Iidi yaarugol Keesuwal Amaana ley Urusaliima
15
1 Daawda nyiɓani hoorem cuuɗi ley galluure Daawda. O moƴƴinani keesuwal Laamɗo nokkuure de o waɗani ɗum hukum. 2 Ndeen o wi'i:— Wo Lewinkooɓe tan njeyi ronndaade keesuwal Joomiraaɗo sabo wo kam'en Joomiraaɗo halfinnoo ronndaade ngal e gollande ɗum faa abada.
3 Daawda hawrondini jamaare Israa'iila fuu ley Urusaliima faa joƴƴina keesuwal Joomiraaɗo ley nokkuure nde moƴƴinani ɗum ndeen. 4 O hawrondini ɓiɓɓe Haaruuna e Lewinkooɓe.
5 Ɓiɓɓe Kehat: Uriyel woni ardiiɗo muɓɓen tawti sakiraaɓe muuɗum 120.
6 Ɓiɓɓe Merari: Asaya woni ardiiɗo muɓɓen tawti sakiraaɓe muuɗum 220.
7 Ɓiɓɓe Gersom: Jowiila woni ardiiɗo muɓɓen tawti sakiraaɓe muuɗum 130.
8 Ɓiɓɓe Elisafan: Semaya woni ardiiɗo muɓɓen tawti sakiraaɓe muuɗum 200.
9 Ɓiɓɓe Heberon: Eliyel woni ardiiɗo muɓɓen tawti sakiraaɓe muuɗum 80.
10 Ɓiɓɓe Ujjiyel: Aminadaabu woni ardiiɗo muɓɓen tawti sakiraaɓe muuɗum 112.
11 Daawda noddi almaami'en Sadok e Abiyatar e Lewinkooɓe Uriyel e Asaya e Jowiila e Semaya e Eliyel e Aminadaabu. 12 O wi'i ɓe:
— Wo on mawɓe cuuɗi Lewinkooɓe. Ceninee ko'e mooɗon onon e sakiraaɓe mon fuu de ɓanton keesuwal Joomiraaɗo, Laamɗo Israa'iila ngaal, njaaron ngal ley nokkuure nde moƴƴinanmi ngal ndeen. 13 Arane on tawaakano nde Joomiraaɗo, Laamɗo meeɗen fiirunoo min jukkungo sabo min ƴamayno muuyɗe muuɗum fodde no yamirnoo noon.
14 Ndeen Almaami'en e Lewinkooɓe cenini ko'e muɓɓen faa njaara keesuwal Joomiraaɗo, Laamɗo Israa'iila ngaal. 15 Lewinkooɓe mbakkorii keesuwal Laamɗo ngaal dow balaaje muɓɓen e cabbi fodde no Joomiraaɗo yamirnoo e hunnduko Muusaa noon.
16 Daawda yamiri mawɓe Lewinkooɓe ngaɗa sakiraaɓe muɓɓen yimooɓe ngarda e munkariiji muɓɓen, ɗum woni kolli e geegineeji e beɗi jamɗe gokkondirteeɗi. Ɓe peekoo ɓe njima ɓe kolla seyo maɓɓe. 17 Lewinkooɓe cuɓii Heman ɓii Jowiila e sakiraaɓe muuɗum: Asaf ɓii Berekiya e Etan ɓii Kusaya mo suudu Merari. 18 Sakiraaɓe maɓɓe rewtuɓe faa mballita ɓe wo: Jakariya e Ben e Yahajiyel e Semiramot e Yehiyel e Unni e Eliyaba e Benaya e Maaseya e Mattitiya e Eliflehu e Mikneya e Obed-Edom e Ye'iyel doomooɓe dammbuɗe. 19 Hakkunde yimooɓe ɓeen wo Heman e Asaf e Etan tiiginoo beɗi njamndi mboɗeeri na kellondira. 20 Jakariya e Ajiyel e Semiramot e Yehiyel e Unni e Eliyaba e Maaseya e Benaya na tiiginoo kolli ɗi daaɗe «alamot*». 21 Mattitiya e Eliflehu e Mikneya e Obed-Edom e Ye'iyel e Ajajiya na tiiginoo kolli ɗi ɓoggi jeetati faa ardoo jimi ɗiin. 22 Kenaniya, mawɗo Lewinkooɓe ronndotooɓe keesuwal ceniingal oon ndaaranannoo donngal ngaal sabo imo woodunoo baawɗe majjum. 23 Berekiya e Elkana ndoomannoo keesuwal ngaal. 24 Almaami'en Sebaniya e Yoosafat e Netanel e Amasiya e Jakariya e Benaya e Eliyejer puufannoo luwe yeeso keesuwal Laamɗo ngaal. Obed-Edom e Yehiya ndoomannoo keesuwal ngaal.
25 Ndeen Daawda e mawɓe Israa'iila e ardiiɓe geɓe konunkooɓe mawɗe fuu kawriti ndilliri suudu Obed-Edom faa kooƴowa keesuwal amaana Joomiraaɗo ngaal ley seyo. 26 Wo e mballa Joomiraaɗo Lewinkooɓe mbaawiri ndonndii keesuwal ngaal. Saabe ɗuum de ɓe cakki ga'i jeɗɗi e jawɗi jeɗɗi. 27 Daawda e Lewinkooɓe ronndinooɓe keesuwal e yimooɓe e Kenaniya mawɗo ronndotooɓe heddiiɓe fuu iɓe ɓorninoo saayooji leppi ɗaatuɗi. Daawda na wakkinoo du lefol almaami'en ɗaatungol. 28 Yimɓe Israa'iila fuu kawriti njaari keesuwal amaana Joomiraaɗo ngaal Urusaliima. Iɓe peekoo iɓe njima, iɓe puufa luwe, iɓe koɗa kolli, iɓe kellondira beɗi njamndi.
29 Nde keesuwal Joomiraaɗo ngaal naatannoo ley galluure Daawda ndeen, Mikal, ɓii Sawulu debbo na yuurnoroo feneetere. O yi'i kaananke Daawda na fitta na wama de o huyfini ɗum ley ɓernde makko.