Huunde fuu e wakkati muuɗum
3
1 Huunde fuu na woodi wakkati muuɗum, ko sori kammu fuu na woodi nde waɗata:2 Rimeede e wakkatim,
maayde du e wakkatim,
aawre e wakkatim,
tayri du e wakkatim,
3 ittude yonki e wakkatim,
dannude du e wakkatim,
liɓude e wakkatim,
nyiɓude du e wakkatim,
4 wullude e wakkatim,
jalude du e wakkatim,
cunu e wakkatim,
bami du e wakkatim,
5 sankitinde kaaƴe e wakkatim,
hawrondirde ɗe du e wakkatim,
ɓadondirde e wakkatim,
woɗɗondirde du e wakkatim,
6 tewtude e wakkatim,
mursude du e wakkatim,
resude e wakkatim,
faɗɗude du e wakkatim,
7 seekude e wakkatim,
nyootude du e wakkatim,
deƴƴude e wakkatim,
haalude du e wakkatim,
8 yiɗude e wakkatim,
wanyude du e wakkatim,
wolde e wakkatim,
jam du e wakkatim.
9 Nafaa oye golloowo heɓata ley golleeji muuɗum? 10 Mi yi'ii donngal ngal Laamɗo ronndi ɓiɓɓe Aadama. 11 Laamɗo waɗirii huunde fuu no wooɗiri e wakkati muuɗum. O wattii ley ɓernde ɓii Aadama miilaade ko duumotoo, de fay e noon waawataa faamidinde golleeji ɗi Laamɗo waɗi gilla fuɗɗoode faa timmoode. 12 Mi faamii walaa ko ɓurani neɗɗo wuurdude seyo e weltaare haddi balɗe muuɗum. 13 Neɗɗo heɓa nyaama, yara, de weltoroo golleeji muuɗum ɗi tampani, wo dokkal Laamɗo.
14 Miɗo anndi ko Laamɗo waɗi fuu tabitan faa abada.
Walaa fuu ko ɓeydee,
walaa du ko ɗuytee.
Noon Laamɗo waɗiri faa hulee.
15 Ko woni hannden fuu waɗiino arande,
ko waɗoyta jaango du waɗiino,
Laamɗo wartiran ko waɗunoo faltii du.
Haala neɗɗo e mardi
16 Inan ko taykiimi katin ley sorndu naange ndu:
Ley suudu sariya wo bonde yonki won toon,
to kiite taƴetee du bonde yonki heewi toon.
17 Mbiitiimi Laamɗo hiitoto ponnditiiɗo e bonɗo fuu sabo huunde fuu na woodi wakkati muuɗum, gollal du fuu wakkati sariya muuɗum. 18 Mbiitiimi e dow ɓiɓɓe Aadama, Laamɗo na ndaartindoo ɗum'en faa paama ko ɓuraa daabaaji. 19 Cakitte ɓiɓɓe Aadama e ɗe daabaaji ceedaay, ko ɓe podanaa ɗuum ina heɗii ɓe. No ɓee ɗo maayrata noon, ɓee to du maayrata. Mono e maɓɓe fuu foofaango wooto woodi. Walaa fuu ko ɓii Aadama ɓurdi daaba. Ɗum fuu wo ɗum ɓolum. 20 Fuu wo nokkuure wootere ponndii, fuu e sollaare ƴuuri e sollaare du coƴƴoto. 21 Moy anndi yalla ruuhu ɓiɓɓe Aadama ƴeenyataanaa dow kammu de mo daabaaji jippoo ley leydi?
22 Mi faamii walaa fuu ko ɓurani ɓii Aadama weltoraade golleeji muuɗum sabo ɗuum woni ngeɗu mum. Sabo moy waawi wartiroyde mo faa o yi'a ko waɗata caggal makko?