Wolde hakkunde Israa'iilankooɓe e Filistiyankooɓe
20
1 Ley puɗɗam hitaande rewtunde, wakkati kaanankooɓe mboowi yaade konu, Yo'ab ardii ornde konunkooɓe mawnde de halkowi Amoninkooɓe. Ɓe piilowii galluure Rabba. Daawda kaa, heddii Urusaliima. Yo'ab jaalii Rabba de halki ɗum. 2 Daawda itti kufune dow hoore kaananke oon. Teddeefi kufune oon wo kilooji kaŋŋe 34. Hayre horsunde tiinde coggu na takkaa e kufune oon. Nde hippaa dow hoore Daawda. O hooƴi gineeji galluure ndeen keewɗi. 3 O wurtini yimɓe tawanooɓe ley galluure ndeen de o watti ɗum'en e golle tiiɗɗe. O watti ɓe e soppugol leɗɗe e sehugol kaaƴe. Noon o waɗi galluuje Amoninkooɓe fuu. Caggal ɗuum o yecci Urusaliima kanko e geɓe konunkooɓe makko fuu.Wolde hakkunde Israa'iilankooɓe e Filistiyankooɓe
4 Caggal ɗuum wolde waɗi hakkunde Filistiyankooɓe e Israa'iilankooɓe ley wuro Gejer. Wo ndeen Sibbekay, mo Husa wari Sippay, gooto e Refayinkooɓe. Ndeen Filistiyankooɓe cemtinaa laatii gollanooɓe Israa'iilankooɓe.
5 Wolde e Filistiyankooɓe ummii katin. Elhanan ɓii Ya'ir wari Lahami sakiike Goliyat mo Gat mo tekkeefi labbo muuɗum hewtannoo leggal canyirgal oon.
6 Wolde wonnde waɗi Gat. Gorko gomma tawaama toon mo darnde mawnde sanne. Kolli makko juuɗe e koyɗe fuu wo jeegom jeegom, ndelle imo woodunoo kolli 24. Oon du, wo Rafayinke. 7 Imo wonnoo imo toonyoo Israa'iilankooɓe de Jonatan ɓii Simeya sakiike Daawda wari o. 8 Worɓe ɓeen fuu wo yimɓe ƴuuruɓe Gat, taaniraaɓe Rafa. Daawda e sordaasiiɓe muuɗum mbari ɓe.