Limgal Israa'iilankooɓe ngal Daawda waɗi
21
1 Seyɗaani ummanii Israa'iila, hiili Daawda lima Israa'iilankooɓe. 2 Ndeen Daawda haaldi e Yo'ab e mawɓe Israa'iila wi'i ɗum'en:— Njehee limowee Israa'iilankooɓe gilla Beerseba faro horɗoore faa yottoo Dan faro soɓɓirre de ngaron kollon kam. Noon waɗata faa mi faama limoore maɓɓe.
3 Yo'ab jaabii wi'i:
— Joomiraaɗo ɗuuɗina yimɓe muuɗum faa waɗa kile hemre. Kaananke, joomam, ɓe fuu wanaa wo aan dawranta ɓe naa? De ko saabii de aɗa haajaa waɗude ɗuum? Ko ɗume de aɗa nanna Israa'iila ley feloore?
4 Ammaa kaananke doolɗi Yo'ab. Ndelle Yo'ab wurtii waancoowi leydi Israa'iila fuu de yecci warti Urusaliima. 5 O hokki Daawda limoore yimɓe Israa'iila. Ley leydi Israa'iila fuu worɓe 1 100 000 hewtuɓe tiigaade kaɓitirɗe. Ley Yahuuda du, worɓe 470 000 hewtuɓe tiigaade kaɓitirɗe. 6 Yo'ab oon limaay Lewinkooɓe e yimɓe Benyamin fuu sabo ko kaananke yamiri ɗuum na mettunoo ɗum sanne. 7 Ɗum fotanaay Joomiraaɗo de jukkii Israa'iila.
No Joomiraaɗo jukkorii boofol Daawda
8 Daawda wi'i Laamɗo:
— Mi waɗii hakke mawɗo saabe majjum. Joonin oo, miɗo ŋaare njaafoɗaa hakke mo miin maccuɗo maaɗa ngaɗumi oon, sabo mi waɗirii ɗum e rafi hakkillo.
9 Joomiraaɗo haaldi e Gad, annabaajo gollanoowo Daawda wi'i ɗum:
— 10 Yahu mbi'aa Daawda: Inan ko Joomiraaɗo wi'i: «Mi suɓnondinte masiibaaji tati, cuɓoɗaa gootel ngel njukkortoomi ma.»
11 Gad yehi to Daawda de wi'i ɗum:
— Inan ko Joomiraaɗo wi'i: «Aan njeyi suɓaade: 12 Maa duuɓi tati ley rafo, maa saamude e torra kaafaahi wayɓe ma ley lebbi tati, maa balɗe tati ley kaafaahi Joomiraaɗo e nyawu ndaaɓoowu ley leydi Israa'iila e maleyka Joomiraaɗo gaddoowo masiibaaji dow leydi Israa'iila fuu. Joonin le, miiloɗaa de kollaa kam ko mbi'ammi neluɗo kam oon.»
13 Daawda wi'i Gad:
— Miɗo wondi e mettorgal manngal. Mi saama e ley kiite Joomiraaɗo ɓurani kam, sabo miɗo anndi yurmeende muuɗum na mawni, ammaa taa mi saama e juuɗe yimɓe.
14 Ndeen Joomiraaɗo neldi nyawu ndaaɓoowu ley leydi Israa'iila de wari worɓe 70 000.
15 Joomiraaɗo neli maleyka Urusaliima faa jippina masiiba oon. Ammaa wakkati maleyka oon wonnoo na halka galluure ndeen, Joomiraaɗo mimsiti bonanda oon de haaldi e maleyka kalkoowo oon wi'i ɗum:
— Heƴii! Jippin junngo maaɗa.
Tawi nelaaɗo oon na darinoo ɗakkol ƴarorde Ornan, Yebusinke. 16 Daawda ɓanti gite muuɗum de yi'i nelaaɗo Joomiraaɗo oon hakkunde kammu e leydi na foorti kaafaahi muuɗum dow Urusaliima. Ndeen Daawda e mawɓe Israa'iila caami e leydi, tawi na ɓorninoo kaddule bootooji. 17 Daawda wi'i Joomiraaɗo:
— Yalla wanaa miin yamiri yimɓe Israa'iila limee naa? Ndelle wo miin waɗi hakke, miin waddi bone oon. Ammaa coggal ngal le, ɗume ngal waɗi? Yaa Joomiraaɗo Laamɗo am! Ndelle kiite ma saama dow am e dow suudu am tan. Miɗo ŋaare taa njukkoroɗaa yimɓe maaɗa ɓeen masiiba.
Daawda nyiɓani Joomiraaɗo sakkirde
18 Maleyka Joomiraaɗo oon wi'iino Gad haalda e Daawda wi'a ɗum yaha nyiɓanowa Joomiraaɗo sakkirde dow ƴarorde Ornan, Yebusinke oon. 19 Daawda ummii yehi fodde no Joomiraaɗo yamiri ɗum e hunnduko Gad noon. 20 Tawi Ornan na wonnoo na tappa alkama muuɗum. O waylitii de o yi'i maleyka oon. Ɓiɓɓe makko worɓe nayo wondunooɓe e makko ndoggi cuuɗowii. 21 Nde Daawda yottinoo ɗakkol makko ndeen, Ornan oon ɓanti gite muuɗum de yi'i ɗum. O wurtii ƴarorde ndeen, o hofowii yeeso Daawda, tiinde makko na tikki e leydi. 22 Daawda wi'i o:
— Yoppanam nokkuure ƴarorde ndee, mi nyiɓana Joomiraaɗo sakkirde faa woɗɗina yimɓe nyawu mbonngu ndaaɓoowu ngu. Mi yoɓirte cardi fodde coggu mayre.
23 Ornan jaabii Daawda wi'i:
— Joomam, kaananke, hooƴu nokkuure ndeen ngaɗaa ko kaajaɗaa fuu. Ndaar, mi hokkan ga'i am ɗii ngaɗaa sadaka buleteeɗo, leɗɗe muɓɓen ɗeen du, faa kuɓɓiree. Wooɗi alkama oon du laatoo sadaka conndi. Mi hokkii ma ɗum fuu.
24 Ammaa Daawda jaabii Ornan wi'i:
— A'aa, mi soodiran ɗum fuu e cardi fodde coggu muuɗum. Mi sakkantaa Joomiraaɗo ko njeyɗaa, mi waɗirtaa sadaka buleteeɗo ko keɓumi ɓolum.
25 Daawda soodiri nokkuure ndeen buuɗi kaŋŋe 600. 26 O nyibani Joomiraaɗo sakkirde ɗoon. O sakki sadakaaji buleteeɗi e sadakaaji dewral de o noddi Joomiraaɗo. Kam du, jaabii o, waɗi yiite ƴuuri kammu jippii dow sakkirde sadakaaji buleteeɗi ndeen.
27 Joomiraaɗo haaldi e maleyka mo neli oon de soorni kaafaahi muuɗum ley hulgo. 28 Wakkati oon, nde Daawda yi'unoo Joomiraaɗo jaabake ɗum ley ƴarorde Ornan, Yebusinke toon fu, waɗi sadakaaji. 29 Tawi hukum Joomiraaɗo mo Muusaa waɗunoo ley ladde yoornde oon e sakkirde sadakaaji buleteeɗi ndeen fuu na ngonnoo dow nokkuure toownde ley wuro Gibiyon. 30 Ammaa Daawda waawaano yahude toon filowoo Laamɗo, sabo imo heewunoo kulol saabe kaafaahi maleyka Joomiraaɗo oon.