16
1 Ɓe nanni keesuwal Laamɗo ngaal, ɓe njoƴƴini ngal ley hukum mo Daawda darnani ngal oon. Ɓe ngaɗi sadakaaji buleteeɗi e sadakaaji dewral yeeso Laamɗo. 2 Nde Daawda timminnoo waɗude sadakaaji buleteeɗi e sadakaaji dewral ndeen, barkini jamaare ndeen e innde Joomiraaɗo. 3 Ndeen o yeɗondiri yimɓe tawaaɓe worɓe e rewɓe mono fuu buuruure muɓɓere e buuruure waɗiraande tamorooje e waɗiraande inabooje.No Lewinkooɓe njimiri njetti Joomiraaɗo
4 Daawda waɗi Lewinkooɓe woɓɓe na ndaroo yeeso keesuwal Joomiraaɗo faa ngollana ɗum. Ɓeen ardotoo du'aare, na njima na njetta na teddina Joomiraaɗo, Laamɗo Israa'iila. 5 Asaf, ardotonoo yimooɓe ɓeen. Jakariya rewti ɗum, tawti Ye'iyel e Semiramot e Yehiyel e Mattitiya e Eliyaba e Benaya e Obed-Edom. Ye'iyel na hoɗannoo kolli e geegineeji. Asaf du na gokkondira beɗi njamndi. 6 Almaami'en Benaya e Yahajiyel na puufannoo luwe yeeso keesuwal amaana Laamɗo wakkati fuu. 7 Nyalaande ndeen woni puɗɗam Daawda hokkude Asaf e sakiraaɓe muuɗum golle yettude Joomiraaɗo.
Jimol Daawda jettoowol Laamɗo
(Jabuura 105:1-15)
8 Njettee Joomiraaɗo, kollee manngu innde muuɗum;
anndinee lenyi goɗɗi golle mawɗe ɗe o waɗi.
9 Njimanee o, piyanee o munkaruuji!
Miccitee kujje kaayniiɗe ɗe o waɗi ɗeen fuu!
10 Mantoree innde makko seniinde ndeen,
filotooɓe Joomiraaɗo fuu mbelna ɓerɗe muɓɓen.
11 Pilee Joomiraaɗo e semmbe muuɗum,
tewtee wondude e makko wakkati fuu.
12 Miccitee kujje kaayniiɗe ɗe o waɗi,
taykee maandeeji e sariyaaji makko,
13 onon lenyol Israa'iila, maccuɗo makko,
onon ɓiɓɓe Yaakuuba, suɓaaɓe makko.
14 Wo kanko woni Joomiraaɗo, Laamɗo meeɗen,
wo kanko hiitotoo adunaaru fuu.
15 Miccitoɗon amaana makko oon faa abada,
njogitoɗon aadi makko faa jamaanuuji ujunere.
16 Taa njeggitee amaana mo o haɓɓidi e Ibrahiima,
taa njeebee hunayeere nde o hunanii Isiyaaka.
17 Amaana oon laatanake Yaakuuba sariya,
o laatanake Israa'iila aadi tabitoori faa abada.
18 Imo wi'a: Mi hokkete leydi Kanaana,
Ndi laatoo ndongu mooɗon.
19 Limoore mooɗon na famɗunoo,
oɗon laatinoo njananoy, koɗukoy ley leydi ndiin tan.
20 Iɓe njiilonoo hakkunde leyɗe,
iɓe njahannoo hakkunde laamuuji e lenyi.
21 Ammaa Laamɗo accaay fay gooto torra ɓe;
o jukkake kaanankooɓe saabe maɓɓe.
22 O wi'i: «Taa meemee suɓaaɓe am,
Taa torree annabaaɓe am ɓeen.»
(Jabuura 96)
23 Onon yimɓe adunaaru fuu, njimee njetton Joomiraaɗo.
Kaalee kabaaru kisindam makko nyannde fuu.
24 Kaalee haala teddeengal makko hakkunde lenyi fuu,
pillanoɗon yimɓe fuu kabaaru maandeeji makko kaayniiɗi,
25 sabo Joomiraaɗo wo mawɗo sanne, potuɗo teddineede,
wo o kulɓiniiɗo ɓuri allaaji keddiiɗi fuu.
26 Ngam allaaji lenyi keddiiɗi ɗiin fuu wo fewreeji,
ammaa wo Joomiraaɗo tagi kammu.
27 Wo kanko jeyi manngu e teddeengal,
semmbe e seyo fuu wo to makko tawetee.
28 Onon lenyi leyɗe fuu, njettee Joomiraaɗo,
manee teddeengal makko e baawɗe makko!
29 Teddinee innde Joomiraaɗo,
ngardee dokke mooɗon yeeso makko,
ndikkinoɗon yeeso makko ley nokkuure makko seniinde ndeen.
30 Onon yimɓe adunaaru fuu, ndiwnee yeeso makko.
O tabintinirii adunaaru e baawɗe makko, ndu dimmbataako.
31 Ndelle ko woni dow kammu fuu seyoo,
ko woni e leydi du, wonda e welwelo,
lenyi adunaaru fuu tannyoraa Joomiraaɗo woni Laamiiɗo!
32 Maayo iidida e ko woni e muuɗum fuu,
ladde du e ko woni e muuɗum fuu mbelwelta!
33 Leɗɗe cukkuri kolla seyo muɓɓen yeeso Joomiraaɗo,
sabo imo wara faa o hiitoo duuniyaaru.
(Jabuura 106:1, 47-48)
34 Njettee Joomiraaɗo, sabo wo moƴƴuɗo,
hinney makko timmataa faa abada!
35 Mbi'ee: Hisin min, aan Laamɗo kisinoowo amin,
hawrondin min de ndannaa min e juuɗe lenyi goɗɗi
faa min njetta innde maaɗa seniinde ndeen,
de yettude ma laatoo teddeengal amin.
36 Barke woodana Joomiraaɗo, Laamɗo Israa'iila faa abada abadin.
Ndeen yimɓe fuu njaabii mbi'i: «Aamiina». Ɓe teddini Joomiraaɗo.
37 Daawda darni Asaf e sakiraaɓe muuɗum yeeso keesuwal Amaana Joomiraaɗo ngaal faa keddoo na ngollana Laamɗo wakkati fuu fodde no yamiraa nyannde fuu noon. 38 Doomooɓe dammbuɗe du, wo Obed-Edom, ɓii Yedutun e Hosa e sakiraaɓe muuɗum 68. 39 Daawda yoppi almaami Sadok e almaami'en woɓɓe sakiraaɓe muuɗum yeeso Joomiraaɗo ley nokkuure sakkirde wonnde wuro Gibiyon 40 faa cakkana Joomiraaɗo sadakaaji buleteeɗi subaka e futuro fuu dow sakkirde sadakaaji buleteeɗi. Ɓe ngaɗa du huunde fuu ko winndaa ley Tawreeta mo Joomiraaɗo hokki Israa'iila oon. 41 Tawti Heman e Yedutun e heddiiɓe suɓanooɓe de inɗe muɓɓen mbinndaa faa keeda e yettude Joomiraaɗo, sabo hinney muuɗum timmataa faa abada. 42 Heman e Yedutun na puufannoo luwe, na ngokkondira beɗi njamndi faa ɗowta yimanooɓe Laamɗo ɓeen. Ɓiɓɓe Yedutun na ndoomannoo dammbugal.
43 Yimɓe fuu kooti galle muɓɓen. Daawda du hooti faa barkinowa suudu muuɗum.