulol Joomiraaɗo
17 Ndeentoɗaa e hoore maa si aɗa yaha suudu Laamɗo. Yahude hettindoo na samti sakkude ko fuuyɓe cakkata ɗuum, sabo ɓeen kaa anndaa yalla na ngaɗa ko boni.