Nelaaɓe Daawda to kaananke Hanun
19
1 Caggal ɗuum, Nahas, kaananke Amoninkooɓe maayi de ɓiyum Hanun loomti ɗum laamii. 2 Daawda wi'i:— Mi ndaardan Hanun ɓii Nahas hinney sabo bammum ndaardiino kam jam.
O waɗi nelaaɓe njehi njowtowi ɗum saabe maayde bammum ndeen. Yimɓe Daawda ɓeen njottii leydi Amoninkooɓe to Hanun faa njowta ɗum. 3 Ammaa ardiiɓe laamu Amoninkooɓe mbi'i Hanun:
— Yalla aɗa miila wo teddinde baaba ma Daawda haajaa de neli yimɓe ɓee ngara jowte naa? Wanaa faa ɓe kora leydi ndii, ɓe anndita ndi de ɓe kona ndi naa?
4 Ndeen Hanun nanngi nelaaɓe Daawda ɓeen femmbi ɗum'en, taƴi kaddule muɓɓen faa yottii hakkunde ɓalli de yeccini ɗum'en. 5 Daawda haalanaa kabaaru majjum de neli woɓɓe kawrowa ɓe sabo semteende na hurrunoo ɓe. Kaananke wi'i ɓe mbi'ee ɓe keddoo Yeriko faa nde baye maɓɓe puɗti. Caggal ɗuum iɓe mbaawi wartude.
No Daawda honiri Amoninkooɓe e Araminkooɓe
6 Nde Amoninkooɓe paamunoo laatake ɓe Daawda hutii fu, Hanun e yimɓe muuɗum neldi Siiriyankooɓe Mesopotami e ɓe Maaka e Soba kilooji cardi 30 000 faa ɓe keɓa torkooji e waɗɗotooɓe pucci to muɓɓen. 7 Ɓe keɓi torkooji 32 000 tawti kaananke Maaka e yimɓe muuɗum. Ɓeen ndarni koɗorɗe muɓɓen yeeso Mediba. Amoninkooɓe du, mburtii galluuje muɓɓen ngari kawriti e maɓɓe to wolde toon. 8 Nde Daawda nannoo ɗum fu, neli Yo'ab e konunkooɓe fuu to maɓɓe. 9 Amoninkooɓe ɓeen mburtii ndarowii naarude galluure ndeen na cegilanii wolde. Kaanankooɓe warunooɓe ɓeen keddii ley ladde.
10 Yo'ab ndaari tawi sey honira gaɗa e yeeso fuu. Ndeen suɓii konunkooɓe ɓurɓe harwude de ardii ɗum'en e honude Siiriyankooɓe ɓeen. 11 O halfini sakiike makko Abisay konunkooɓe heddiiɓe de ɓeen njehi kaɓdowi e Amoninkooɓe. 12 O wi'i ɗum:
— Si Siiriyankooɓe ɓeen ɓurii kam semmbe fu, ngara mballaa kam. Wooɗi si Amoninkooɓe ɓuri ma semmbe du, mi waran mi walle. 13 Semmbinɗin ɓernde maaɗa, ngaɗen ngorgu, ndaranoɗen yimɓe meeɗen e galluuje Laamɗo meeɗen. Joomiraaɗo waɗa muuyɗe muuɗum.
14 Yo'ab e konunkooɓe muuɗum njehi haɓdoyde e Siiriyankooɓe. Siiriyankooɓe ɓeen ndoggi yeeso makko. 15 Nde Amoninkooɓe paamunoo Siiriyankooɓe ndoggii fu, kam'en du ndoggi yeeso Abisay sakiike Yo'ab oon, naati ley galluure ndeen. Yo'ab du naati ley Urusaliima.
16 Nde Siiriyankooɓe nji'unoo Israa'iilankooɓe njaalake ɗum'en fu, nelani yimɓe muɓɓen jooɗiiɓe fonngo maayo Efrat. Sofak wonnoo mawɗo konunkooɓe Hadad-Ejer ɓeen. 17 Daawda haalanaa ɗum. Kam du, hawrondini konunkooɓe Israa'iila fuu. Ɓe peƴƴi Urdun, ɓe ponndii Siiriyankooɓe ɓeen faa ɓe kaɓda e muɓɓen. Daawda segilanii wolde ndeen. Kamɓe du ɓe kawri e muɓɓen. 18 Siiriyankooɓe ndoggi yeeso Israa'iilankooɓe. Daawda halki torkooji 7 000 e dorbotooɓe muɓɓen e sordaasiiɓe yahooɓe e koyɗe 40 000. O wari Sofak, mawɗo konunkooɓe ɓeen. 19 Nde yimɓe Hadad-Ejer paamunoo Israa'iilankooɓe njaalake ɗum'en fu, mbeltiri e Daawda de Daawda dawrani ɓe. Caggal ɗuum, Siiriyankooɓe njaɓaay wallitinde Amoninkooɓe katin.