No Daawda jaalorii lenyi piiliiɗi Israa'iila
18
1 Caggal ɗuum Daawda jaalii Filistiyankooɓe de semtini ɗum'en. O teeti ɓe galluure Gat e durduɗe muuɗum.2 O jaalii Mo'abinkooɓe. Ɓe laatii maccuɓe makko yoɓooɓe o lampo.
3 Daawda jaalii Hadad-Ejer, kaananke Soba faro Hamat wakkati Hadad-Ejer oon yahunoo maayo Efrat faa joƴƴinowa laamu muuɗum ndeen. 4 O teeti torkooji 1 000 e honooɓe waɗɗiiɓe pucci 7 000 e yahooɓe e koyɗe 20 000. O ittani hoore makko pucci 100 ammaa keddiiɗi ɗiin fuu o waɗi codduli muɓɓen taƴaa.
5 Siiriyankooɓe Damas ngari mballiti Hadad-Ejer, kaananke Soba oon de Daawda wari sordaasiiɓe muɓɓen 22 000. 6 Daawda joƴƴini sordaasiiɓe muuɗum leydi Siiriya ley galluure Damas. O dawrani Siiriyankooɓe ɓeen, imo yoɓnoo ɗum'en lampo. Joomiraaɗo na hokkannoo o jaalorgal nokku fuu to o yahannoo. 7 Daawda hooƴi bawaaɗe kaŋŋe ɗe sordaasiiɓe Hadad-Ejer tiiginoo yaari Urusaliima. 8 O hooƴi njamndi mboɗeeri ɗuuɗundi ley wuro Tibat e ngo Kun, galluuje Hadad-Ejer. Wo njamndi ndiin Suleymaana waɗiri taasawal manngal bi'eteengal Maayo e bimmbeeje e kujje gollitirɗe ley galle suudu seniindu.
9 Tohu, kaananke Hamat nani Daawda jaalake konunkooɓe kaananke Hadad-Ejer mo Soba ɓeen fuu. 10 Tawi kanko du imo haɓdannoo e Hadad-Ejer oon. Ɗuum saabii de o neli ɓiyiiko Hadoram to kaananke Daawda faa jowta ɗum de yetta ɗum saabe jaalake Hadad-Ejer. O neldi Daawda kujje gaɗiraaɗe kaŋŋe e cardi e njamndi mboɗeeri. 11 Kaananke Daawda seninani ɗe Joomiraaɗo, kanje e kujje kaŋŋe e cardi ɗe teetunoo Edominkooɓe e Mo'abinkooɓe e Amoninkooɓe e Filistiyankooɓe e Amalekinkooɓe ɗeen fuu.
12 Abisay, ɓii Seruya jaalii Edominkooɓe 18 000 ley naɗɗol Lamɗam. 13 O joƴƴini sordaasiiɓe ley Edom de yimɓe leydi ndiin fuu laatii maccuɓe Daawda. Joomiraaɗo na hokkannoo Daawda jaalorgal to yahata fuu.
Inɗe mawɓe laamu Daawda
14 Daawda laamii dow Israa'iila fuu. Imo hiitoronoo yimɓe makko goonga e dartaare. 15 Yo'ab, ɓii Seruya wonnoo mawɗo konunkooɓe makko. Yoosafat, ɓii Ahilud wonnoo kayboowo dewte kabaaruuji laamu. 16 Sadok, ɓii Ahitub e Abimelek ɓii Abiyatar laatinoo almaami'en. Sabsa wonnoo binndanoowo kaananke. 17 Benaya, ɓii Yehoyada wonnoo ardiiɗo Keretiyankooɓe e Peletiyankooɓe reenooɓe Daawda. Ɓiɓɓe Daawda laatinoo hooreeɓe ley laamu muuɗum.