Golle almaami'en e Lewinkooɓe heddiiɓe
24
1 Inan cuuɗi ɓiɓɓe Haaruuna: Ɓiɓɓe Haaruuna wo: Nadabu e Abihu e Eliyajar e Itamar.2 Nadabu e Abihu maayi njoppi baabiiɓe, tawi ɓe keɓaayno ɓiɓɓe worɓe. Ndelle Eliyajar e Itamar keddodii e golle almaamaaku ɗeen. 3 Daawda e Sadok mo suudu Eliyajar e Ahimelek mo suudu Itamar cenndi golle maɓɓe. 4 Tawi le, ardiiɓe suudu Eliyajar na ɓuri ɓe Itamar. Ndelle inan no ɓe cenndiraa: Ardiiɓe cuuɗi Eliyajar sappo e njeegom, ɓe Itamar du, njeetato. 5 Ɓe cenndiraa golle ɗeen cumnal sabo ardiiɓe gollal nokkuure seniinde e ardiiɓe golle Joomiraaɗo fuu wo ittaaɓe e ɓiɓɓe Eliyajar e ɓe Itamar.
6 Semaya, ɓii Netanel laatinooɗo binndoowo hakkunde Lewinkooɓe oon winndi inɗe maɓɓe yeeso kaananke e ardiiɓe e almaami Sadok e Ahimelek ɓii Abiyatar e mawɓe cuuɗi almaami'en e Lewinkooɓe. Suudu wooturu suɓanaa lenyol Eliyajar, wooturu du, ngol Itamar.
7 Cumnal go'aɓal ngaal saami dow Yehoyarib, ɗiɗaɓal, dow Yedaya, 8 tataɓal dow Harim, nayaɓal dow Seyorim, 9 joyaɓal dow Malkiya, jeegaɓal dow Miyamin, 10 jeɗɗaɓal dow Hakkos, jeetataɓal dow Abiya, 11 jeenayaɓal dow Yesuwa, sappoɓal dow Sekaniya, 12 sappo e go'aɓal dow Eliyasib, sappo e ɗiɗaɓal dow Yakim, 13 sappo e tataɓal dow Huppa, sappo e nayaɓal dow Yesebeyab, 14 sappo e joyaɓal dow Bilga, sappo e jeegaɓal dow Immeer, 15 sappo e jeɗɗaɓal dow Hejir, sappo e jeetataɓal dow Happisset, 16 sappo e jeenayaɓal dow Petahiya, noogayaɓal dow Ejekiyel, 17 noogay e go'aɓal dow Yakin, noogay e ɗiɗaɓal dow Gamul, 18 noogay e tataɓal dow Delaya, noogay e nayaɓal dow Maasiya.
19 Wo noon ɓe kokkiraa golle maɓɓe faa ɓe naata ley suudu Joomiraaɗo fodde no baabiiɓe Haaruuna yamiri hono no Joomiraaɗo, Laamɗo Israa'iila wiirunoo noon.
Inɗe Lewinkooɓe heddiiɓe
20 Inan inɗe ɓiɓɓe Lewi ardiiɓe cuuɗi muɓɓen heddiiɓe: Subayel woni ardiiɗo suudu Amram. Yediya woni ardiiɗo suudu Subayel. 21 Yisiya woni ardiiɗo suudu Rehabiya. 22 Selomit woni ardiiɗo suudu Yitsehar. Suudu Selomit du, wo Yahat. 23 Suudu Heberon wo Yeriya woni ardiiɗo. Amariya woni ɗiɗaɓo. Yahajiyel woni tataɓo. Yekameyam woni nayaɓo. 24 Suudu Ujjiyel wo Mika woni ardiiɗo muɓɓen. Suudu Mika du wo Samir woni ardiiɗo. 25 Sakiike Mika wo Yisiya. Ɓiɓɓe Yisiya du, Jakariya woni ardiiɗo muɓɓen.
26 Ɓiɓɓe Merari wo Mahili e Musi, tawti ɓiɓɓe taanum Yahajiya. 27 Ɓiɓɓe Merari, ɓe suudu Yahajiya wo Soham e Jakkur e Ibiri. 28 Ardiiɗo suudu Mahili wo Eliyajar, ammaa Eliyajar oon heɓaay ɓiɓɓe worɓe. 29 Ley suudu Kis, wo Yerameyel woni ardiiɗo muɓɓen. 30 Ɓiɓɓe Musi wo Mahili e Eder e Yerimot. Ɓee ngoni Lewinkooɓe limaaɓe fodde cuuɗi muɓɓen. 31 Ɓeen du ngaɗi cumnal yeeso kaananke Daawda hono no sakiraaɓe muɓɓen ɓe suudu Haaruuna noon. Cumnal ngaal saami dow Sadok e Ahimelek e ardiiɓe cuuɗi almaami'en e ɗi Lewinkooɓe. Ɓe fuu wo noon ɓe ngaɗanaa gilla mawɗo faa e ɓurɗo famɗude.