Amaana mo Joomiraaɗo waddi e Daawda
17
1 Nde Daawda jooɗinoo ley galle muuɗum ndeen, haaldi e annabi Natan wi'i ɗum:— Miin miɗo jooɗii ley suudu nyiɓiraandu leɗɗe seddere ammaa keesuwal amaana Joomiraaɗo kaa na woni ley hukum gaɗiraaɗo gude.
2 Natan jaabii o wi'i:
— Waɗu ko ɓernde maaɗa wi'i ma fuu sabo Laamɗo na wondi e maaɗa.
3 Ley jemma oon konngol Laamɗo wari e Natan de wi'i ɗum:
— 4 Njaha to maccuɗo am Daawda mbi'aa ɗum inan ko Joomiraaɗo wi'i: «Wanaa aan nyiɓanta kam suudu ɗo njooɗotoomi. 5 Sabo mi jooɗaaki ley suudu gilla nyannde mburtinnoomi Israa'iila leydi Misira faa warde hannden, ammaa wo ley hukum njooɗiimi to eggoton e to koɗoton fuu. 6 Nokkuuje ɗe njaadumi e yimɓe Israa'iila fuu, yalla mi ƴami ardiiɓe, sarotooɓe ɓe ngaɗumi laatoo durooɓe on ɓeen mbiimi ɗum'en: ‹Ko saabii de on nyiɓiranaay kam suudu e leɗɗe seddere naa?› »
7 Ndelle kaaldaa e Daawda maccuɗo am oon mbi'aa ɗum: «Inan ko Joomiraaɗo Jom Baawɗe wi'i: Wo miin wari hooƴi ma ley durdude, aɗa wonnoo gaɗa coggal baali, faa mi waɗe ardiiɗo yimɓe am Israa'iilankooɓe. 8 To njaaɗaa fuu, mi wondii e maaɗa, mi riiwii wayɓe yeeso maaɗa. Mi mawninan innde maaɗa hono no yimɓe innde anndeeɓe mawɓe anndaaɓe ley adunaaru noon. 9 Mi hokkan Israa'iila, lenyol am ngool nokkuure. Mi joƴƴinan ɓe, ɓe keddoo toon faa laatoo joonnde maɓɓe, faa'e dimmbataa ɓe, bonɓe du kalkataa ɓe hono arane noon katin. 10 Gilla nyannde njoƴƴinnoomi ardiiɓe Israa'iilankooɓe, yimɓe am ɓeen ndeen, cemtinmi wayɓe ma fuu. Wooɗi du, wo ndeen kollumi ma wo miin Joomiraaɗo tabintinta suudu maaɗa. 11 Nde nyalaaɗe maaɗa kiɓɓowi de kawritoyɗaa e maamiraaɓe maaɗa ndeen, mi waɗan gooto e ɓiɓɓe maaɗa, ƴuuruɗo e maaɗa loomte de mi tabintina laamu muuɗum. 12 Wo oon nyiɓanta kam suudu de miin du mi tabintina laamu muuɗum faa abada. 13 Mi laatanto o baabiiwo, kanko du, o laatanoo kam ɓiɗɗo gorko. Mi ittataa hinney am dow makko hono no ittirnoomi ɗum dow mo loomtuɗaa oon noon. 14 Mi waɗan laamu makko tabita ley suudu am e ley laamu am. Laamu makko tabitan faa abada.»
15 Natan haalani Daawda haala kaan e ko Joomiraaɗo holli ɗum fuu.
Du'aare Daawda
16 Kaananke Daawda yehi jooɗowii yeeso Joomiraaɗo de wi'i:
— Yaa Laamɗo, Joomam, miin wo mi moy? Suudu am wo ɗume de keɓumi njottinɗaa kam faa ɗoo? 17 Ammaa ɗum fuu wo seeɗa e gite maaɗa, yaa Laamɗo! A haalii dow ko ngaɗanoytaa suudu am ley ko waroyta. A ndaardii kam hono neɗɗo tedduɗo, Laamɗo Joomiraaɗo. 18 Ɗume mbaawumi wi'ude ma katin dow teddeengal ngal kokkuɗaa kam ngaal? Aɗa anndi maccuɗo maaɗa. 19 Yaa Joomiraaɗo, wo saabe am, miin maccuɗo maaɗa, e fodde muuyɗe maaɗa de ngaɗuɗaa kujje mawɗe ɗee faa kolla manngu maaɗa. 20 Joomiraaɗo, hono maaɗa walaa, wooɗi du fodde ko noppi amin nani ɗuum, Laamɗo goɗɗo walaa si wanaa aan. 21 Yalla na woodi lenyol ley adunaaru hono ngol Israa'iila, yimɓe ma ɓeen, ngol alla gomma yehi rimɗinowi faa waɗa ɗum'en yimɓe muuɗum naa? A mawninirii innde maaɗa e waɗugol kujje mawɗe kaayniiɗe. A riiwii lenyi yeeso lenyol maaɗa ngol mburtinɗaa leydi Misira ngool. 22 A suɓake Israa'iilankooɓe laatoo lenyol maaɗa faa abada. Wooɗi du, aan, Joomiraaɗo, a laatake Laamɗo maɓɓe. 23 Joonin kaa, Joomiraaɗo, tabintin konngol ngol kokkuɗaa dow am, miin maccuɗo maaɗa e dow suudu am ngool. Waɗu ko mbiiɗaa ɗuum laatoo. 24 Waɗu konngol ngool tabita faa innde maaɗa heɓa teddeengal faa abada wooɗi du nanee ko Joomiraaɗo Jom Baawɗe, wo kam woni Laamɗo Israa'iila. Waɗu ƴuwdi maccuɗo maaɗa Daawda tabita yeeso maaɗa faa abada. 25 Sabo wo aan, Laamɗo am, wi'i kam a tabintinan suudu am. Wo saabe ɗuum de keɓumi cuusal warude waɗa du'aare yeeso maaɗa. 26 Joonin, Joomiraaɗo, wo aan woni Laamɗo wooɗi du wo aan holli kam miin maccuɗo maaɗa moƴƴere ndee. 27 A jaɓii barkinde suudu am faa ndu tabita yeeso maaɗa faa abada. Sabo wo aan Joomiraaɗo barkini, wooɗi du, ko barkinɗaa fuu heddoto wo ko barkinaa faa abada.