22
1 Ndeen Daawda wi'i:— Wo ɗoo laatotoo suudu Joomiraaɗo, Laamɗo. Ɗoo sakkirde sadakaaji Israa'iila buleteeɗi darotoo.
Haala segilgo nyiɓugol Suudu Seniindu
2 Daawda yamiri jananɓe jooɗiiɓe ley Israa'iila fuu kawrondinee de waɗi sehooɓe kaaƴe cehi kaaƴe mawɗe faa nyiɓiree suudu Laamɗo. 3 O segilii njamndi ɓaleeri ɗuuɗundi faa waɗiree tonteeje ommbirɗe dammbuɗe e nanngirɗe muɓɓen tawti njamndi mboɗeeri ɗuuɗundi faa waawataake fonndeede 4 e leɗɗe seddere ɗe mbaawaaka limeede sabo Sidoninkooɓe e Tiriyankooɓe ngaddaniinoo Daawda leɗɗe ɗeen faa ɗuuɗi. 5 Daawda na wi'annoo:
— Suka am Suleymaana na sunɗi wooɗi du na lokkiɗi tafon. Tawi le, suudu nyiɓanteendu Joomiraaɗo nduun waɗan innde ley leyɗe fuu saabe manngu muuɗum e darja muuɗum. Wo saabe ɗuum de miɗo segilanoo o.
Noon Daawda segiloranii o segilgo manngo gilla na wuuri.
Daawda yamiri Suleymaana nyiɓa suudu Laamɗo
6 Daawda noddi ɓiyum Suleymaana de yamiri ɗum nyiɓana Joomiraaɗo, Laamɗo Israa'iila suudu. 7 O wi'i ɗum:
— Miɗo anniyinoo ley ɓernde am nyiɓande innde Joomiraaɗo, Laamɗo am suudu. 8 Ammaa Joomiraaɗo haaldii e am wi'ii: «Aan, a rufii ƴiiƴam sanne, a waɗii konuuji mawɗi, ndelle a nyiɓantaa innde am suudu sabo a rufii ƴiiƴam keewɗam dow leydi yeeso am. 9 Inan a riman ɓiɗɗo gorko keɓoowo jam. Mi waɗan o jooɗoo e jam hakkunde wayɓe makko fiiliiɓe o ɓeen fuu. O inndirte Suleymaana. Mi hokkan Israa'iila joonnde e jam haddi laamu makko fuu. 10 Wo kanko nyiɓanta innde am suudu. O laatanto kam ɓiɗɗo gorko, miin du, mi laatanoo o baabiiwo. Mi tabintinan jooɗorgal laamu makko dow Israa'iila faa abada.»
11 Ndelle joonin kaa, suka am, miɗo ŋaaroo Joomiraaɗo wonda e maaɗa faa keɓaa daliili, wooɗi du nyiɓanaa Joomiraaɗo, Laamɗo maaɗa suudu fodde no wi'iri dow maaɗa noon. 12 Joomiraaɗo hokke hakkillo e paamal wakkati tabintinowi laamu maaɗa faa njogitoɗaa jamirooje muuɗum, kam Laamɗo maaɗa oon. 13 Si a jogitake jamirooje e sariyaaji ɗi Joomiraaɗo hokki Israa'iila e hunnduko Muusaa ɗiin fu, taa kulaa, taa ɓernde maaɗa diwna. 14 Mi tinnitake mi segilake kaŋŋe ko ɓurata tonniiji 3 000 e cardi tonniiji 30 000 saabe nyiɓugol suudu Joomiraaɗo nduun. Mi hawrondinii njamndi mboɗeeri e ɓaleeri ndi waawataake fonndeede. Mi segilake leɗɗe e kaaƴe ammaa e noon fuu aan du aɗa waawi ɓeydude. 15 Aɗa woodi gollooɓe ɗuuɗɓe, ɗum woni sehooɓe kaaƴe e nyenyooɓe leɗɗe e kaaƴe e worɓe harwuɓe waawuɓe golle feere feere. 16 Kaŋŋe e cardi e njamndi mboɗeeri e njamndi ɓaleeri fuu mbaawataake fonndeede. Fuɗɗu gollal ngaal. Joomiraaɗo wonda e maaɗa.
17 Daawda yamiri mawɓe Israa'iila fuu mballa ɓiyum Suleymaana oon. O wi'i:
— 18 Yalla Joomiraaɗo, Laamɗo mooɗon waldaa e mon naa? Yalla o hokkaay on joonnde e jam tatteeji fuu naa? Si goonga o wattii yimɓe leydi ndii e juuɗe am. Ndelle yimɓe leydi ndiin fuu ngartii e ley junngo Joomiraaɗo e ley dabare yimɓe muuɗum. 19 Joonin kaa, piloree Joomiraaɗo, Laamɗo mooɗon e ɓerɗe mon fuu e yonkiiji mon fuu. Ummee, nyiɓanon Laamɗo Joomiraaɗo suudu seniindu faa ngartiron keesuwal amaana muuɗum ngaal e kujje ceniiɗe ley suudu nyiɓanteendu innde Joomiraaɗo nduun.