Ko Daawda halfini Lewinkooɓe
23
1 Nde Daawda naywunoo sanne ndeen, waɗi ɓiyum Suleymaana laamii dow Israa'iila.2 O hawrondini mawɓe Israa'iila fuu, tawti almaami'en e Lewinkooɓe. 3 Lewinkooɓe hewtuɓe duuɓi 30 yaade yeeso fuu limaa. Limaaɓe ɓeen ummii worɓe 38 000. 4 Daawda wi'i:
— Worɓe 24 000 hakkunde maɓɓe ngaɗee ndaaranooɓe golle nyiɓugol suudu Joomiraaɗo nduun. Worɓe 6 000 laatoo ardiiɓe e sarotooɓe. 5 Worɓe 4 000 laatoo doomooɓe dammbuɗe wooɗi 4 000 du, yimooɓe na njettira Joomiraaɗo munkariiji ɗi ngaɗumi faa maniree ɗiin.
6 Daawda senndiri ɓiɓɓe Lewi: Gerson e Kehat e Merari golle muɓɓen.
7 Ƴuwdi Gerson wo: Ladan e Simey.
8 Ladan na woodunoo ɓiɓɓe tato: Yehiyel, ardiiɗo muɓɓen e Jetam e Jowiila.
9 Ɓiɓɓe Simey wo: Selomit e Hajiyel e Haran, ɓe tato. Ɓee ngoni mawɓe cuuɗi Ladan.
10 Ɓiɓɓe Simey wo: Yahat e Jija e Yehus e Beriya. Nayo ɓee ngoni ɓiɓɓe Simey. 11 Yahat wonnoo ardiiɗo maɓɓe. Jija rewti ɗum. Yehus e Beriya keɓaayno ɓiɓɓe worɓe sanne de kawriti laatii suudu wooturu, ndelle gollal gootal.
12 Ɓiɓɓe Kehat wo: Amram e Yitsehar e Heberon e Ujjiyel, ɓe nayo.
13 Ɓiɓɓe Amram wo: Haaruuna e Muusaa. Haaruuna senndaa faa laatoo ceniiɗo sanne, kam e ɓiɓɓe muuɗum fuu faa na mbula ure yeeso Joomiraaɗo. Iɓe ngollana ɗum wooɗi du, iɓe mbarkinira e innde muuɗum faa abada. 14 Muusaa, neɗɗo Laamɗo oon kaa, ɓiɓɓe muuɗum e ley lenyol Lewinkooɓe limaa.
15 Ɓiɓɓe Muusaa wo: Eliyejer e Gersom.
16 Ley ɓiɓɓe Gersom wo Sebuwel woni ardiiɗo muɓɓen.
17 Ley ɓiɓɓe Eliyejer wo Rehabiya woni ardiiɗo muɓɓen. Eliyejer heɓaay ɓiɓɓe worɓe woɓɓe ammaa Rehabiya oon kaa heɓii ɓiɓɓe worɓe faa ɗuuɗi sanne.
18 Ley ɓiɓɓe Yitsehar wo Selomit woni ardiiɗo muɓɓen.
19 Ley ɓiɓɓe Heberon wo Yeriya woni ardiiɗo muɓɓen. Amariya woni ɗiɗaɓo maɓɓe. Yahajiyel woni tataɓo. Yekameyam woni nayaɓo.
20 Ley ɓiɓɓe Ujjiyel wo Mika woni ardiiɗo muɓɓen, Yisiya rewti ɗum.
21 Ɓiɓɓe Merari wo: Mahili e Musi. Ɓiɓɓe Mahili wo: Eliyajar e Kis. 22 Eliyajar maayi tawi heɓaayno ɓiɗɗo gorko. Ammaa imo woodunoo ɓiɓɓe rewɓe. Ɓiɓɓe Kis worɓe, sakiraaɓe maɓɓe ɓangi ɓe. 23 Ɓiɓɓe Musi wo: Mahili e Eder e Yeremot, ɓe tato.
24 Ɓee ngoni ɓiɓɓe Lewi mawɓe ardiiɓe lenyol muɓɓen, limaaɓe gooto gooto fodde cuuɗi muɓɓen. Kamɓe kalfinanoo golle ley suudu Joomiraaɗo gilla mo duuɓi 20 yaade yeeso. 25 Daawda wi'iino:
— Joomiraaɗo, Laamɗo Israa'iila oon hokkii yimɓe muuɗum powtiri, wooɗi du, njooɗoto ley Urusaliima faa abada. 26 Ndelle walaa ko Lewinkooɓe na ndonndoo hukum makko e kujje muuɗum gollitirɗe ɗeen katin.
27 Wo dow haalaaji Daawda cakitiiɗi ɗiin Lewinkooɓe limaa gilla mo duuɓi 20 yaade yeeso. 28 Golle maɓɓe ley suudu Joomiraaɗo, wo wallude ɓiɓɓe Haaruuna e hawjaade galleeji e cuuɗi e laaɓinde kujje ceniiɗe e gineeji gollitirɗi ley suudu Laamɗo. 29 Ɓe ndaarana buuru ceniiɗo e conndi ɗaatundi ngaɗeteendi sadaka e maasaaje ɗe njillaake rabilla e sii maasaaje feere feere e kujje ponndirɗe teddeefi e njuuteefi fuu. 30 Wo kamɓe ndarotoo subaka e futuro fuu na njetta, na teddina Joomiraaɗo. 31 Ɓe ngaɗana Joomiraaɗo sadakaaji buleteeɗi nyannde fowteteende e darorɗe lebbi e kawrite iidiiji fodde limoore majji hono no ɓe njamiraa ɓe keddoroo yeeso Joomiraaɗo faa abada noon. 32 Ɓe ngolla ko golletee ley hukum Ceniiɗo oon e nokkuure Seniinde ndeen fuu. Ɓe mballa ɓiɓɓe Haaruuna sakiraaɓe maɓɓe ɓeen bangal ko golletee ley suudu Joomiraaɗo nduun fuu.